• 175 నియోజకవర్గాల్లో ఘనంగా కార్యక్రమాలు.
• తెలంగాణ సహా ఇతర రాష్ట్రాల్లోనూ నిర్వహణకు సన్నాహాలు.
పిఠాపురం, మహా.
జనసేన పార్టీ యువజన విభాగాన్ని సెప్టెంబరు 2న పిఠాపురంలో ఘనంగా ఆవిష్కరించనున్నారు. జనసేన పార్టీ అధ్యక్షుడు, రాష్ట్ర ఉప ముఖ్యమంత్రి పవన్‌ కల్యాణ్‌ జన్మదినోత్సవాన్ని పురస్కరించుకుని ఉదయం 11 గంటలకు ఈ కార్యక్రమాన్ని నిర్వహించనున్నారు. జనసైనికులు, వీర మహిళలు, పార్టీ నాయకుల సమక్షంలో యువజన విభాగం ఆవిష్కరణ జరగనుంది. పార్టీ రాజకీయ వ్యవహారాల కమిటీ చైర్మన్‌, రాష్ట్ర పౌరసరఫరాల శాఖ మంత్రి నాదెండ్ల మనోహర్‌ ముఖ్య అతిథిగా హాజరుకానున్నారు.
ఈ సందర్భంగా యువజన విభాగం లోగో, గీతాన్ని ఆవిష్కరించనున్నారు. ప్రస్తుతం కేరళలో చికిత్స పొందుతున్న పవన్‌ కల్యాణ్‌ ఆన్‌లైన్‌ ద్వారా పార్టీ శ్రేణులను ఉద్దేశించి సందేశం ఇవ్వనున్నారు. యువజన విభాగం ఏర్పాటు ఉద్దేశం, దాని లక్ష్యాలు, యువతను రాజకీయంగా చైతన్యవంతులను చేయడం, పార్టీ కార్యకలాపాల్లో యువత భాగస్వామ్యాన్ని పెంచడం వంటి అంశాలపై పవన్‌ కల్యాణ్‌ దిశానిర్దేశం చేయనున్నట్లు జనసేన వర్గాలు తెలిపాయి.
175 నియోజకవర్గాల్లో కార్యక్రమాలు
యువజన విభాగం ఆవిష్కరణ కార్యక్రమాన్ని రాష్ట్రంలోని మొత్తం 175 నియోజకవర్గాల్లో ఘనంగా నిర్వహించేందుకు జనసేన శ్రేణులు ఏర్పాట్లు చేస్తున్నాయి. పిఠాపురంలో జరిగే ప్రధాన కార్యక్రమానికి అనుసంధానంగా ఆయా నియోజకవర్గాల్లో పార్టీ నాయకులు, జనసైనికులు, యువత ఆధ్వర్యంలో కార్యక్రమాలు చేపట్టనున్నారు.
యువతను పార్టీ సంస్థాగత నిర్మాణంలో మరింత క్రియాశీలంగా భాగస్వాములను చేయడం, ప్రజా సమస్యలపై వారికి అవగాహన కల్పించడం, సామాజిక కార్యక్రమాల్లో యువత పాత్రను పెంచడం యువజన విభాగం ప్రధాన లక్ష్యాలుగా పార్టీ వర్గాలు పేర్కొంటున్నాయి. పార్టీ భవిష్యత్‌ కార్యకలాపాల్లో యువతకు కీలక బాధ్యతలు అప్పగించేందుకు ఈ విభాగం వేదికగా మారనుందని భావిస్తున్నారు.
తెలంగాణలోనూ నిర్వహణ
ఆంధ్రప్రదేశ్‌కు పరిమితం కాకుండా తెలంగాణతో పాటు పలు రాష్ట్రాల్లోనూ జనసేన యువజన విభాగం ఆవిష్కరణ కార్యక్రమాలు నిర్వహించేందుకు సన్నాహాలు చేస్తున్నారు. ఆయా రాష్ట్రాల్లో పార్టీకి ఉన్న యువజన విభాగం కార్యకర్తలు, నాయకులను సమన్వయం చేసి కార్యక్రమాలను నిర్వహించేందుకు ప్రణాళికలు సిద్ధం చేస్తున్నట్లు పార్టీ వర్గాలు తెలిపాయి.
పవన్‌ కల్యాణ్‌ జన్మదినోత్సవం సందర్భంగా ఒకేరోజు రాష్ట్రవ్యాప్తంగా, ఇతర రాష్ట్రాల్లోనూ యువజన విభాగం కార్యక్రమాలు నిర్వహించడం ద్వారా పార్టీ యువజన శక్తిని ఒకే వేదికపైకి తీసుకురావాలని జనసేన లక్ష్యంగా పెట్టుకున్నట్లు తెలుస్తోంది. సెప్టెంబరు 2న పిఠాపురంలో జరిగే ప్రధాన ఆవిష్కరణ కార్యక్రమంతో జనసేన యువజన విభాగం అధికారికంగా తన కార్యకలాపాలను ప్రారంభించనుంది.
