ఖమ్మం, మహా.
*ఖమ్మం రూరల్ మండలం పోలంపల్లి వద్ద నిర్మించబడిన రాజీవ్ స్వగృహ ఫ్లాట్లు ఎట్టకేలకు వెలుగులోకి రాబోతున్నాయి. దాదాపు పదేళ్లుగా అసంపూర్తిగా, నిర్లక్ష్యంగా నిలిచిపోయిన ఈ ప్రాజెక్టును ప్రస్తుత ప్రభుత్వం పునరుద్ధరించింది. మొత్తం 575 ఫ్లాట్లకు సంబంధించి ఈనెల 8న టెండర్ల ప్రక్రియ ప్రారంభమవుతుందని ప్రకటించడం, గృహరహిత కుటుంబాలకు కొత్త ఆశలు నింపుతోంది. ఇప్పటివరకు పలు కారణాలతో నిలిచిపోయిన ఈ ప్రాజెక్టు, ఇప్పుడు పూర్తి స్థాయిలో వాడుకలోకి రానున్న సంకేతాలు స్పష్టంగా కనిపిస్తున్నాయి*
రాజీవ్ స్వగృహ పథకం కింద నిర్మించబడిన ఫ్లాట్లు గృహావసరాల కలను సాకారం చేయబోతున్నాయి. ఖమ్మం రూరల్ మండలం పోలంపల్లి వద్ద 575 ఫ్లాట్ల నిర్మాణం సంవత్సరాలుగా అసంపూర్తిగా ఉండిపోయింది. కానీ ఇప్పుడు ప్రస్తుత ప్రభుత్వం ఈ ప్రాజెక్టును పూర్తి చేసి, ప్రజలకు అందించేందుకు టెండర్ల ప్రక్రియను ప్రారంభించనుంది. ఈనెల 8న అధికారికంగా టెండర్లు ఆహ్వానించనున్నట్లు సంబంధిత శాఖలు వెల్లడించాయి.
గత ప్రభుత్వాల నిర్లక్ష్యం కారణంగా ఈ ప్రాజెక్టు సగంలో ఆగిపోయి, గృహ కలలు కంటున్న వందలాది కుటుంబాలు నిరాశకు గురయ్యాయి. ఖాళీ భవనాలు కాలక్రమేణా పాడైపోయి, చుట్టుపక్కల ప్రాంతం నిరుపయోగంగా మారిపోయింది. ఈ నేపథ్యంలో నూతన ప్రభుత్వం కదలిక చూపడం స్థానికులకు ఊరటనిస్తోంది.
ఖమ్మం నగరం వేగంగా అభివృద్ధి చెందుతున్న నేపథ్యంలో గృహ అవసరాలు విపరీతంగా పెరిగాయి. రియల్ ఎస్టేట్ ధరలు ఆకాశాన్ని తాకుతుండడంతో మధ్యతరగతి, తక్కువ ఆదాయ వర్గాలకు గృహం సొంతం కావడం కష్టసాధ్యం అయింది. ఈ క్రమంలో ప్రభుత్వ ప్రాజెక్టులు మాత్రమే ప్రజలకు అందుబాటులో ఉంటాయి. పోలంపల్లి వద్ద 575 ఫ్లాట్ల విడుదలతో కొంతమేరకు గృహ సంక్షోభానికి ఉపశమనం లభిస్తుందని నిపుణులు అంచనా వేస్తున్నారు.
అయితే, ఈసారి టెండర్ల కేటాయింపుల్లో పారదర్శకత తప్పనిసరి. గతంలో ఇలాంటి ప్రాజెక్టుల్లో అవినీతి ఆరోపణలు రావడం, మధ్యవర్తుల జోక్యం పెరగడం ప్రజల్లో అనుమానాలు కలిగించాయి. ఈసారి ప్రభుత్వం కఠిన పర్యవేక్షణతో ముందుకెళ్తేనే నమ్మకం పెరుగుతుంది.
ప్రాజెక్టు పూర్తి కావడంతో పోలేపల్లి ప్రాంతంలో మౌలిక వసతులు, రవాణా సౌకర్యాలు, వ్యాపార అవకాశాలు కూడా పెరగనున్నాయి. ఈ ఫ్లాట్లు కేవలం గృహావసరాలను తీర్చడమే కాకుండా, ఖమ్మం నగరానికి కొత్త విస్తరణా దిశలో ప్రోత్సాహకరంగా నిలుస్తాయని అధికారులు భావిస్తున్నారు.
