- ట్రిబుల్ ఆర్ నిర్మాణంలో ముందడుగు
- డిసెంబర్లో ఉత్తర భాగానికి టెండర్లు
- భారీగా పెరిగిన నిర్మాణ వ్యయం
హైదరాబాద్, మహా : తెలంగాణ రాష్ట్రాభివృద్ధిలో ప్రధాన పాత్ర పోషించనున్న రీజినల్ రింగ్ రోడ్డు (ఆర్ఆర్ఆర్) పనులకు సంబంధించి కీలకమైన అప్డేట్ వచ్చింది. ఆర్ఆర్ఆర్ పనులను ఉత్తర, దక్షిణ అంటూ రెండు భాగాలుగా విభజించి ముందుగా ఉత్తర భాగం పనులు పూర్తి చేయాలని నిర్ణయించారు. ఈ క్రమంలో నేషనల్ హైవేస్ అథారిటీ ఆఫ్ ఇండియా (ఎన్ హెచ్ఏఐ) ఆర్ఆర్ఆర్ ఉత్తర భాగం పనుల్లో వేగం పెంచేందుకు నిర్ణయం తీసుకుంది. ఆర్ఆర్ఆర్ ఉత్తర భాగం పనులకు కేంద్రం నుంచి అనుమతి రావడంతో.. టెండర్లను ఆహ్వానించేందుకు ఎన్హెచ్ఏఐ సిద్దమవుతోంది. డిసెంబర్, 2025లో ఈ టెండర్లు పిలవనున్నారు.
ఆర్ఆర్ఆర్ ఉత్తర భాగం సంగారెడ్డి జిల్లాలోని గిర్మాపూర్ గ్రామం నుంచి యాదాద్రి జిల్లాలో ఉన్న రాయగిరి వరకు ఉంది. అయితే తాజాగా తెలంగాణ ప్రభుత్వం ఆర్ఆర్ఆర్ రహదారి నిర్మాణాన్ని 4 లేన్ల నుంచి ఆరు లేన్లకు మారుస్తూ నిర్ణయం తీసుకోవడమే కాక ఆమోద ముద్ర కూడా వేసింది. దీంతో ఆర్ఆర్ఆర్ ఉత్తర భాగం అంచనా వ్యయం భారీగా పెరిగింది. దీని ప్రకారం.. ఆర్ఆర్ఆర్ ఉత్తర భాగంలో నిర్మించబోయే 161.5 కిలో మీటర్ల ఆరు లేన్ల రోడ్డు నిర్మాణం ఖర్చు ఇప్పుడు రూ. 15,627 కోట్లకు చేరింది. ఈపీసీ పద్ధతిలో టెండర్లు పిలవగా.. ఇప్పుడు హ్యామ్ మోడల్లో పనులు చేయనున్నారు.
4 నుంచి 6 లేన్లకు మార్పు
ఆర్ఆర్ఆర్ మొత్తం పొడవు 343.5 కిలోమీటర్లు. దీని కోసం రూ.36 వేల కోట్లు ఖర్చు అవుతుందని అంచనా వేశారు. అలానే ఈ రహదారి నిర్మాణాన్ని 2 భాగాలుగా విభజించారు. ఉత్తర భాగం 161.5 కిమీ కాగా దక్షిణ భాగం 182 కిలోమీటర్లుగా నిర్ణయించారు. ముందుగా ఉత్తర భాగం పనులు పూర్తి చేయాలని నిర్ణయించడమే కాక.. డీపీఆర్ కూడా సిద్ధం చేశారు. అయితే ముందుగా 4 లేన్లతో ఎక్స్ప్రెస్ హైవే నిర్మాణం చేపట్టాలని భావించారు. ఇందుకు మొత్తం రూ.7,104.06 కోట్లు ఖర్చు అవుతుందని అంచనా వేయడమే కాక గతేడాది అనగా 2024 డిసెంబర్లోనే టెండర్లు పిలిచారు. అయితే నగరంలో పెరుగుతున్న వాహన రద్దీని దృష్టిలో ఉంచుకొని ఆర్ఆర్ఆర్ రోడ్డును ఆరు లేన్లుగా మార్చుతూ తెలంగాణ ప్రభుత్వం నిర్ణయం తీసుకుంది. దీంతో నిర్మాణ వ్యయం కూడా భారీగా పెరిగింది. పెరిగిన అంచనాల ప్రకారం ఆర్ఆర్ఆర్ ఉత్తర భాగం రోడ్డు నిర్మాణానికి రూ.15,627 ఖర్చు చేయడానికి కేంద్ర, రాష్ట్ర ప్రభుత్వాలు ఆమోదం తెలిపాయి. ఆర్ఆర్ఆర్ ఉత్తర భాగం 161.5 కిలో మీటర్ల గ్రీన్ ఫీల్డ్ ఎక్స్ప్రెస్ రహదారిని.. హ్యామ్ పద్ధతిలో నిర్మించడానికి అధికారులు సిద్ధమయ్యారు. మొత్తం ఆరు ప్యాకేజీల్లో రోడ్డు నిర్మాణ పనులు చేపట్టనున్నారు. టెండర్ దక్కించుకున్న సంస్థ రెండున్నర సంవత్సరాల కాలంలో పనులు పూర్తి చేయాలి, అలానే 15 సంవత్సరాల పాటు రోడ్డు నిర్వహణ బాధ్యతలు చూసుకోవాల్సి ఉంటుంది.
