పొగాకుపై కేంద్రం ‘కఠిన’ పన్ను నిర్ణయం: జీఎస్టీ సెస్ స్థానంలో ఎక్సైజ్ డ్యూటీ పెంపు

పొగాకు ఉత్పత్తులపై కేంద్రం కఠిన నిర్ణయం.
* పార్లమెంటులో కొత్త పన్ను బిల్లులు.
* జీఎస్టీ సెస్ స్థానంలో ఎక్సైజ్ డ్యూటీ.
* సిగరెట్ల పరిమాణం ఆధారంగా డ్యూటీ పెంపు.
* సిగార్స్, పొగాకు రోల్స్‌పై పన్ను విలువపై 25% అధనం.
* లోక్‌సభ, రాజ్యసభ, రాష్ట్రపతి ఆమోదం.

న్యూఢిల్లీ , మహా.

కేంద్రంలోని మోడీ ప్రభుత్వం పొగాకు సంబంధిత ఉత్పత్తులపై కఠిన వైఖరిని అవలంబిస్తూ, వాటిపై కొత్త పన్ను విధానాన్ని అమలు చేసేందుకు సిద్ధమైంది. ఈ ఉద్దేశంతో సెంట్రల్ ఎక్సైజ్ అమెండ్‌మెంట్ బిల్ – 2025 మరియు ది హెల్త్ సెక్యూరిటీ నేషనల్ సెక్యూరిటీ సెస్ బిల్ 2025 అనే రెండు ముఖ్యమైన బిల్లులను లోక్‌సభలో ప్రవేశపెట్టింది. ప్రస్తుతం వీటిపై చర్చ జరుగుతోంది. ఈ బిల్లులు చట్ట రూపం దాల్చిన తర్వాత పొగాకు, సిగరెట్లు, పాన్ మసాలా వంటి ఉత్పత్తుల ధరలు గణనీయంగా పెరగనున్నాయి.

* బిల్లుల ప్రవేశపెట్టడం వెనుక ప్రధాన ఉద్దేశ్యం*

ఈ రెండు బిల్లులను ప్రవేశపెట్టడానికి కేంద్రం ప్రధానంగా రెండు కారణాలను పేర్కొంది. మొదటిది, ఇప్పటివరకు పొగాకు ఉత్పత్తులపై ఉన్న పన్ను భారాన్ని కొనసాగించడం. పొగాకు వినియోగాన్ని తగ్గించే లక్ష్యంతో ఈ పన్ను విధానాన్ని కొనసాగించనున్నారు. రెండవది, జీఎస్టీ కంపెన్సేషన్ సెస్ గడువు ముగియనున్న నేపథ్యంలో, ఆ ఆదాయ మార్గాన్ని కోల్పోకుండా ఉండేందుకు కొత్త పన్ను విధానాల ద్వారా ఆ భారాన్ని కొనసాగించాలని నిర్ణయించింది. ముఖ్యంగా, కేంద్ర ఎక్సైజ్ డ్యూటీ మరియు కొత్త సెస్ ద్వారా ఈ ఆదాయాన్ని సమకూర్చుకోవాలని ప్రభుత్వం భావిస్తోంది.

* కొత్త పన్నుల విధానం..ఎక్సైజ్ డ్యూటీ పెరుగుదల*

నూతన బిల్లుల ద్వారా ప్రస్తుతం అమలులో ఉన్న జీఎస్టీ కంపెన్సేషన్ సెస్ స్థానంలో ఎక్సైజ్ డ్యూటీని పెంచనున్నారు. ఈ పెంపుదల వలన గతంలో మాదిరిగానే పొగాకు, దాని ఉత్పత్తులపై ధరలు పెరగడానికి దారితీస్తుంది. ఈ పెంచిన ఎక్సైజ్ డ్యూటీతో పాటు, ఉత్పత్తులపై అదనంగా 40 శాతం జీఎస్టీ కూడా అమలులో ఉంటుంది. ఈ కొత్త విధానం తయారీ దశ నుంచే భారాన్ని మోపడం విశేషం.

వివిధ ఉత్పత్తులపై పన్ను విధానం వివరాలు

ముడి పొగాకు ఎండబెట్టిన పొగాకు, పొగాకు ఆకులు, ప్రాసెస్ చేయని పొగాకు, బీడీ లేదా గుట్కాలో వినియోగించే పొగాకు మిగులు చూర్ణంపై 60 శాతం నుండి 70 శాతం వరకూ కొత్త ఎక్సైజ్ డ్యూటీని విధిస్తారు. ఉదాహరణకు, ఒక తయారీదారు 100 విలువైన పొగాకు కొనుగోలు చేస్తే, అదనంగా 60 నుంచి 70 వరకు పన్ను చెల్లించాల్సి ఉంటుంది. తయారీదారుపై కొనుగోలు దశ నుంచే భారం పడుతుంది. సిగార్స్, పొగాకు రోల్స్: వీటి ఉత్పత్తి విలువపై 25 శాతం పన్ను , ప్రతి 1000 సిగార్లకు రూ.5000 చెల్లించాల్సి ఉంటుంది. ఈ రెండింటిలో ఏ మొత్తం ఎక్కువైతే దానిని పన్నుగా వసూలు చేస్తారు.
సిగరెట్లపై విధించే ఎక్సైజ్ పన్నును వాటి పరిమాణం (మిల్లీమీటర్లు) ఆధారంగా వర్గీకరించారు. తయారీదారులు ప్రతి 1000 సిగరెట్లకు ఒక నిర్దిష్ట మొత్తంలో ఎక్సైజ్ డ్యూటీని ప్రభుత్వానికి చెల్లించాలి.

* తదుపరి చర్యలు..చట్టంగా మారే ప్రక్రియ*

ఈ బిల్లులను లోక్‌సభలో ప్రవేశపెట్టిన తర్వాత ప్రస్తుతం వాటిపై చర్చ జరుగుతోంది. లోక్‌సభలో ఓటింగ్ పూర్తయిన తర్వాత, ఈ బిల్లులు రాజ్యసభకు పంపబడతాయి. అక్కడ కూడా చర్చ ముగిసి ఆమోదం లభించిన తర్వాత, తుది ఆమోదం కోసం రాష్ట్రపతి వద్దకు వెళ్తాయి. రాష్ట్రపతి ఆమోద ముద్ర పడిన వెంటనే ఈ రెండు బిల్లులు చట్టంగా మారి, పొగాకు ఉత్పత్తులపై కొత్త పన్ను విధానం దేశవ్యాప్తంగా అమలులోకి వస్తుంది.