- రిజర్వేషన్ల పిటిషన్పై నేడు హైకోర్టులో విచారణ
- జీవో 9 రద్దు కోరుతూ మాధవరెడ్డి పిటిషన్
హైదరాబాద్, మహా: బీసీ రిజర్వేషన్ల అంశంపై దాఖలైన కీలక పిటిషన్ను హైకోర్టు నేడు విచారించనుంది. మేడ్చల్ మల్కాజ్గిరి జిల్లాకు చెందిన మాధవరెడ్డి దాఖలు చేసిన ఈ పిటిషన్లో, బీసీలకు 42 శాతం రిజర్వేషన్లు కల్పిస్తూ ప్రభుత్వం జారీ చేసిన జీవో 9 రద్దు చేయాలని కోరారు. ఈ జీవో కారణంగానే గతంలో ఎంపీటీసీ, జడ్పీటీసీ ఎన్నికలపై హైకోర్టు స్టే విధించిన విషయం తెలిసిందే. ఒకవేళ ఎన్నికలు నిర్వహించాలంటే పాత రిజర్వేషన్ల (పాత కోటా) ప్రకారమే జరగాలని ధర్మాసనం అక్టోబర్ 10న జారీ చేసిన ఆదేశాలలో పేర్కొంది. ఈ నేపథ్యంలో, ప్రభుత్వ కౌంటర్ అఫిడవిట్ మరియు తదనంతర చర్యలపై న్యాయస్థానం నేటి విచారణలో దృష్టి సారించనుంది.
మరోవైపు, బీసీ రిజర్వేషన్లపై మంగళవారం నాడు హైకోర్టులో మరో పిటిషన్ దాఖలైంది. రాష్ట్ర బీసీ సంక్షేమ సంఘం అధ్యక్షుడు మేకపోతుల నరేందర్ గౌడ్ దాఖలు చేసిన ఈ పిటిషన్లో, పంచాయతీ ఎన్నికల్లో గతంలో ఉన్న 23 శాతం రిజర్వేషన్లను అమలు చేయకుండా కావాలనే తగ్గించడం ద్వారా ప్రభుత్వం బీసీలకు అన్యాయం చేసిందని ఆరోపించారు. వెంటనే విచారణ చేపట్టి బీసీలకు న్యాయబద్ధమైన రిజర్వేషన్లు కేటాయించాలని ఆయన కోర్టును అభ్యర్థించారు. ఈ రెండు ముఖ్యమైన పిటిషన్లపై హైకోర్టు నేడు ఎలాంటి నిర్ణయం తీసుకుంటుందోనని బీసీ వర్గాలు మరియు రాజకీయ వర్గాలు ఉత్కంఠగా ఎదురుచూస్తున్నాయి.
