* సముద్ర పక్షికి చైనా గుర్తులున్న పరికరం.
* తీరప్రాంతంలో భద్రతా బలగాల ముమ్మర తనిఖీలు!
* చైనా పర్యావరణ పరిశోధనలో భాగమే!
* నిఘా వర్గాల ప్రాథమిక విచారణలో వెల్లడి.
హైదరాబాద్, మహా.
కర్ణాటక రాష్ట్రంలోని కార్వార్ సమీపంలోని తీర ప్రాంతంలో ఒక సముద్ర పక్షి నీరసించి పడి ఉండటాన్ని స్థానికులు గుర్తించారు. దాని వీపుపై ఒక చిన్న యంత్రాన్ని, దానికి అమర్చిన తీగను చూసి వారు భయాందోళన వ్యక్తం చేశారు. దేశ రక్షణకు కీలకమైన నౌకాదళ కేంద్రం సమీపంలో ఇది దొరకడంతో, ఇది చైనా పంపిన నిఘా పక్షి ఏమో అన్న అనుమానాలు బలపడ్డాయి. వెంటనే అటవీ శాఖ, నిఘా సంస్థలు రంగంలోకి దిగి ఆ పక్షిని తమ ఆధీనంలోకి తీసుకున్నాయి. ఆ పరికరంపై చైనాకు చెందిన గుర్తులు ఉండటంతో అధికారులు దానిని నిశితంగా పరిశీలించారు.
ప్రాథమిక విచారణలో ఆ పరికరం చైనాకు చెందిన ‘పర్యావరణ శాస్త్ర పరిశోధనా కేంద్రం’ రూపొందించిన స్థాన గుర్తింపు పరికరం అని తేలింది. పక్షుల వలస మార్గాలను, అవి ప్రయాణించే ఎత్తును , మారుతున్న వాతావరణ పరిస్థితుల్లో వాటి జీవనశైలిని అధ్యయనం చేసే క్రమంలో భాగంగానే దీనిని అమర్చినట్లు అధికారులు గుర్తించారు. సేకరించిన సమాచారాన్ని విశ్లేషించగా, ఆ పక్షి ఆర్కిటిక్ ప్రాంతం నుండి బయలుదేరి హిమాలయాలను దాటుకుంటూ దాదాపు పదివేల కిలోమీటర్ల మేర ప్రయాణించి కర్ణాటక తీరానికి చేరుకున్నట్లు వెల్లడైంది. ఇది కేవలం శాస్త్రీయ పరిశోధనలో భాగమేనని నిఘా వర్గాలు నిర్ధారించాయి.
సాధారణంగా శీతాకాలంలో చైనా, రష్యా , సైబీరియా ప్రాంతాల నుండి వేల కిలోమీటర్లు ప్రయాణించి లక్షలాది పక్షులు భారత ఉపఖండానికి వస్తుంటాయి. వీటిని వలస పక్షులు అని పిలుస్తారు. అయితే, భారత్-చైనా మధ్య ఉన్న సరిహద్దు ఉద్రిక్తతల నేపథ్యంలో చైనాకు సంబంధించిన ఏ చిన్న ఎలక్ట్రానిక్ వస్తువు కనిపించినా భద్రతా దళాలు దానిని తీవ్రంగా పరిగణిస్తాయి. గతంలో కూడా సరిహద్దుల్లో ఇలాంటి వింత పరికరాలతో కూడిన పావురాలు పట్టుబడటంతో అధికారులు ఇప్పుడు అప్రమత్తంగా వ్యవహరించారు.
ప్రస్తుతానికి ఈ సముద్ర పక్షి వల్ల ఎలాంటి భద్రతా ముప్పు లేదని అధికారులు తేల్చారు. ఆ పక్షికి ఉన్న పరికరంలో ఎటువంటి శబ్ద లేదా దృశ్య రికార్డింగ్ చిప్పులు లేవని, కేవలం భౌగోళిక స్థానాన్ని తెలిపే వ్యవస్థ మాత్రమే ఉందని గుర్తించారు. అయినప్పటికీ, ఆ పరికరంలో నిక్షిప్తమైన సమాచారాన్ని నిఘా వర్గాలు మరింత లోతుగా విశ్లేషిస్తున్నాయి. ఆ పక్షికి తగిన చికిత్స అందించి, సురక్షిత ప్రాంతంలో విడిచిపెట్టాలని అటవీ శాఖ భావిస్తోంది. ఈ ఘటనతో తీర ప్రాంత భద్రతపై అధికారులు మరోసారి సమీక్ష నిర్వహించారు.
