మాతృమూర్తిని పొట్టనబెట్టుకున్న కసాయిలకు జైలు జీవితం… కన్నకూతురు కన్నీటి సాక్ష్యం…..

* కన్నకూతురు కన్నీటి సాక్ష్యం..
* కాలయముల్లాంటి మృగాళ్లకు యావజ్జీవ శిక్ష!
* తల్లిని తగులబెట్టిన రాక్షసులకు చుక్కలు చూపిన ఏడేళ్ల చిన్నారి పోరాటం.
* ఆ రాత్రి జరిగిన పాశవికానికి ముగింపు.
* సంభాల్ సామూహిక అత్యాచారం కేసులో సంచలన తీర్పు.
* మాతృమూర్తిని పొట్టనబెట్టుకున్న కసాయిలకు జైలు జీవితం.
* కామపిశాచుల దారుణానికి చారిత్రాత్మక శిక్ష.. సాక్ష్యంగా నిలిచిన ఆడియో రికార్డింగ్!

హైదరాబాద్, మహా.

ప్రేమ, అనురాగం, రక్షణ ఇవ్వాల్సిన మనుషులు మృగాలుగా మారితే ఎంతటి ఘోరాలు జరుగుతాయో చెప్పడానికి 2018 జూలై 13వ తేదీన ఉత్తరప్రదేశ్‌లోని సంభాల్ జిల్లా రాజ్ పురా పోలీస్ స్టేషన్ పరిధిలోని పాఠక్‌పూర్ గ్రామంలో జరిగిన ఘటన ఒక నిలువెత్తు నిదర్శనం. ఆ రోజు వరకు ఆ ఇల్లు ఒక సాదాసీదా పేద కూలి కుటుంబానికి నిలయం. యజమాని ఢిల్లీలో కాయకష్టం చేస్తూ కుటుంబాన్ని పోషిస్తుంటే, భార్య తన ఏడేళ్ల చిన్నారితో కలిసి గ్రామంలో నివసించేది. కానీ ఆ రాత్రి, ఆ పసిపాప జీవితంలో ఎన్నటికీ చెరిపివేయలేని ఒక కాళరాత్రిగా మారింది. మనుషుల రూపంలో ఉన్న ఐదుగురు రాక్షసులు ఆ ఇంట్లోకి చొరబడ్డారు. ఆ ముక్కుపచ్చలారని బిడ్డ కళ్ల ముందే, ప్రాణదాత అయిన తల్లిపై పైశాచికంగా సామూహిక అత్యాచారానికి ఒడిగట్టారు. కామంతో కళ్లు మూసుకుపోయిన ఆ మృగాళ్లకు, తమ ముందే ఏడుస్తున్న ఆ పసి ప్రాణం ఆవేదన వినిపించలేదు.
అఘాయిత్యం చేసిన తర్వాత ఆ కిరాతకుల మనసు కరగలేదు సదా, మరింత క్రూరంగా ఆలోచించారు. తమ పాపం ఎక్కడ బయటపడుతుందో అన్న భయంతో, ఆ బాధిత మహిళను ఈడ్చుకుంటూ సమీపంలోని ఒక దేవాలయ ఆవరణలోకి తీసుకెళ్లారు. అక్కడ వెలుగుతున్న అగ్నిగుండంలో ఆమెను సజీవంగా తోసేసి, ప్రాణాలతో ఉండగానే దహనం చేశారు. మంటల్లో కాలిపోతూ ఆ తల్లి పడ్డ నరకం, ఆమె వేసిన కేకలు ఆ రాత్రి నిశ్శబ్దాన్ని చీల్చేశాయి. ఆ సమయంలోనే ఆమె తన బంధువుకు ఫోన్ చేసి, తనపై జరుగుతున్న దాడిని, ప్రధాన నిందితుడి పేరును కన్నీళ్లతో వివరించింది. తాను మనిషిననే విషయాన్ని మరిచిపోయిన ఒక కిరాతకుడు, ఆమె ప్రాణాలను అగ్నిలో ఆహుతి చేస్తుంటే, ఆ పసిపాప మూగబోయి తన కన్నతల్లి మంటల్లో కలిసిపోవడాన్ని చూడాల్సి వచ్చింది.
ఈ కేసు విచారణలో ఆ ఏడేళ్ల బాలిక ధైర్యమే న్యాయదేవత కళ్లు తెరిపించింది. లోకం తెలియని వయసులో, తన కళ్ల ముందే తల్లిని కాల్చి చంపిన హంతకులను కోర్టులో వేలెత్తి చూపిన ఆ చిన్నారి సాక్ష్యం ఈ కేసులో అత్యంత కీలకంగా మారింది. ఒక పసి ప్రాణం తన తల్లికి న్యాయం చేయాలని ఆరేళ్ల పాటు చూపిన పట్టుదల మృగాళ్ల పాలిట యమపాశమైంది. ఆమె ఇచ్చిన వాగ్మూలంతో పాటు, బాధితురాలు ఆఖరి నిమిషంలో బంధువుతో మాట్లాడిన ఆడియో రికార్డింగ్, మరియు నిందితుల దుస్తులపై దొరికిన ఫోరెన్సిక్ ఆధారాలు న్యాయాన్ని బ్రతికించాయి. నిందితులు ఇది తప్పుడు కేసు అని ఎన్ని కుతంత్రాలు పన్నినప్పటికీ, ఆ చిన్నారి కన్నీటి సాక్ష్యం ముందు వారి పాపం నిలవలేకపోయింది.
సంభాల్ జిల్లాలోని ప్రత్యేక పోక్సో కోర్టు న్యాయమూర్తి అవధేష్ కుమార్ సింగ్ ఈ కేసులో నిందితులైన ఆరామ్ సింగ్, మహావీర్, జైవీర్ అలియాస్ గుల్లు, భోనా అలియాస్ కున్వర్ పాల్‌లను దోషులుగా నిర్ధారించి సంచలన తీర్పునిచ్చారు. వారికి జీవితాంతం జైలు గోడల మధ్యే గడపాలని ఆదేశిస్తూ జీవిత ఖైదు విధించారు. అలాగే ఒక్కొక్కరికి రూ. 1,12,000 చొప్పున భారీ జరిమానా కూడా విధించారు. నిందితుల్లో ఒకరు మైనర్ కావడంతో అతనిపై విచారణ వేరుగా జరుగుతోంది. ఈ తీర్పుతో ఆరేళ్ల సుదీర్ఘ నిరీక్షణకు తెరపడింది. కన్నతల్లిని అన్యాయంగా కోల్పోయిన ఆ బాలిక పోరాటం గెలిచింది. మాతృత్వానికి జరిగిన అవమానానికి కాలం తీర్చిన ఈ రుణం, సమాజంలో నేరగాళ్లకు ఒక హెచ్చరికగా మిగిలిపోతుంది.