- హైదరాబాద్ డ్రగ్స్ కేసు
- హైకోర్టును ఆశ్రయించిన హీరోయిన్ రకుల్ సోదరుడు
- తనపై నమోదైన ఎఫఅఐఆర్ ను కొట్టి వేయాలని పిటిషన్ దాఖలు
హైదరాబాద్, మహా : హైదరాబాద్ డ్రగ్స్ కేసు వ్యవహారం సినీ రాజకీయ వర్గాల్లో మరోసారి తీవ్ర చర్చనీయాంశంగా మారింది. ఈ కేసులో ఆరోపణలు ఎదుర్కొంటున్న సినీ నటి రకుల్ ప్రీత్ సింగ్ సోదరుడు అమన్ ప్రీత్ సింగ్ తనపై నమోదైన ఎఫ్ఐఆర్ ను కొట్టివేయాలంటూ తెలంగాణ హైకోర్టును ఆశ్రయించారు. డ్రగ్స్ ముఠాలతో తనకు ఎలాంటి సంబంధం లేదని.. ఈ కేసులో తనను అన్యాయంగా ఇరికించారని ఆయన తన పిటిషన్లో పేర్కొన్నారు. గత నెల 19న హైదరాబాద్లోని బంజారాహిల్స్ సమీపంలో పోలీసులు నిర్వహించిన ఆకస్మిక దాడుల్లో భారీగా మాదకద్రవ్యాలు పట్టుబడ్డాయి. ఈగల్ టీం, మాసబ్ట్యాంక్ పోలీసులు సంయుక్తంగా చేపట్టిన ఈ ఆపరేషన్లో డ్రగ్స్ సరఫరా చేస్తున్న నితిన్ సింఘానియా, షర్నిక్ సంఘీలను రెడ్ హ్యాండెడ్గా పట్టుకున్నారు. వారి వద్ద నుండి దాదాపు 43.7 గ్రాముల కొకైన్, 11.5 గ్రాముల ఎండీఎంఏను స్వాధీనం చేసుకున్నారు. వీరిని విచారించగా విస్తుపోయే నిజాలు వెలుగులోకి వచ్చాయి.
పోలీసుల దర్యాప్తులో నిందితుల సెల్ఫోన్లను విశ్లేషించగా అమన్ ప్రీత్ సింగ్ పేరు ప్రముఖంగా వినిపించింది. అమన్ కేవలం డ్రగ్స్ వినియోగదారుడు మాత్రమే కాదని అంతర్రాష్ట్ర డ్రగ్స్ ముఠాలతో ఆయనకు సంబంధాలు ఉన్నాయని పోలీసులు అనుమానిస్తున్నారు. గత నెల రోజుల్లోనే ఆయన సుమారు ఆరుసార్లు నిందితుల వద్ద నుండి డ్రగ్స్ కొనుగోలు చేసినట్లు డిజిటల్ ఆధారాల ద్వారా నిర్ధారణకు వచ్చారు. దీంతో ఈ కేసులో అమన్ను ఏ 7 గా చేర్చి, ఆయన కోసం పోలీసులు గాలింపు చర్యలు ముమ్మరం చేశారు. ఈ నేపథ్యంలో అమన్ ప్రీత్ సింగ్ ముందస్తు జాగ్రత్తగా హైకోర్టును ఆశ్రయించారు. తనపై నమోదైన కేసులో ఆధారాలు లేవని, చట్టబద్ధంగా ఆ ఎఫ్ఐఆర్ను క్వాష్ చేయాలని కోరారు. అయితే ప్రాథమిక ఆధారాలు బలంగా ఉన్నాయని పోలీసులు భావిస్తున్నారు. ఈ పిటిషన్పై మంగళవారం విచారణ చేపట్టిన ధర్మాసనం, తదుపరి విచారణను ఈ నెల 9వ తేదీకి వాయిదా వేసింది. ఈలోగా పోలీసులు మరిన్ని ఆధారాలను కోర్టు ముందు ఉంచే అవకాశం ఉంది. హైదరాబాద్ నగరంలో డ్రగ్స్ సంస్కృతిని నిర్మూలించేందుకు పోలీసులు కఠిన చర్యలు తీసుకుంటున్న తరుణంలో, సెలబ్రిటీల కుటుంబ సభ్యుల పేర్లు బయటకు రావడం సంచలనం కలిగిస్తోంది. ఈ నెల 9న హైకోర్టు ఇచ్చే తీర్పుపై అమన్ ప్రీత్ సింగ్ భవిష్యత్తు ఆధారపడి ఉంది.
