- మావోయిస్టులతో లింకులు
- గాదె ఇన్నయ్య ఇల్లు, అనాథాశ్రమంలో ఎన్ఐఏ సోదాలు
- కొన్ని నెలల క్రితం కూడా సోదాలు జరిపిన ఎన్ఐఏ
జనగామ, మహా : మావోయిస్టులతో సంబంధాలు ఉన్నాయనే అనుమానంతో జాతీయ దర్యాప్తు సంస్థ (ఎన్ఐఏ) అధికారులు మంగళవారం ఉదయం నుంచే ఆంధ్రప్రదేశ్, తెలంగాణలోని పలు ప్రాంతాల్లో ఏకకాలంలో సోదాలు నిర్వహించారు. కుషాయిగూడ పరిధిలోని చక్రిపురంలో ఉన్న సామాజిక కార్యకర్త గాదె ఇన్నయ్య నివాసం, జనగామలో ఆయన నిర్వహిస్తున్న అనాథాశ్రమంలో అధికారులు తనిఖీలు చేపట్టారు. గతంలో నమోదైన ఒక పాత కేసు (ముఖ్యంగా చత్తీస్గఢ్ మావోయిస్టు లింకులు) ఆధారంగా ఈ సోదాలు జరిగినట్లు తెలుస్తోంది. మావోయిస్టులకు నిధుల సేకరణ, రిక్రూట్మెంట్, సానుభూతిపరులుగా వ్యవహరిస్తున్నారనే ఆరోపణలపై ఎన్ఐఏ దృష్టి సారించింది.
ఉదయం నుంచే తెలుగు రాష్ట్రాల్లో పలుచోట్ల సోదాలు..
గాదె ఇన్నయ్య నివాసంలో తెల్లవారుజాము నుంచే అధికారులు సోదాలు చేపట్టారు. ఇన్నయ్య ఇంటిని చుట్టుముట్టి ఆయన గదిలోని డైరీలు, ఫోన్ కాల్ డేటా, కంప్యూటర్ హార్డ్ డిస్క్లను పరిశీలించారు. ఇన్నయ్య నిర్వహిస్తున్న అనాథాశ్రమంలో కూడా సోదాలు జరిగాయి. అక్కడ ఎవరెవరు ఉంటున్నారు? ఆశ్రమానికి వస్తున్న నిధుల మూలాలు ఏమిటి? అనే కోణంలో అధికారులు ఆరా తీశారు. సోదాల అనంతరం కొన్ని కీలక పత్రాలు, పెన్ డ్రైవ్లు మరియు ఎలక్ట్రానిక్ పరికరాలను అధికారులు స్వాధీనం చేసుకున్నట్లు సమాచారం.
ఇతర ప్రాంతాల్లో సోదాలు
కేవలం గాదె ఇన్నయ్య ఇంట్లోనే కాకుండా, హైదరాబాద్లోని చిక్కడపల్లి, పాతబస్తీతో పాటు ఏపీలోని నెల్లూరు, అన్నమయ్య జిల్లాల్లోని ప్రజా సంఘాల నేతల ఇళ్లపై కూడా ఎన్ఐఏ దాడులు నిర్వహించింది. పౌర హక్కుల సంఘం నాయకులు, విరసం సభ్యుల ఇళ్లలో కూడా తనిఖీలు కొనసాగాయి.
ఈ సోదాలపై గాదె ఇన్నయ్య మీడియాతో మాట్లాడుతూ, తమపై ఉద్దేశపూర్వకంగానే తప్పుడు కేసులు పెడుతున్నారని, తాము కేవలం ప్రజా సమస్యలపై మాత్రమే పోరాడుతున్నామని పేర్కొన్నారు. ఎన్ఐఏ తదుపరి విచారణ నిమిత్తం కొందరికి నోటీసులు జారీ చేసే అవకాశం ఉంది.
