న్యాయవ్యవస్థపైనే దాడి: చేవెళ్లలో లేడీ అడ్వకేట్ స్వప్న దారుణ హత్య.. ‘అడ్వకేట్ ప్రొటెక్షన్ యాక్ట్’ తేవాలని న్యాయవాదుల డిమాండ్!

చెవెళ్ల – ఆర్‌.ఆర్‌. జిల్లా
చెవెళ్ల, ఆర్‌.ఆర్‌. జిల్లాకు చెందిన యువ లేడీ అడ్వకేట్ స్వప్నపై ఈ రోజు జరిగిన అత్యంత అమానుషమైన, క్రూరమైన దాడి ఘటనను విని న్యాయవాద వర్గం తీవ్ర షాక్‌కు, తీవ్ర వేదనకు గురైంది. ఈ దారుణ ఘటన పట్ల అడ్వకేట్ కమ్యూనిటీ తీవ్ర ఆవేదన వ్యక్తం చేస్తోంది.
న్యాయ వృత్తికి చెందిన వ్యక్తిపై జరిగిన ఈ హింసాత్మక దాడి న్యాయవృత్తి గౌరవంపై జరిగిన ప్రత్యక్ష దాడి, అంతేకాదు న్యాయం అందించే వ్యవస్థ యొక్క మూలాధారాలపై జరిగిన దాడిగా మేము భావిస్తున్నాం. న్యాయవాదులు న్యాయ పరిపాలనలో కీలక పాత్ర పోషిస్తారు. అలాంటి న్యాయవాదులపై దాడులు, బెదిరింపులు ఏ పరిస్థితుల్లోనూ సహించబోమని స్పష్టం చేస్తున్నాం.
ఈ ఘటనకు సంబంధించి ప్రాథమిక సమాచారం ప్రకారం కుటుంబ కలహాలు, భూమి సంబంధిత వివాదాలు కూడా కారణాలుగా ఉండవచ్చని భావిస్తున్నారు. అయితే వాస్తవాలు పూర్తిగా వెలుగులోకి రావాలంటే పోలీసులు సంపూర్ణ, పారదర్శకమైన దర్యాప్తు జరిపి నిజాలను ప్రజల ముందుకు తీసుకురావాల్సిన అవసరం ఉంది.
ఈ సంఘటనలో మృతిచెందిన లేడీ అడ్వకేట్ స్వప్న కుటుంబ సభ్యులకు న్యాయవాద వర్గం తరఫున హృదయపూర్వక సానుభూతి, ప్రగాఢ సంతాపం తెలియజేస్తోంది.
ఈ ఘటన న్యాయవాదుల భద్రత ఎంత అసురక్షితంగా మారిందో మరోసారి స్పష్టంగా చూపిస్తోంది. కావున ప్రభుత్వం తక్షణమే స్పందించి
ఈ ఘటనకు బాధ్యులైన నిందితులను వెంటనే అరెస్టు చేసి కఠినంగా శిక్షించాలి
న్యాయవాదుల ప్రాణాలు, గౌరవాన్ని కాపాడేందుకు Advocate Protection Act ను వెంటనే అమలు చేయాలి
న్యాయవాదులు భయం లేకుండా విధులు నిర్వర్తించలేని పరిస్థితి ఉంటే న్యాయం నిలబడదు, ప్రజాస్వామ్యం నిలబడదు.
ఇది ఒక్క న్యాయవాదిపై జరిగిన దాడి కాదు…
ఇది న్యాయవ్యవస్థపై జరిగిన దాడి.