* తెలంగాణ బడ్జెట్పై బండి సంజయ్ నిప్పులు.
* అంకెల గారడీతో ప్రజలను వంచిస్తున్నారు.
* రైతు భరోసా ఒక మోసం.. ఆరు గ్యారంటీల మాటేమిటి?
* కేంద్ర మంత్రి బండి సంజయ్ ప్రశ్నల వర్షం
* బడ్జెట్ వైఫల్యాలపై బండి సంజయ్ ఫైర్.
హైదరాబాద్, మహా.
తెలంగాణ రాష్ట్ర ప్రభుత్వం ప్రవేశపెట్టిన తాజా బడ్జెట్పై భారతీయ జనతా పార్టీ అగ్రనేత, కేంద్ర మంత్రి బండి సంజయ్ కుమార్ తీవ్రస్థాయిలో విరుచుకుపడ్డారు. కరీంనగర్ వేదికగా ఆయన రాష్ట్ర ప్రభుత్వ తీరును ఎండగడుతూ సంచలన వ్యాఖ్యలు చేశారు. ప్రస్తుత కాంగ్రెస్ ప్రభుత్వం అనుసరిస్తున్న ఆర్థిక విధానాలు చూస్తుంటే, తెలంగాణ రాష్ట్రం భవిష్యత్తులో మరో శ్రీలంకలా మారబోతోందా అనే భయం కలుగుతోందని ఆయన ఆందోళన వ్యక్తం చేశారు. కేవలం అంకెల గారడీతో, ఆర్భాటపు ప్రకటనలతో ప్రజలను మోసం చేయడమే తప్ప, ఈ బడ్జెట్లో సామాన్యుడికి ఒరిగేదేమీ లేదని ఆయన కొట్టిపారేశారు.
ముఖ్యంగా రాష్ట్రంలో అమలు చేస్తున్న సంక్షేమ పథకాలు, రైతు సంక్షేమంపై ప్రభుత్వం అనుసరిస్తున్న వైఖరిని బండి సంజయ్ తీవ్రంగా తప్పుబట్టారు. కాంగ్రెస్ పార్టీ పాలన ప్రజల చేతికి చిప్ప ఇచ్చేలా ఉందని, ఇది తెలంగాణ ఆత్మగౌరవానికి దెబ్బ అని ఆయన విమర్శించారు. మనది బిచ్చపు బతుకులేనా? అంటూ భావోద్వేగపూరిత ప్రశ్నను సంధించిన ఆయన, ఇప్పుడు తెలంగాణ సమాజం మేల్కొనాల్సిన సమయం ఆసన్నమైందని పిలుపునిచ్చారు. ఈ బడ్జెట్ కేటాయింపులన్నీ ప్రగల్భాలకే పరిమితమని, ఆచరణలో శూన్యమని ఆయన ఎద్దేవా చేశారు.
రైతు భరోసా పథకం విషయంలో ముఖ్యమంత్రి రైతులను అమాయకులను చేస్తున్నారని బండి సంజయ్ ఆరోపించారు. కేవలం పద్దెనిమిది వేల కోట్ల రూపాయలు మాత్రమే కేటాయించి, రైతులకు అన్యాయం చేస్తున్నారని మండిపడ్డారు. ఆరు వాయిదాల్లో ఇవ్వాల్సిన నిధులను కేవలం నాలుగు వాయిదాలకే పరిమితం చేసి, మిగిలిన రెండు వాయిదాలను ఎగ్గొట్టేందుకు ప్రభుత్వం ముందస్తు ప్రణాళికలు సిద్ధం చేసిందని ఆయన విమర్శించారు. ఒకసారి నిధులు ఇచ్చి, పాతది ఇవ్వక, వచ్చేది ఇవ్వక రైతులను అయోమయానికి గురిచేస్తూ, చివరకు “దుకాణం బంద్” అనే రీతిలో ముఖ్యమంత్రి వ్యవహరిస్తున్నారని ధ్వజమెత్తారు. రైతు కూలీలకు ఏటా 12 వేల రూపాయలు ఇస్తామని ఇచ్చిన హామీ ఏమైందని ఆయన నిలదీశారు.
గత బీఆర్ఎస్ ప్రభుత్వం చేసిన 8 లక్షల కోట్ల అప్పుల గురించి పదే పదే మాట్లాడుతున్న ముఖ్యమంత్రి, తాను అధికారంలోకి వచ్చిన తర్వాత మళ్ళీ లక్ష కోట్ల రూపాయల అప్పు చేసేందుకు సిద్ధమవ్వడం హాస్యాస్పదమని బండి సంజయ్ పేర్కొన్నారు. ఆరు గ్యారంటీల పేరుతో ప్రజలను నమ్మించి, ఇప్పుడు వాటిని గాలికొదిలేశారని విమర్శించారు. బీఆర్ఎస్ హయాంలో ప్రజలకు ఏమీ అందలేదని అసెంబ్లీ సాక్షిగా గొప్పలు చెప్పిన ముఖ్యమంత్రి, ఇప్పుడు తానూ అదే బాటలో నడుస్తూ ప్రజలకు గడ్డి గుడ్డు చూపించారని ఆయన ఘాటైన వ్యాఖ్యలు చేశారు. ప్రభుత్వ వైఫల్యాలను ఎండగడుతూ తెలంగాణ ప్రజల పక్షాన పోరాటం కొనసాగిస్తామని బండి సంజయ్ స్పష్టం చేశారు.
