మొయినాబాద్ ఫామ్హౌస్ డ్రగ్స్ కేసులో పెను సంచలనం.
* సాఫ్ట్వేర్ ఇంజనీర్ కమ్ డ్రగ్ పెడ్లర్ అభిషేక్ సింగ్ అరెస్ట్.
హైదరాబాద్, మహా.
తెలంగాణ రాష్ట్ర వ్యాప్తంగా తీవ్ర కలకలం రేపుతున్న బీఆర్ఎస్ మాజీ ఎమ్మెల్యే పైలట్ రోహిత్ రెడ్డి మొయినాబాద్ ఫామ్హౌస్ డ్రగ్స్ వ్యవహారం రోజుకో కీలక మలుపు తిరుగుతోంది. ఈ కేసును ప్రతిష్టాత్మకంగా తీసుకున్న ప్రభుత్వం ఏకంగా 9 మంది అధికారులతో కూడిన ప్రత్యేక దర్యాప్తు బృందాన్ని (సిట్) రంగంలోకి దించడంతో విచారణ వేగవంతమైంది. తాజాగా ఈ డ్రగ్స్ పార్టీకి కొకైన్ సరఫరా చేసిన ప్రధాన నిందితుడు, సాఫ్ట్వేర్ ఇంజనీర్ అభిషేక్ సింగ్ను సిట్ అధికారులు అదుపులోకి తీసుకోవడంతో కేసులో విస్తుపోయే నిజాలు వెలుగులోకి వచ్చాయి.
**సిమ్లా కథ కట్టుకథే.. అసలు జరిగింది ఇదే!**
తొలుత పోలీసుల విచారణలో నిందితులు డ్రగ్స్ను సిమ్లాలో ఉన్న ఓ పరిచయస్తుడి ద్వారా తీసుకువచ్చినట్లు బుకాయించారు. అయితే, నిందితులను తమదైన శైలిలో సిట్ అధికారులు విచారించడంతో అసలు నిజాలు బయటపడ్డాయి. సిమ్లా కథ అంతా కట్టుకథ అని, డ్రగ్స్ను హైదరాబాద్లోనే కొనుగోలు చేసినట్లు తేలింది. సాఫ్ట్వేర్ ఉద్యోగిగా ఉంటూ డ్రగ్స్ దందా నడుపుతున్న అభిషేక్ సింగ్ వద్ద.. రోహిత్ రెడ్డి డ్రైవర్, వ్యక్తిగత సహాయకుడు అయిన శరత్ ఈ కొకైన్ను కొనుగోలు చేశాడు. హైదరాబాద్ ఔటర్ రింగ్ రోడ్డు వద్ద ఈ లావాదేవీలు జరిగినట్లు సిట్ గుర్తించింది. గతంలో సుమారు 24 సార్లు అభిషేక్ సింగ్ ద్వారానే రోహిత్ రెడ్డి బృందానికి డ్రగ్స్ సరఫరా జరిగినట్లు విచారణలో వెల్లడవ్వడం ఈ కేసు తీవ్రతను తెలియజేస్తోంది.
**సెల్ ఫోన్ డేటాపై సిట్ ఫోకస్.. వణుకుతున్న బడాబాబులు**
అభిషేక్ సింగ్ అరెస్ట్తో హైదరాబాద్ డ్రగ్స్ నెట్వర్క్లో బడాబాబుల గుండెల్లో రైళ్లు పరిగెడుతున్నాయి. ప్రస్తుతం సిట్ అధికారులు అభిషేక్ సింగ్ సెల్ఫోన్ డేటాను అత్యంత నిశితంగా విశ్లేషిస్తున్నారు. అతడి కాల్ డేటా, వాట్సాప్ చాట్స్, కాంటాక్ట్ లిస్ట్ ఆధారంగా అభిషేక్ నుంచి ఇంకా ఎవరెవరు డ్రగ్స్ కొనుగోలు చేశారు? ఈ వ్యవహారంలో టాలీవుడ్ సినీ ప్రముఖులు, ఇతర రాజకీయ నాయకులు, బడా వ్యాపారవేత్తల ప్రమేయం ఏమైనా ఉందా? అన్న కోణంలో కూపీ లాగుతున్నారు. ప్రధానంగా దుబాయ్కి చెందిన రియల్ ఎస్టేట్ లావాదేవీలు, గతంలో అనుమానాస్పదంగా మరణించిన టాలీవుడ్ నిర్మాత కేదార్తో వీరికి ఉన్న పాత సంబంధాలపైనా లోతైన దర్యాప్తు కొనసాగుతోంది.
**స్విమ్మింగ్ పూల్ నీటి నమూనాలు, కాల్పుల కలకలం**
ఫామ్హౌస్పై పోలీసులు దాడి చేసిన సమయంలో అక్కడ ఉన్న వ్యాపారవేత్త నమిత్ శర్మ పోలీసులను భయపెట్టేందుకు గాలిలోకి కాల్పులు జరిపిన సంగతి తెలిసిందే. ఆ గందరగోళంలో సాక్ష్యాలను మాయం చేసేందుకు నిందితులు డ్రగ్స్ను అక్కడే ఉన్న స్విమ్మింగ్ పూల్లో పడేసి ఉంటారనే అనుమానంతో అధికారులు ఆ నీటి నమూనాలను కూడా సేకరించి ల్యాబ్కు పంపారు. కాల్పులు జరిపిన నమిత్ శర్మతో పాటు రోహిత్ రెడ్డి సోదరుడు రితేష్ రెడ్డిలపై హత్యాయత్నం కింద, ఆయుధ చట్టం కింద కేసులు కూడా నమోదయ్యాయి. ఈ పార్టీలో ఏపీకి చెందిన ఓ ఎంపీ సైతం పాల్గొనడం అప్పట్లో రాజకీయ ప్రకంపనలు సృష్టించింది. కేవలం బడాబాబులనే కాకుండా, డ్రగ్స్ పార్టీ కోసం నాటుకోళ్లు సరఫరా చేసిన స్థానిక వ్యాపారి రమేష్ను సైతం అధికారులు విచారణ నిమిత్తం అరెస్ట్ చేశారు.
**మున్ముందు మరిన్ని కీలక పరిణామాలు**
ప్రస్తుతం చంచల్గూడ జైలులో రిమాండ్లో ఉన్న ప్రధాన నిందితుడు పైలట్ రోహిత్ రెడ్డి, నమిత్ శర్మ తదితరులను కస్టడీకి తీసుకుని మరింత లోతుగా విచారించేందుకు సిట్ సిద్ధమవుతోంది. కోర్టు అనుమతితో కస్టడీకి తీసుకున్న అనంతరం డ్రగ్ సప్లయర్ అభిషేక్ సింగ్ను, ఇతర నిందితులను ఎదురెదురుగా కూర్చోబెట్టి ప్రశ్నిస్తే మరింత కీలక సమాచారం బయటకు వస్తుందని దర్యాప్తు అధికారులు భావిస్తున్నారు. ఫామ్ హౌస్ చుట్టుపక్కల ఉన్న దాదాపు 100 సీసీ కెమెరాల ఫుటేజీలను సైతం సిట్ బృందం జల్లెడ పడుతోంది.
