* మియాపూర్లో నెత్తురోడిన ఉన్మాదం..
* మరో వ్యక్తిని పెళ్లి చేసుకుందని మహిళపై వంటమనిషి కత్తిపోట్లు.
* భర్తను వదిలేసి రావాలని గొడవపడి, ఆపై దాడి.
* దాడి చేసిన యువకుడు, ఇద్దరి అరెస్టు
హైదరాబాద్, మహా.
హైదరాబాద్ నగరంలోని మియాపూర్ ప్రాంతంలో ఓ దారుణ ఘటన చోటుచేసుకుంది. తనను కాదని మరో వ్యక్తిని పెళ్లి చేసుకుందన్న తీవ్రమైన కక్షతో ఓ మహిళపై ఓ యువకుడు కత్తితో దాడి చేసి కిరాతకానికి పాల్పడ్డాడు. ఈ ఘటన స్థానికంగా తీవ్ర కలకలం రేపింది. బతుకుదెరువు కోసం నగరానికి వచ్చిన ఓ మహిళపై జరిగిన ఈ దాడికి సంబంధించిన పూర్తి వివరాలు ఈ విధంగా ఉన్నాయి.
కాకినాడకు చెందిన నూకరత్నం అనే మహిళ ఉపాధి కోసం కొన్ని నెలల క్రితం నగరానికి వచ్చి మియాపూర్ పరిధిలోని రెడ్డి కాలనీలో నివాసం ఉంటోంది. స్థానికంగా ఓ చోట ఆమె హౌస్కీపింగ్ ఉద్యోగం చేస్తూ జీవనం సాగిస్తోంది. గతంలోనే భర్తను కోల్పోయిన ఆమెకు ఇద్దరు కుమార్తెలు ఉన్నారు. ఒంటరిగా జీవిస్తున్న ఆమె, తన భవిష్యత్తుకు ఒక తోడు కావాలనే ఉద్దేశ్యంతో గత నెల 20వ తేదీన ప్రసాద్ అనే వ్యక్తిని రెండో వివాహం చేసుకుంది.
అయితే, నూకరత్నం పనిచేసే చోటే ఆలీషా అలియాస్ పాండు అనే యువకుడు వంటమనిషిగా పనిచేస్తున్నాడు. నూకరత్నంతో పరిచయం పెంచుకున్న ఆలీషా.. ఆమెపై ఇష్టం పెంచుకున్నాడు. తనకు ఎలాంటి సమాచారం ఇవ్వకుండా, తనను కాదని నూకరత్నం ప్రసాద్ను పెళ్లి చేసుకోవడాన్ని ఆలీషా జీర్ణించుకోలేకపోయాడు. ఆమె తనకే దక్కాలని, వేరొకరితో జీవితాన్ని పంచుకోవడాన్ని సహించలేక ఆమెపై తీవ్ర స్థాయిలో కక్ష పెంచుకున్నాడు. ఎలాగైనా ఆమెపై ప్రతీకారం తీర్చుకోవాలని పథకం పన్నాడు.
ఈ క్రమంలో ఈ నెల 19వ తేదీన ఆలీషా.. తన తండ్రి లాలూ, స్నేహితుడు జాన్తో కలిసి నేరుగా నూకరత్నం ఉంటున్న ఇంటికి వెళ్లాడు. వివాహం చేసుకున్న భర్తను వదిలేసి తన వెంటనే రావాలని ఆమెతో వాగ్వాదానికి దిగాడు. అందుకు ఆమె ససేమిరా అనడంతో పాటు తీవ్రంగా నిరాకరించడంతో ఆలీషా కోపంతో రగిలిపోయాడు. తన వెంట రాకపోతే ఎవరికీ దక్కకూడదనే ఉన్మాదంతో తన వెంట ముందుగానే తెచ్చుకున్న కత్తితో నూకరత్నంపై విచక్షణారహితంగా దాడికి తెగబడ్డాడు.
ఈ హఠాత్పరిణామంతో స్థానికులు ఒక్కసారిగా ఉలిక్కిపడ్డారు. ఈ దాడిలో నూకరత్నంకు తీవ్ర గాయాలు కాగా, రక్తపు మడుగులో పడివున్న ఆమెను స్థానికులు వెంటనే స్పందించి చికిత్స నిమిత్తం సమీపంలోని ఆసుపత్రికి తరలించారు. ప్రస్తుతం ఆమెకు అత్యవసర చికిత్స కొనసాగుతోంది. ఈ ఘటనపై సమాచారం అందుకున్న పోలీసులు వెంటనే ఘటనా స్థలానికి చేరుకుని కేసు నమోదు చేసి దర్యాప్తు ప్రారంభించారు. ఈ దాడికి పాల్పడిన ప్రధాన నిందితుడు ఆలీషా అలియాస్ పాండుతో పాటు అతనికి సహకరించిన తండ్రి లాలూను పోలీసులు ఇప్పటికే అరెస్ట్ చేశారు. ఈ దారుణానికి సహకరించిన పరారీలో ఉన్న మరో నిందితుడు జాన్ కోసం పోలీసులు గాలింపు చర్యలు ముమ్మరం చేశారు.
