- ఈసీ లేఖపై కమలం ముద్ర!
- కేరళలో రేగిన రాజకీయ దుమారం..
- ఎన్నికల సంఘం, భాజపా ఒక్కటేనంటూ సీపీఎం ధ్వజం..
- సిబ్బంది పొరపాటేనని వివరణ ఇచ్చిన సీఈవో.
హైదరాబాద్, మహా.
భారత ఎన్నికల సంఘం (ఈసీ) రాజకీయ పార్టీలకు పంపిన ఓ అధికారిక లేఖపై ఏకంగా భారతీయ జనతా పార్టీ (భాజపా) కేరళ శాఖకు చెందిన సీలు ఉండటం రాష్ట్ర రాజకీయాల్లో పెను దుమారానికి దారితీసింది. ఎన్నికల సంఘం నిష్పాక్షికతపై విపక్షాలు తీవ్ర స్థాయిలో ప్రశ్నల వర్షం కురిపించాయి. ఈసీకి, భాజపాకు మధ్య ఏదో రహస్య బంధం ఉందని, రెండు వ్యవస్థలూ ఒకే కేంద్రం నుంచి నియంత్రించబడుతున్నాయని వామపక్ష పార్టీ సీపీఐ(ఎం) ఆరోపించింది. వివాదం ముదరడంతో స్పందించిన ఎన్నికల సంఘం.. ఇది కేవలం క్లరికల్ (సిబ్బంది) పొరపాటు మాత్రమేనని, ఆ తప్పును ఇప్పటికే సరిదిద్దామని సోమవారం అధికారికంగా వివరణ ఇచ్చుకుంది.
**సిబ్బంది అజాగ్రత్తే కారణం: సీఈవో కేల్కర్*
ఈ వివాదంపై కేరళ ప్రధాన ఎన్నికల అధికారి (సీఈవో) రతన్ యు కేల్కర్ ఒక పత్రికా ప్రకటన విడుదల చేశారు. పార్టీ సీలు పడటం అనేది పూర్తిగా సిబ్బంది అజాగ్రత్త, పొరపాటు వల్ల జరిగిందేనని ఆయన స్పష్టం చేశారు. అభ్యర్థుల నేర చరిత్రకు సంబంధించి 2019 నాటి మార్గదర్శకాలపై వివరణ కోరుతూ కేరళ భాజపా యూనిట్ ఇటీవల తమ కార్యాలయాన్ని సంప్రదించిందని, ఆ సమయంలో భాజపా సమర్పించిన పత్రంపై ఆ పార్టీ అధికారిక సీలు ఉందని వివరించారు. సిబ్బంది అజాగ్రత్త వల్ల, ఒరిజినల్ అధికారిక ప్రతికి బదులుగా పొరపాటున భాజపా స్టాంప్ ఉన్న కాపీనే ఇతర రాజకీయ పార్టీలకు పంపడం జరిగిందని కేల్కర్ తెలిపారు. ఈ క్లెరికల్ పొరపాటును గుర్తించిన వెంటనే, డిప్యూటీ చీఫ్ ఎలక్టోరల్ ఆఫీసర్ మార్చి 21న ఓ నోటీసు జారీ చేసి సదరు పత్రాన్ని ఉపసంహరించుకున్నారని వెల్లడించారు. ఈ విషయాన్ని అన్ని రాజకీయ పార్టీలు, జిల్లా ఎన్నికల అధికారులు, రిటర్నింగ్ అధికారులకు సైతం తెలియజేశామన్నారు. ఎన్నికల ప్రక్రియలో ఎలాంటి బాహ్య శక్తుల జోక్యం లేకుండా కమిషన్ పటిష్టమైన వ్యవస్థను నిర్వహిస్తోందని, తప్పుదోవ పట్టించే సమాచారాన్ని ప్రచారం చేయవద్దని ఆయన కోరారు. ఈ ఘటనపై విచారణ పూర్తయ్యే వరకు, ఆ ఫైలును పర్యవేక్షించిన అసిస్టెంట్ సెక్షన్ ఆఫీసర్ను సస్పెండ్ చేసినట్లు కేల్కర్ ప్రకటించారు.
**ఏ బటన్ నొక్కినా కమలమేనా?: సీపీఎం**
ఈ లేఖ వ్యవహారంపై అధికార సీపీఐ(ఎం) తన అధికారిక ‘ఎక్స్’ (ట్విట్టర్) ఖాతాలో తీవ్ర విమర్శలు గుప్పించింది. “భాజపా తన ముసుగులన్నీ తొలగించిందా? భారత ఎన్నికల సంఘం, భాజపా రెండూ ఒకే కేంద్రం నుంచి నడుస్తున్నాయనేది బహిరంగ రహస్యమే. కనీసం రెండు వేర్వేరు డెస్క్లు ఉన్నాయనే మర్యాదనైనా పాటించండి. ఇప్పుడు అది కూడా అవసరం లేదనిపిస్తోంది. ఎన్నికల కమిషన్ లేఖపై భాజపా సీలా! ఏ బటన్ నొక్కినా కమలం గుర్తు వస్తుందనే పాత ఆరోపణ లాగే, ఇది కూడా మరో కాకతాళీయంగా జరిగిందని అనుకోవాలా?” అంటూ ఎద్దేవా చేసింది.
