హస్తం పార్టీకి భారీ షాక్..! అక్బర్ రోడ్ ఖాళీ చేయాలని కేంద్రం నోటీసులు..!

• అక్బర్ రోడ్ ఖాళీ చేయాలని కేంద్రం నోటీసులు!
• ఐదు దశాబ్దాల చరిత్రకు ముగింపు?
• కాంగ్రెస్ ప్రధాన కార్యాలయానికి ‘ఎగ్జిట్’ డెడ్‌లైన్.
• మార్చి 28లోపు ఖాళీ చేయాల్సిందే..
• ల్యుటియన్స్ జోన్ నుంచి తప్పుకోవాలని అధికారుల ఆదేశం

న్యూఢిల్లీ:మహా.
దేశ రాజధాని నడిబొడ్డున దశాబ్దాల కాలంగా కాంగ్రెస్ పార్టీ కార్యకలాపాలకు వేదికగా నిలిచిన 24-అక్బర్ రోడ్‌లోని అఖిల భారత కాంగ్రెస్ కమిటీ (ఏఐసీసీ) ప్రధాన కార్యాలయానికి కేంద్ర ప్రభుత్వం నుంచి గట్టి ఎదురుదెబ్బ తగిలింది. ల్యుటియన్స్ జోన్‌లోని ఈ చారిత్రక భవనాన్ని వెంటనే ఖాళీ చేయాలంటూ అధికారులు తాజాగా ‘ఎగ్జిట్’ నోటీసులు జారీ చేశారు. కేవలం ప్రధాన కార్యాలయమే కాకుండా, రైసినా రోడ్‌లోని యూత్ కాంగ్రెస్ కార్యాలయాన్ని కూడా వెనక్కి అప్పగించాలని ఆదేశించారు. ఈ నెల 28వ తేదీ లోపు ఈ రెండు ప్రాంగణాలను ఖాళీ చేయాలని అధికారులు స్పష్టమైన గడువు విధించడంతో కాంగ్రెస్ శ్రేణుల్లో ఒక్కసారిగా కలకలం మొదలైంది. రాజ్యాంగబద్ధమైన నిబంధనల ప్రకారం ప్రభుత్వ భూమిని కేటాయించిన కాలపరిమితి ముగియడంతోనే ఈ చర్యలు చేపట్టినట్లు సంబంధిత వర్గాలు వెల్లడించాయి.
1978 నుంచి సుమారు 48 ఏళ్ల పాటు అక్బర్ రోడ్‌లోని ఈ భవనం కాంగ్రెస్ పార్టీకి అడ్డాగా నిలిచింది. 1977లో జరిగిన సాధారణ ఎన్నికల్లో ఓటమి పాలైన తర్వాత పార్టీలో చీలికలు వచ్చిన సమయంలో, అప్పటి రాజ్యసభ సభ్యుడు జి.వెంకటస్వామి ఇందిరా గాంధీకి విధేయుడిగా ఉంటూ తన బంగ్లాను పార్టీ కార్యకలాపాలకు ఇచ్చారు. నాటి నుంచి ఇందిరా గాంధీ, రాజీవ్ గాంధీ, పి.వి. నరసింహారావు, మన్మోహన్ సింగ్ వంటి దిగ్గజ ప్రధాన మంత్రులు ఇక్కడి నుంచే తమ రాజకీయ వ్యూహాలను రచించారు. ఎంతోమంది సీనియర్ నాయకులకు ఈ భవనంతో విడదీయలేని భావోద్వేగ అనుబంధం ఉంది. అయితే, గతేడాదే కోట్లా మార్గ్‌లో ‘ఇందిరా భవన్’ పేరుతో కొత్త ప్రధాన కార్యాలయాన్ని ప్రారంభించినప్పటికీ, అక్బర్ రోడ్‌లోని భవనాన్ని మాత్రం పార్టీ ఇంకా వదులుకోలేదు.
ప్రస్తుతం అధికారులు విధించిన గడువు సమీపిస్తుండటంతో, దీనిని అడ్డుకునేందుకు కాంగ్రెస్ పార్టీ న్యాయపోరాటానికి సిద్ధమవుతున్నట్లు తెలుస్తోంది. సుదీర్ఘకాలంగా కొనసాగుతున్న కార్యాలయాన్ని ఇంత హఠాత్తుగా ఖాళీ చేయడం అసాధ్యమని, దీనిపై కోర్టును ఆశ్రయించి స్టే తెచ్చుకోవాలని పార్టీ నేతలు భావిస్తున్నారు. మరోవైపు, దేశ చరిత్రలో ఈ భవనానికి విశిష్టమైన ప్రాముఖ్యత ఉంది. స్వాతంత్ర్యానికి పూర్వం బ్రిటిష్ వారి కాలంలో వైస్రాయ్ మండలి సభ్యులు ఇక్కడ నివసించగా, నోబెల్ విజేత ఆంగ్ సాన్ సూకీ కూడా తన యవ్వనంలో ఇక్కడే గడిపారు. ఇటువంటి చారిత్రక నేపథ్యం ఉన్న భవనాన్ని వదిలి వెళ్లడం పార్టీకి రాజకీయంగానే కాకుండా మానసికంగా కూడా పెద్ద ఇబ్బందేనని విశ్లేషకులు అభిప్రాయపడుతున్నారు. మార్చి 28న అధికారులు ఎలాంటి చర్యలు తీసుకుంటారనేది ఇప్పుడు దేశ రాజధానిలో సర్వత్రా ఉత్కంఠ రేపుతోంది.