- దివ్యాంగుల పోరాటానికి ‘కమల’ దళం బాసట.
- హామీలు విస్మరించిన కాంగ్రెస్ సర్కారు.
- ధర్నా చౌక్ వద్ద దివ్యాంగుల గర్జన.
హైదరాబాద్,మహా.
తమ న్యాయమైన డిమాండ్లను పరిష్కరించాలని కోరుతూ దివ్యాంగులు బుధవారం హైదరాబాద్లోని ఇందిరా పార్కు ‘ధర్నా చౌక్’ వద్ద భారీ నిరసన కార్యక్రమం చేపట్టారు. ఈ పోరాటానికి భారతీయ జనతా పార్టీ తన సంపూర్ణ మద్దతును ప్రకటించింది. ధర్నాలో పాల్గొన్న బీజేపీ నేతలు దివ్యాంగుల సమస్యలను అడిగి తెలుసుకుని, ప్రభుత్వంపై తీవ్రస్థాయిలో విరుచుకుపడ్డారు. ఎన్నికల సమయంలో దివ్యాంగులను ఆకట్టుకునేలా మేనిఫెస్టోలో అనేక సంక్షేమ పథకాలు, పెన్షన్ల పెంపు వంటి తాయిలాలు ప్రకటించిన కాంగ్రెస్ పార్టీ, అధికార పీఠం ఎక్కగానే వారిని నిలువునా విస్మరించిందని మండిపడ్డారు. ఓట్లు దండుకోవడానికి అబద్ధపు హామీలిచ్చి, ఇప్పుడు వారిని గాలికొదిలేయడం ఆ పార్టీ మోసపూరిత నైజానికి నిదర్శనమని ధ్వజమెత్తారు.
దివ్యాంగుల పట్ల ప్రభుత్వం అవలంబిస్తున్న నిర్లక్ష్య వైఖరి అత్యంత శోచనీయమని, ఆత్మగౌరవంతో బతకాలనుకుంటున్న వారిని రోడ్డు మీదకు తీసుకురావడం ప్రభుత్వ వైఫల్యమేనని బీజేపీ నాయకులు విమర్శించారు. అధికారంలోకి వచ్చిన కొద్ది రోజుల్లోనే ఇచ్చిన వాగ్దానాలను తుంగలో తొక్కడం ప్రజలను వంచించడమేనని ఆగ్రహం వ్యక్తం చేశారు. తమ హక్కుల సాధన కోసం దివ్యాంగులు చేస్తున్న ఈ ధర్మపోరాటంలో బీజేపీ ఎల్లప్పుడూ ముందుంటుందని, వారి సమస్యలు పరిష్కారం అయ్యే వరకు ప్రభుత్వంపై ఒత్తిడి తీసుకువస్తామని భరోసా ఇచ్చారు. దివ్యాంగుల సంక్షేమం పట్ల ప్రభుత్వానికి చిత్తశుద్ధి ఉంటే తక్షణమే చర్చలు జరిపి హామీలను నెరవేర్చాలని వారు డిమాండ్ చేశారు. ఈ నిరసన కార్యక్రమంతో ధర్నా చౌక్ పరిసర ప్రాంతాలు దివ్యాంగుల నినాదాలతో హోరెత్తాయి.
