వైద్య రంగంలో ‘సహజ పెరుగుదల’నే మీ ఘనతా?: సర్కార్‌పై హరీశ్ రావు నిప్పులు.. అసెంబ్లీలో మైక్ ఇవ్వలేదని ఆవేదన!

కాంగ్రెస్ పాలనలో పేరుకుపోయిన ఆసుపత్రి బకాయిలు.
* సర్కార్ తీరుపై మాజీ మంత్రి హరీశ్ రావు ఘాటు విమర్శలు!
* మేముంటే ఆసుపత్రులు ఎప్పుడో పూర్తయ్యేవి..
* ఆరోగ్యశ్రీలో కొత్తగా సాధించిందేమీ లేదు:
* అసెంబ్లీలో మైక్ ఇవ్వలేదని హరీశ్ రావు ఆవేదన.
* ఆరోగ్య రంగంలో ‘సహజ పెరుగుదల’నే గొప్పగా చెప్పుకుంటున్నారా?
* కాంగ్రెస్ ప్రభుత్వ అలసత్వంపై విరుచుకుపడ్డ హరీశ్ రావు.
హైదరాబాద్, మహా.
తెలంగాణలో కాంగ్రెస్ ప్రభుత్వం అధికారంలోకి వచ్చిన తర్వాత ప్రభుత్వ ఆసుపత్రులకు చెల్లించాల్సిన బకాయిలు భారీగా పేరుకుపోయాయని మాజీ మంత్రి హరీశ్ రావు తీవ్ర ఆరోపణలు చేశారు. అసెంబ్లీ ప్రాంగణంలో మీడియా ప్రతినిధులతో చిట్‌చాట్‌గా మాట్లాడిన ఆయన, ప్రస్తుత ప్రభుత్వంపై విమర్శల వర్షం కురిపించారు. గత బీఆర్‌ఎస్ ప్రభుత్వం హయాంలో చేపట్టిన ఆసుపత్రుల నిర్మాణాల గురించి కాంగ్రెస్ నేతలు గొప్పగా చెబుతున్నారే తప్ప, వాటిని పూర్తి చేయడంలో మాత్రం తీవ్ర జాప్యం చేస్తున్నారని మండిపడ్డారు. ఒకవేళ బీఆర్‌ఎస్ అధికారంలోనే ఉండి ఉంటే, ఆ ఆసుపత్రులన్నీ ఈపాటికే ప్రజలకు అందుబాటులోకి వచ్చేవి అని ఆయన ధీమా వ్యక్తం చేశారు. ప్రభుత్వ ప్రాధాన్యతలు మారడం వల్లే వైద్య రంగం నిర్లక్ష్యానికి గురవుతోందని ఆయన ఆవేదన వ్యక్తం చేశారు.
ఆరోగ్యశ్రీ పథకం అమలుపై ప్రభుత్వం చేస్తున్న ప్రచారాన్ని హరీశ్ రావు గణాంకాలతో సహా తిప్పికొట్టారు. 2014 జూన్ నాటికి ఆరోగ్యశ్రీ కోసం నెలకు రూ.32 కోట్లు ఖర్చు అయ్యేదని, అది బీఆర్‌ఎస్ హయాంలో 2023 నాటికి రూ.68 కోట్లకు చేరుకుందని వివరించారు. ప్రస్తుతం ప్రభుత్వం చెబుతున్న రూ.89 కోట్ల ఖర్చు కేవలం కాలక్రమేణా వచ్చే ‘సహజ పెరుగుదల’ మాత్రమేనని, ఇందులో కాంగ్రెస్ ప్రభుత్వం కొత్తగా చేసిన అద్భుతమేమీ లేదని దుయ్యబట్టారు. గత పదేళ్లలో వైద్య సేవలకు పెరిగిన డిమాండ్ కు అనుగుణంగానే ఈ వ్యయం పెరిగిందని, దీనిని తమ ఘనతగా చెప్పుకోవడం హాస్యాస్పదమని ఆయన విమర్శించారు.
ముఖ్యమంత్రి సహాయ నిధి నిధుల సమీకరణకు సంబంధించి గతంలో బీఆర్‌ఎస్ ప్రభుత్వం తీసుకున్న నిర్ణయాలను కూడా ఆయన గుర్తు చేశారు. సీఎంఆర్ఎఫ్ నిధిని బలోపేతం చేసేందుకు ఎక్సైజ్ ఆదాయంలో వాటాను పెంచామని, అప్పట్లో తాము చేపట్టిన ఇలాంటి అనేక సంస్కరణల వల్లే పేదలకు మెరుగైన వైద్యం అందిందని స్పష్టం చేశారు. అయితే సభలో ఈ వాస్తవాలను ప్రజల ముందు ఉంచాలని తాము ప్రయత్నించినప్పటికీ, ప్రభుత్వం తమకు మైక్ ఇవ్వకుండా గొంతు నొక్కిందని హరీశ్ రావు ఆరోపించారు. నిర్మాణాత్మక విమర్శలను స్వీకరించలేక కాంగ్రెస్ ప్రభుత్వం పారిపోతోందని ఆయన విమర్శించారు.