వైద్య రంగానికి రేవంత్ భరోసా: రూ. 2,408 కోట్ల ఆరోగ్యశ్రీ బకాయిల విడుదల…..

* ఆరోగ్యశ్రీకి రూ. 2,408 కోట్లు చెల్లింపు..
* గత ప్రభుత్వ అవినీతిపై విచారణకు ఆదేశం!
* వారసత్వంగా వచ్చిన రూ. 600 కోట్ల భారం.
* అయినా వెనక్కి తగ్గని కాంగ్రెస్ సర్కార్.
* వైద్య రంగానికి నిధుల వరద పారిస్తామన్న రేవంత్ రెడ్డి.
* రూ. 3 వేల కోట్లతో కొత్త ఉస్మానియా ఆస్పత్రి నిర్మాణం.
* ప్రతి కుటుంబానికి జీవిత బీమా.
* అసెంబ్లీ సాక్షిగా సీఎం రేవంత్ రెడ్డి కీలక ప్రకటనలు.
హైదరాబాద్, మహా.
తెలంగాణ అసెంబ్లీ వేదికగా ముఖ్యమంత్రి రేవంత్ రెడ్డి ఆరోగ్యశ్రీ బకాయిలు మరియు రాష్ట్ర వైద్య రంగంపై శ్వేతపత్రాన్ని విడుదల చేశారు. గత ప్రభుత్వ హయాం నుంచి తమకు రూ. 600.27 కోట్ల బకాయిలు వారసత్వంగా వచ్చాయని, ఆ భారాన్ని మోస్తూనే తమ ప్రభుత్వం పేదల వైద్యం కోసం పెద్దపీట వేస్తోందని ఆయన స్పష్టం చేశారు. గత ప్రభుత్వం ప్రతి నెలా సగటున రూ. 89 కోట్లు మాత్రమే ఖర్చు చేయగా, తమ ప్రభుత్వం అధికారంలోకి వచ్చిన నాటి నుంచి ఇప్పటివరకు ఏకంగా రూ. 2,408.51 కోట్లను ఆరోగ్యశ్రీ బకాయిల కింద చెల్లించిందని గణాంకాలతో వివరించారు. ఇందులో ప్రభుత్వ ఆసుపత్రులకు రూ. 927 కోట్లు, ప్రైవేటు ఆసుపత్రులకు రూ. 1,480 కోట్లు విడుదల చేశామని వెల్లడించారు. పేదల వైద్యం విషయంలో ఒక్క రూపాయి కూడా కోత విధించే ప్రసక్తే లేదని, అవసరమైతే మరిన్ని నిధులు కేటాయిస్తామని సీఎం భరోసా ఇచ్చారు.
గత ప్రభుత్వ హయాంలో ముఖ్యమంత్రి సహాయ నిధి చెక్కుల పంపిణీలో భారీ ఎత్తున అవినీతి జరిగిందని రేవంత్ రెడ్డి సంచలన ఆరోపణలు చేశారు. సుమారు రూ. 2,046 కోట్ల విలువైన సీఎంఆర్‌ఎఫ్ చెక్కులు ఎలా దుర్వినియోగం అయ్యాయనే అంశంపై ప్రస్తుతం విచారణ జరుగుతోందని సభకు తెలిపారు. అర్హులైన పేదలకు అందాల్సిన నిధులను పక్కదారి పట్టించిన వారిని వదిలిపెట్టేది లేదని హెచ్చరించారు. అదేవిధంగా, ఆరోగ్యశ్రీ పరిమితిని రూ. 5 లక్షల నుంచి రూ. 10 లక్షలకు పెంచడం ద్వారా పేదలకు మరింత నాణ్యమైన వైద్య సేవలను అందుబాటులోకి తెచ్చామని ఆయన గుర్తు చేశారు. విద్యా, వైద్య రంగాలు తమ ప్రభుత్వానికి అత్యంత ప్రాధాన్యత గల అంశాలని, భవిష్యత్తులో ఈ రంగాల్లో విప్లవాత్మక మార్పులు తీసుకురాబోతున్నామని ధీమా వ్యక్తం చేశారు.
వైద్య మౌలిక సదుపాయాల కల్పనలో భాగంగా హైదరాబాద్‌లోని గోషామహల్ పరిధిలో 30 ఎకరాల విస్తీర్ణంలో రూ. 3,000 కోట్లతో అత్యాధునిక ఉస్మానియా ఆసుపత్రిని నిర్మిస్తున్నట్లు ముఖ్యమంత్రి ప్రకటించారు. ఈ పనులను వేగవంతం చేయడానికి అన్ని చర్యలు తీసుకున్నామని, అలాగే విదేశాల్లోని నిపుణులైన వైద్యుల సేవలను కూడా వినియోగించుకుంటామని చెప్పారు. ప్రతి కుటుంబానికి భద్రత కల్పించే ఉద్దేశంతో సరికొత్త ‘జీవిత బీమా’ పథకాన్ని తీసుకువస్తున్నట్లు వెల్లడించారు. టీచింగ్ ఆసుపత్రుల నిర్వహణ బాధ్యతలను గ్రూప్-1 అధికారులకు అప్పగించడం ద్వారా వైద్య సేవల్లో జవాబుదారీతనం పెంచుతామని రేవంత్ రెడ్డి స్పష్టం చేశారు. రాష్ట్ర ఆరోగ్యాన్ని మెరుగుపరిచేందుకు ప్రతిపక్షాలు ఇచ్చే నిర్మాణాత్మక సూచనలను స్వీకరించడానికి సిద్ధంగా ఉన్నామని ఆయన ఈ సందర్భంగా పునరుద్ఘాటించారు.