గ్యాస్ సంక్షోభానికి చెక్…

* భారత్‌కు చేరుకున్న భారీ నౌక ‘జగ్ వసంత్’.
* 60 రోజుల ఆయిల్ నిల్వలు సిద్ధం.
* కొరత వార్తలు కేవలం అపోహలేనని కేంద్రం స్పష్టత.
ఢిల్లీ, మహా.
ప్రస్తుత పరిస్థితిని గమనిస్తే, హార్ముజ్ జలసంధిలో ఇంకా 20 భారతీయ జెండా కలిగిన నౌకలు నిలిచిపోయి ఉన్నాయని షిప్పింగ్ మంత్రిత్వ శాఖ తెలిపింది. వీటిలో ఐదు భారీ ఎల్పీజీ ట్యాంకర్లు ఉండగా, వాటిలో మొత్తం 2.3 లక్షల మెట్రిక్ టన్నుల సరుకు ఉన్నట్లు సమాచారం. భారత్ తన మొత్తం ఎల్పీజీ అవసరాల్లో దాదాపు 60 శాతం దిగుమతులపైనే ఆధారపడుతుండగా, అందులో 90 శాతం వరకు హార్ముజ్ జలసంధి ద్వారానే సరఫరా అవుతోంది. ఇటీవల ‘శివాలిక్’, ‘నందదేవి’ నౌకలు కాండ్లా పోర్టుకు చేరుకోగా, నిన్ననే ‘ఎంటీ అపోలో ఓషన్’ నౌక 16,000 మెట్రిక్ టన్నుల గ్యాస్‌తో న్యూ మంగళూరు పోర్టులో లంగరు వేసింది. మరో ట్యాంకర్ కూడా లోడింగ్ పూర్తి చేసుకుని త్వరలో భారత్‌కు బయలుదేరడానికి సిద్ధంగా ఉండటం సానుకూలాంశం.
గ్యాస్ కొరతపై సామాజిక మాధ్యమాల్లో వస్తున్న వదంతులను కేంద్ర ప్రభుత్వం తీవ్రంగా ఖండించింది. దేశంలో ప్రస్తుతం 60 రోజులకు సరిపడా ఆయిల్ నిల్వలు మరియు ఒక నెలకు సరిపోయే ఎల్పీజీ స్టాక్ అందుబాటులో ఉందని కేంద్రం అధికారికంగా ప్రకటించింది. ప్రజలు ఆందోళన చెందాల్సిన అవసరం లేదని, ఇంధన సరఫరాలో ఎటువంటి అంతరాయం కలగకుండా ప్రభుత్వం అన్ని ముందస్తు జాగ్రత్తలు తీసుకుందని భరోసా ఇచ్చింది. హార్ముజ్ జలసంధిలో నిలిచిపోయిన మిగిలిన నౌకలను కూడా సురక్షితంగా రప్పించడానికి దౌత్యపరమైన మరియు రక్షణ పరమైన చర్యలు ముమ్మరం చేసినట్లు అధికారులు వివరించారు