- 35 ఏళ్ల యువ ర్యాపర్ బాలేంద్ర షా ప్రధానమంత్రిగా పట్టాభిషేకం!
- 182 సీట్లతో ఆర్ఎస్పి ఘనవిజయం.
- వేద మంత్రాల సాక్షిగా నేపాల్ 47వ ప్రధానిగా బాలేంద్ర షా బాధ్యతలు!
ఢిల్లీ, మహా.
హిమాలయ దేశం నేపాల్లో సరికొత్త రాజకీయ శకం ఆరంభమైంది. దేశ యువతరం ఆకాంక్షలకు ప్రతిరూపంగా, సంగీత ప్రపంచం నుంచి రాజకీయ యవనికపైకి దూసుకొచ్చిన 35 ఏళ్ల బాలేంద్ర షా ‘బాలెన్’, నేపాల్ 47వ ప్రధానమంత్రిగా శుక్రవారం (మార్చి 27) అట్టహాసంగా ప్రమాణ స్వీకారం చేశారు. రాజధాని కాఠ్మండులోని అధ్యక్ష భవనం ‘శీతల్ నివాస్’లో మధ్యాహ్నం 12:34 గంటలకు జరిగిన ఈ చారిత్రక కార్యక్రమంలో, రాష్ట్రపతి రామ్ చంద్ర పౌడెల్ ఆయనతో పదవీ ప్రమాణం చేయించారు. నేపాల్ చరిత్రలోనే అత్యంత పిన్న వయస్కుడైన ప్రధానమంత్రిగా రికార్డు సృష్టించడమే కాకుండా, మధేష్ ప్రాంతం నుండి ఈ అత్యున్నత కార్యనిర్వాహక పదవిని చేపట్టిన మొదటి వ్యక్తిగా బాలేంద్ర షా తన పేరును సువర్ణాక్షరాలతో లిఖించుకున్నారు. వృత్తిరీత్యా ఇంజనీర్ అయిన బాలెన్, కాఠ్మండు మాజీ మేయర్గా తనదైన ముద్ర వేసి, ఇప్పుడు దేశ ప్రధాని స్థాయికి ఎదిగారు.
దేశాన్ని కుదిపేసిన ‘జెన్-జెడ్’ నిరసనల సెగతో కేపీ శర్మ ఓలీ నేతృత్వంలోని ప్రభుత్వం కూలిపోయిన ఆరు నెలల తర్వాత జరిగిన ఈ ఎన్నికల్లో, బాలేంద్ర షా నేతృత్వంలోని రాష్ట్రీయ స్వతంత్ర పార్టీ (ఆర్ఎస్పి) అద్భుత విజయాన్ని సాధించింది. పాత తరం రాజకీయాలకు, అవినీతికి వ్యతిరేకంగా సాగిన ఈ యువ విప్లవం, పార్లమెంటులోని మొత్తం 275 స్థానాలకు గాను ఏకంగా 182 స్థానాలను కైవసం చేసుకునేలా చేసింది. రాజ్యాంగంలోని ఆర్టికల్ 76 (1) ప్రకారం మెజారిటీ సాధించిన నేతగా బాలెన్ను రాష్ట్రపతి ప్రధానిగా నియమించారు. తాజా ఎన్నికల్లో నాలుగుసార్లు ప్రధానిగా పనిచేసిన ఉద్దండుడు కేపీ శర్మ ఓలీని ఆయన కంచుకోట అయిన ఝపా-5 నియోజకవర్గంలోనే భారీ మెజారిటీతో ఓడించి, బాలెన్ తన రాజకీయ చతురతను ప్రపంచానికి చాటిచెప్పారు.
బాలేంద్ర షా ప్రమాణ స్వీకార కార్యక్రమం సర్వమత సౌభాతృత్వానికి మరియు నేపాల్ సంస్కృతికి నిలువుటద్దంగా నిలిచింది. హిందూ మరియు బౌద్ధ మత సంప్రదాయాల కలయికతో ఈ వేడుక అత్యంత వైభవంగా సాగింది. ఏడుగురు బ్రాహ్మణుల శంఖనాదం, 108 మంది యువ బ్రాహ్మణుల వేద మంత్రోచ్ఛారణల మధ్య, 107 మంది బౌద్ధ లామాల మంగళ పఠనాలు మరియు బౌద్ధ గ్రంథ పఠనాలు మిన్నంటాయి. తన పరిపాలనలో కేవలం 15 నుండి 18 మంది మంత్రులతో కూడిన చిన్నపాటి మంత్రివర్గాన్ని ఏర్పాటు చేయాలని బాలెన్ నిర్ణయించారు. అవినీతి రహిత పాలన, ఉపాధి కల్పన మరియు మౌలిక సదుపాయాల అభివృద్ధి తన ప్రథమ ప్రాధాన్యతాలని ఆయన స్పష్టం చేశారు. ఒక ర్యాపర్గా యువత హృదయాలను గెలుచుకున్న బాలెన్, ఇప్పుడు ఒక దేశ ప్రధానిగా నేపాల్ను ఏ విధంగా అభివృద్ధి శిఖరాలకు తీసుకెళ్తారోనని యావత్ ప్రపంచం ఆసక్తిగా ఎదురుచూస్తోంది.
