మళ్లీ మొదలైన భానుడి ప్రతాపం. ఉగ్రరూపం దాల్చుతున్న ఎండలు…!

•  పలు జిల్లాలకు ‘ఆరెంజ్’ హెచ్చరిక.

హైదరాబాద్, మహా.

రాష్ట్రంలో వాతావరణం ఒక్కసారిగా మారిపోయింది. ఉపరితల ద్రోణి ప్రభావంతో గత కొన్ని రోజులుగా కురిసిన వర్షాలు కాస్త ఉపశమనాన్ని ఇచ్చినా, ఇప్పుడు మళ్లీ సూర్యుడు తన ప్రతాపాన్ని చూపిస్తున్నాడు. గత రెండు రోజులుగా ఎండల తీవ్రత పెరగడమే కాకుండా, ఉక్కపోతతో ప్రజలు ఉక్కిరిబిక్కిరి అవుతున్నారు. ఈ నేపథ్యంలో హైదరాబాద్‌లోని భారత వాతావరణ కేంద్రం (ఐఎమ్డీ) రాష్ట్రవ్యాప్తంగా పలు జిల్లాలకు ఆరెంజ్, ఎల్లో అలర్ట్లను జారీ చేసింది. ప్రధానంగా ఉత్తర మరియు దక్షిణ తెలంగాణలోని పలు ప్రాంతాల్లో గరిష్ఠ ఉష్ణోగ్రతలు సాధారణం కంటే ఒకటి నుంచి రెండు డిగ్రీలు అధికంగా నమోదయ్యే అవకాశం ఉందని వాతావరణ శాఖ హెచ్చరించింది. శనివారం నుంచి ఎండల తీవ్రత మరింత పెరిగే సూచనలు కనిపిస్తున్నాయి.

రాష్ట్రంలోని ఆదిలాబాద్, కుమురం భీం ఆసిఫాబాద్, మంచిర్యాల జిల్లాల్లో భానుడి భగభగలు తీవ్రంగా ఉండనున్నాయి. ఈ జిల్లాల్లో ఉష్ణోగ్రతలు 41 నుంచి 44 డిగ్రీల వరకు నమోదయ్యే అవకాశం ఉండటంతో అధికారులు ఆరెంజ్ అలర్ట్ ప్రకటించారు. మిగిలిన జిల్లాల్లో 36 నుంచి 40 డిగ్రీల వరకు ఉష్ణోగ్రతలు ఉండవచ్చని, ఆయా ప్రాంతాలకు ఎల్లో అలర్ట్ వర్తిస్తుందని వెల్లడించారు. కేవలం ఉత్తర తెలంగాణకే పరిమితం కాకుండా, ఉమ్మడి మహబూబ్‌నగర్ జిల్లాలోనూ ఎండలు దంచికొట్టనున్నాయి. వికారాబాద్, నారాయణపేట, మహబూబ్‌నగర్, జోగుళాంబ గద్వాల, నాగర్ కర్నూల్, వనపర్తి మరియు సంగారెడ్డి జిల్లాల్లో కూడా 44 డిగ్రీల వరకు వేడి పెరిగే వీలుందని, ఈ జిల్లాల ప్రజలు అప్రమత్తంగా ఉండాలని వాతావరణ శాఖ అధికారి ధర్మరాజు సూచించారు.

అయితే, పగటిపూట ఎండలు మండిపోతున్నా, సాయంత్రం వేళల్లో వాతావరణం అనూహ్యంగా మారే అవకాశం ఉంది. గరిష్ఠ ఉష్ణోగ్రతల వల్ల భూ ఉపరితలం వేడెక్కి క్యుములోనింబస్ మేఘాలు ఏర్పడతాయని, దీని ప్రభావంతో అక్కడక్కడా ఈదురు గాలులతో కూడిన తేలికపాటి జల్లులు కురిసే అవకాశం ఉందని అధికారులు అంచనా వేస్తున్నారు. ఈ సమయంలో గంటకు 40 నుంచి 50 కిలోమీటర్ల వేగంతో గాలులు వీస్తాయని తెలుస్తోంది. గాలి తేలికపడి సుడిగాలులు వీయడం వల్ల ఉరుములు, మెరుపులతో పాటు పిడుగులు పడే ప్రమాదం ఉందని వాతావరణ కేంద్రం హెచ్చరించింది. మేఘాల ఘర్షణ వల్ల పుట్టే అధిక విద్యుత్ శక్తి పిడుగు రూపంలో ఎత్తైన చెట్లు, విద్యుత్ స్తంభాలను ఆకర్షించే అవకాశం ఉన్నందున, వర్షం పడే సమయంలో బయట ఉండటం ప్రమాదకరమని స్పష్టం చేశారు.

ఈ నెల 28 నుంచి ఉష్ణోగ్రతలు క్రమంగా పెరుగుతుండటంతో ప్రజలు తగిన జాగ్రత్తలు తీసుకోవాలని అధికారులు విజ్ఞప్తి చేస్తున్నారు. ముఖ్యంగా మధ్యాహ్నం వేళల్లో అత్యవసరమైతే తప్ప బయటకు రావద్దని, ఎత్తైన ప్రదేశాలు లేదా చెట్ల కింద ఆశ్రయం పొందవద్దని సూచించారు. వడదెబ్బ తగలకుండా తగినన్ని ద్రవ పదార్థాలు తీసుకోవాలని, అప్రమత్తంగా ఉండి వాతావరణ మార్పులకు అనుగుణంగా జాగ్రత్తలు పాటించాలని ఐఎమ్డీ కోరింది. నిప్పుల కుంపటిలా మారుతున్న వాతావరణం దృష్ట్యా రానున్న రెండు మూడు రోజులు అత్యంత కీలకమని నిపుణులు అభిప్రాయపడుతున్నారు.