* ఓంకారేశ్వరాలయానికి ముఖ్యమంత్రి రేవంత్ శంకుస్థాపన.
* రూ. 700 కోట్లతో ఎనిమిది ఎకరాల్లో నిర్మాణం.
హైద్రాబాద్, మహా.
కుటుంబ సమేతంగా వీరభద్రుని సేవలో సీఎం
ముఖ్యమంత్రి రేవంత్ రెడ్డి శనివారం గండిపేట మండలం మంచిరేవులలో పర్యటించి, మూసీ నది పునరుజ్జీవన ప్రాజెక్టులో భాగంగా మరో కీలక ఘట్టానికి శ్రీకారం చుట్టారు. తొలుత ఆయన తన కుటుంబ సభ్యులతో కలిసి స్థానిక చారిత్రక వీరభద్రస్వామి ఆలయాన్ని సందర్శించి ప్రత్యేక పూజలు నిర్వహించారు. ఆలయ అర్చకులు ముఖ్యమంత్రికి పూర్ణకుంభంతో స్వాగతం పలికి, వేదాశీర్వచనాలు అందజేశారు. లోకకళ్యాణాన్ని కాంక్షిస్తూ నిర్వహించిన ఈ పూజా కార్యక్రమాల అనంతరం, ముఖ్యమంత్రి అక్కడికి సమీపంలోనే నిర్మించ తలపెట్టిన ఓంకారేశ్వర స్వామి ఆలయానికి భూమిపూజ చేసి శంకుస్థాపన చేశారు. మూసీ నదీ పరివాహక ప్రాంతాన్ని ఆధ్యాత్మిక శోభతో తీర్చిదిద్దే లక్ష్యంతో ప్రభుత్వం ఈ భారీ ప్రాజెక్టును చేపట్టింది.
ప్రభుత్వం అత్యంత ప్రతిష్టాత్మకంగా చేపడుతున్న ఈ ఓంకారేశ్వర ఆలయాన్ని సుమారు 8 ఎకరాల విస్తీర్ణంలో, రూ. 700 కోట్ల భారీ వ్యయంతో నిర్మించనున్నారు. ఈ ఆలయానికి సంబంధించిన నిర్మాణ నమూనా (డిజైన్) ఇప్పటికే ఖరారైంది. చారిత్రక నేపథ్యం కలిగిన వీరభద్రస్వామి ఆలయానికి సమీపంలోనే ఈ కొత్త క్షేత్రం రూపుదిద్దుకోనుండటంతో ఈ ప్రాంతం భవిష్యత్తులో ప్రధాన ఆధ్యాత్మిక కేంద్రంగా విరాజిల్లనుంది. మూసీ నదిని కాలుష్య కోరల నుంచి విముక్తి చేసి, నదీ తీరాన్ని పర్యాటక మరియు సంస్కృతీ కేంద్రంగా మార్చే బృహత్ ప్రణాళికలో ఈ ఆలయ నిర్మాణం ఒక మైలురాయిగా నిలవనుంది. శంకుస్థాపన అనంతరం ముఖ్యమంత్రి అధికారులతో మాట్లాడి, నిర్మాణ పనులను వేగవంతం చేయాలని మరియు నాణ్యత విషయంలో రాజీ పడకూడదని ఆదేశించారు.
