- గంటల తరబడి శ్రమించిన అగ్నిమాపక సిబ్బంది.
- కన్నీరుమున్నీరవుతున్న యజమానులు.
రంగారెడ్డి,మహా.
రంగారెడ్డి జిల్లా నందిగామ మండల కేంద్రంలో శనివారం భీతావహ వాతావరణం నెలకొంది. స్థానిక వీర్లపల్లి రోడ్డులో ఉన్న శ్రీ కృష్ణ రూరల్ గోదాంలో ఒక్కసారిగా భారీ అగ్నిప్రమాదం సంభవించింది. కేంద్ర ప్రభుత్వ సంస్థ అయిన కాటన్ కార్పొరేషన్ ఆఫ్ ఇండియా కు చెందిన పత్తి నిల్వలు ఈ గోదాంలో ఉండటంతో, నిప్పురవ్వలు తగిలిన క్షణాల వ్యవధిలోనే మంటలు దావానలంలా వ్యాపించాయి. ఆకాశాన్ని తాకుతున్న నల్లటి పొగ మేఘాలు, దంచికొడుతున్న మంటల ధాటికి పరిసర ప్రాంతాల ప్రజలు తీవ్ర భయాందోళనకు గురై ఇళ్ల నుంచి బయటకు పరుగులు తీశారు. పత్తి అత్యంత త్వరగా మండే స్వభావం కలిగి ఉండటంతో మంటలు అదుపుతప్పి గోదాం అంతటా విస్తరించాయి.
ప్రమాద సమయంలో గోదాంలో విధుల్లో ఉన్న సిబ్బంది మంటలను గమనించి వెంటనే అప్రమత్తమయ్యారు. వారు ప్రాణభయంతో బయటకు పరుగులు తీయడంతో పాటు తక్షణమే పోలీసులకు, అగ్నిమాపక శాఖకు సమాచారం అందించారు. సమాచారం అందిన వెంటనే షాద్నగర్, మహేశ్వరం తదితర ప్రాంతాల నుంచి అగ్నిమాపక యంత్రాలు యుద్ధ ప్రాతిపదికన సంఘటనా స్థలానికి చేరుకున్నాయి. అగ్నిమాపక సిబ్బంది, పోలీసులు మరియు పరిశ్రమ సిబ్బంది సమన్వయంతో పనిచేసి మంటలను ఇతర విభాగాలకు వ్యాపించకుండా అడ్డుకోగలిగారు. సుమారు ఐదు గంటల పాటు నిరంతరాయంగా శ్రమించి మంటలను అదుపులోకి తీసుకువచ్చారు. లోపల పత్తి బేళ్లు భారీగా నిల్వ ఉండటంతో మంటలను చల్లార్చడం సిబ్బందికి పెను సవాలుగా మారింది.
ఈ ఘోర ప్రమాదంలో భారీగా ఆస్తి నష్టం సంభవించింది. గోదాంలో నిల్వ ఉంచిన వేలాది పత్తి బేళ్లు అగ్నికి ఆహుతి కావడంతో సుమారు 60 కోట్ల రూపాయల మేర నష్టం వాటిల్లినట్లు ప్రాథమికంగా అంచనా వేస్తున్నారు. ఎంతో కష్టపడి సేకరించిన ‘తెల్లబంగారం’ కళ్లముందే బూడిద కావడంతో నిర్వాహకులు కన్నీరుమున్నీరవుతున్నారు. అయితే, ప్రమాద సమయంలో గోదాంలో సిబ్బంది ఉన్నప్పటికీ ఎవరికీ ఎటువంటి గాయాలు కాకపోవడం, ప్రాణనష్టం తప్పడంతో అధికారులు ఊపిరి పీల్చుకున్నారు.
ప్రమాదానికి గల ఖచ్చితమైన కారణాలపై పోలీసులు దర్యాప్తు ప్రారంభించారు. విద్యుత్ షార్ట్ సర్క్యూట్ వల్ల ఈ అనర్థం జరిగిందా లేదా ఇతర సాంకేతిక లోపాలు ఏమైనా ఉన్నాయా అనే కోణంలో విచారణ జరుపుతున్నారు. .
