రంజీలో కశ్మీర్‌ నవశకం..! మన్ కీ బాత్’లో ప్రధాని మోదీ ప్రశంసలు..

• మన్ కీ బాత్’లో ప్రధాని మోదీ ప్రశంసలు
•  దేశవాళీ క్రికెట్‌లో జమ్ము కశ్మీర్ చారిత్రక విజయం

ఢిల్లీ, మహా.

భారత దేశవాళీ క్రికెట్ చరిత్రలో సరికొత్త అధ్యాయం లిఖిస్తూ, ఏడు దశాబ్దాల సుదీర్ఘ నిరీక్షణకు తెరదించుతూ తొలిసారి రంజీ ట్రోఫీని కైవసం చేసుకున్న జమ్ము కశ్మీర్ క్రికెట్ జట్టుపై ప్రధానమంత్రి నరేంద్ర మోదీ ప్రశంసల వర్షం కురిపించారు. ఆదివారం నిర్వహించిన ‘మన్ కీ బాత్’ కార్యక్రమంలో ఆయన ప్రత్యేకంగా మాట్లాడుతూ.. జమ్ము కశ్మీర్ ఆటగాళ్ల చారిత్రాత్మక విజయాన్ని, వారి అచంచలమైన అంకితభావాన్ని కొనియాడారు. దేశవ్యాప్తంగా ఉన్న కోట్లాది మంది క్రికెట్ అభిమానులకు మార్చి నెల ఎంతో ఉత్సాహాన్ని, సరికొత్త రోమాంచిత అనుభూతులను పంచిందని ఆయన ఈ సందర్భంగా గుర్తుచేశారు.

భారత్ గతంలో టీ20 ప్రపంచకప్ గెలిచినప్పుడు దేశమంతా ఏ స్థాయిలో సంబరాలు చేసుకుందో, ఇప్పుడు కర్ణాటకలోని హుబ్లీ వేదికగా జరిగిన అత్యంత ఆసక్తికరమైన ఫైనల్ పోరులో జమ్ము కశ్మీర్ రంజీ ఛాంపియన్‌గా నిలవడం కూడా దేశవాసులందరికీ అంతే గర్వకారణమని మోదీ హర్షం వ్యక్తం చేశారు. జమ్ము కశ్మీర్ జట్టు రంజీ ట్రోఫీ గెలవడం ఒక అద్భుత ఘట్టమని, ఆటగాళ్లు ఎన్నో ఏళ్లుగా చేసిన నిరంతర కృషికే ఈ అపూర్వ విజయం దక్కిందని ప్రధాని స్పష్టం చేశారు. ముఖ్యంగా జట్టు కెప్టెన్ పరాస్ డోగ్రా ప్రదర్శనను ఆయన ప్రత్యేకంగా ప్రస్తావిస్తూ, అద్భుతమైన క్రీడా నైపుణ్యంతో, అద్వితీయమైన నాయకత్వ లక్షణాలతో ఆయన జట్టును ముందుండి నడిపించారని కితాబిచ్చారు. క్లిష్ట పరిస్థితుల్లోనూ సంయమనం కోల్పోకుండా జట్టును విజయతీరాలకు చేర్చడంలో కెప్టెన్ పాత్ర ఎంతో కీలకమని, ఆయన మార్గదర్శకత్వం యువ ఆటగాళ్లకు ఎంతగానో ఉపయోగపడిందని ప్రధాని విశ్లేషించారు.

ఈ రంజీ సీజన్‌లో ఏకంగా 60 వికెట్లు పడగొట్టి సంచలనం సృష్టించిన జమ్ము కశ్మీర్ యువ ఫాస్ట్ బౌలర్ ఆకిబ్ నబీ గురించి ప్రస్తుతం దేశమంతా మాట్లాడుకుంటోందని మోదీ సంతోషం వ్యక్తం చేశారు. అద్భుతమైన బౌలింగ్ నైపుణ్యంతో ప్రత్యర్థి జట్లకు సింహస్వప్నంగా మారిన ఆకిబ్ నబీ నేటి యువతకు ఆదర్శంగా నిలిచారన్నారు. ఈ చారిత్రక విజయంతో జమ్ము కశ్మీర్ ఆటగాళ్లు, కోచింగ్ సిబ్బందితో పాటు అక్కడి ప్రజలంతా ఆనందంలో మునిగితేలుతున్నారని పేర్కొన్నారు. మైదానంలో ఆటగాళ్లు కనబరిచిన ఈ అద్భుత ప్రదర్శన స్థానిక యువతలో క్రీడల పట్ల మరింత ఉత్సాహాన్ని, స్ఫూర్తిని నింపిందని, భవిష్యత్తులో మరింత మంది క్రీడలను కెరీర్‌గా ఎంచుకోవడానికి ఇది దోహదపడుతుందని వివరించారు.

జమ్ము కశ్మీర్ ప్రజల్లో క్రీడల పట్ల అద్భుతమైన అభిరుచి ఉందన్న ప్రధాని.. ఆ ప్రాంతం ఇప్పుడు భారీ క్రీడా టోర్నీలకు ప్రధాన కేంద్రంగా మారుతుండటం ఎంతో శుభపరిణామమని అభిప్రాయపడ్డారు. గుల్మార్గ్‌లో ప్రతిష్టాత్మకంగా జరుగుతున్న ‘ఖేలో ఇండియా వింటర్ గేమ్స్’ ఇప్పటికే జాతీయ స్థాయిలో ప్రత్యేక గుర్తింపు తెచ్చుకున్నాయని, అక్కడి యువతలో ఫుట్‌బాల్ లాంటి క్రీడలకు విశేష ఆదరణ లభిస్తోందని గుర్తుచేశారు.