- తమిళ రణక్షేత్రంలో అగ్రనేతల శంఖారావం.
- నామినేషన్లు దాఖలు చేసిన సీఎం స్టాలిన్, టీవీకే అధినేత విజయ్!
- కొళత్తూర్ కోటలో నాలుగోసారి స్టాలిన్.. రెండు స్థానాల నుంచి అదృష్టాన్ని పరీక్షించుకుంటున్న ‘విజయ్’!
చెన్నై,మహా.
దక్షిణ భారత రాజకీయాల్లో అత్యంత ఆసక్తికరంగా మారిన తమిళనాడు అసెంబ్లీ ఎన్నికల పోరు మలుపు తిరిగింది. రాష్ట్ర రాజకీయ యవనికపై అగ్రనేతల నామినేషన్ల పర్వంతో ఎన్నికల వేడి ఒక్కసారిగా శిఖర స్థాయికి చేరింది. ముఖ్యమంత్రి, డీఎంకే అధినేత ఎం.కె. స్టాలిన్తో పాటు తమిళగ వెట్రి కళగం అధినేత, సినీ నటుడు విజయ్ సోమవారం తమ నామపత్రాలను దాఖలు చేయడంతో రాష్ట్రంలో ఎన్నికల సమరం అధికారికంగా రణరంగంగా మారింది. ఈసారి ఎన్నికల్లో అటు అనుభవజ్ఞుడైన స్టాలిన్ తన కోటను కాపాడుకునేందుకు సిద్ధమవ్వగా, రాజకీయ అరంగేట్రం చేసిన విజయ్ ఏకంగా రెండు నియోజకవర్గాల నుంచి బరిలోకి దిగి తన సత్తా చాటేందుకు సిద్ధమవ్వడం రాజకీయ వర్గాల్లో పెను సంచలనంగా మారింది.
ముఖ్యమంత్రి ఎం.కె. స్టాలిన్ తన సెంటిమెంట్ నియోజకవర్గమైన చెన్నైలోని కొళత్తూర్ నుంచి వరుసగా నాలుగోసారి అదృష్టాన్ని పరీక్షించుకోబోతున్నారు. సోమవారం ఉదయం భారీ బలప్రదర్శన నడుమ రిటర్నింగ్ అధికారి కార్యాలయానికి చేరుకున్న ఆయన, తన నామినేషన్ పత్రాలను సమర్పించారు. అనంతరం ఆయన చేపట్టిన రోడ్ షోకు అభిమానులు, పార్టీ కార్యకర్తలు పోటెత్తారు. ప్రజలకు అభివాదం చేస్తూ ముందుకు సాగిన స్టాలిన్, తన గత మూడేళ్ల పాలనలో కొళత్తూర్ నియోజకవర్గంలో చేపట్టిన అభివృద్ధి పనుల వివరాలతో కూడిన ఒక ప్రత్యేక పుస్తకాన్ని విడుదల చేయడం విశేషం. కేవలం హామీలతో కాకుండా, చేసిన అభివృద్ధిని రిపోర్ట్ కార్డు రూపంలో ప్రజల ముందు ఉంచి ఓట్లడగడం రాజకీయాల్లో ఒక కొత్త ఒరవడికి నిదర్శనంగా నిలిచింది. కొళత్తూర్ ప్రజలు తనపై ఉంచిన నమ్మకాన్ని నిలబెట్టుకున్నానని, ఈసారి కూడా భారీ మెజారిటీతో విజయం ఖాయమని ఆయన ధీమా వ్యక్తం చేశారు.
మరోవైపు, తమిళనాడు రాజకీయాల్లో సరికొత్త ఆశగా ముందుకొచ్చిన టీవీకే అధినేత విజయ్ తన నామినేషన్ దాఖలు చేయడంతో రాష్ట్రవ్యాప్తంగా ఉత్కంఠ నెలకొంది. తొలిసారి ఎన్నికల బరిలో నిలుస్తున్న విజయ్, వ్యూహాత్మకంగా రెండు నియోజకవర్గాల నుంచి పోటీ చేయాలని నిర్ణయించుకోవడం రాజకీయ విశ్లేషకులను సైతం ఆశ్చర్యపరిచింది. తన పార్టీ ప్రభావాన్ని కేవలం ఒక ప్రాంతానికే పరిమితం చేయకుండా, రాష్ట్రవ్యాప్తంగా తన కేడర్లో ఉత్సాహం నింపేందుకే ఆయన ఈ నిర్ణయం తీసుకున్నట్లు తెలుస్తోంది. నామినేషన్ దాఖలు చేసిన అనంతరం విజయ్ అభిమానుల మధ్య సందడి చేస్తూ, మార్పు దిశగా తమిళనాడు అడుగులు వేస్తోందని ఆశాభావం వ్యక్తం చేశారు. డీఎంకే, ఏఐఏడీఎంకే వంటి దశాబ్దాల చరిత్ర కలిగిన పార్టీలకు వ్యతిరేకంగా విజయ్ ఏ మేరకు ప్రభావం చూపుతారనేది ఇప్పుడు చర్చనీయాంశంగా మారింది.
