- యుద్ధాల హోరులోనూ చెక్కుచెదరని ఇంధన భద్రత!
- 2030 నాటికి 1.5 బిలియన్ టన్నులే లక్ష్యం.
- పునరుద్ధరణీయ ఇంధనంపై బొగ్గు దిగ్గజాల దృష్టి: 22 గిగావాట్ల దిశగా అడుగులు.
- రాజ్యసభలో కేంద్రమంత్రి కిషన్ రెడ్డి వెల్లడి.
ఢిల్లీ, మహా.
ప్రపంచవ్యాప్తంగా నెలకొన్న ఉద్రిక్త పరిస్థితులు మరియు యుద్ధ మేఘాల మధ్య కూడా భారతదేశ ఇంధన భద్రత అత్యంత పటిష్టంగా ఉందని కేంద్ర బొగ్గు గనుల శాఖ మంత్రి జి. కిషన్ రెడ్డి స్పష్టం చేశారు. రాజ్యసభలో బొగ్గు రంగానికి సంబంధించిన పలువురు సభ్యులు అడిగిన లిఖితపూర్వక ప్రశ్నలకు ఆయన సమాధానమిస్తూ.. దేశీయ బొగ్గు రంగం సాధించిన ప్రగతిని వివరించారు. అంతర్జాతీయంగా సరఫరా గొలుసులో ఆటంకాలు ఉన్నప్పటికీ, భారత థర్మల్ విద్యుత్ కేంద్రాలు ప్రధానంగా దేశీయ బొగ్గుపైనే ఆధారపడటం వల్ల మన ఎనర్జీ సెక్యూరిటీకి ఎటువంటి ఢోకా లేదని ధీమా వ్యక్తం చేశారు. వరుసగా రెండో ఏడాది ఒక బిలియన్ టన్నుల బొగ్గు ఉత్పత్తిని దాటడం ద్వారా భారత్ ఈ రంగంలో స్వయం సమృద్ధి దిశగా వేగంగా అడుగులు వేస్తోందని ఆయన పేర్కొన్నారు.
ప్రస్తుతం దేశంలో బొగ్గు నిల్వలు పుష్కలంగా ఉన్నాయని, గనుల వద్ద 165 మిలియన్ టన్నులు, పవర్ ప్లాంట్ల వద్ద 54 మిలియన్ టన్నుల నిల్వలు సిద్ధంగా ఉన్నాయని మంత్రి వెల్లడించారు. విద్యుత్ రంగానికే కాకుండా ఇతర పారిశ్రామిక అవసరాలకు కూడా నిరంతరాయంగా బొగ్గును సరఫరా చేస్తున్నామని చెప్పారు. కోల్ ఇండియా ద్వారా గనుల వేలాన్ని పెంచడం మరియు నాన్ రెగ్యులేటెడ్ సెక్టార్ వారికి దిగుమతి చేసుకునే వెసులుబాటు కల్పించడం ద్వారా పరిశ్రమలకు అవసరమైన ఇంధనాన్ని అందుబాటులో ఉంచుతున్నామన్నారు. 2030 నాటికి 1.5 బిలియన్ టన్నుల ఉత్పత్తి లక్ష్యాన్ని చేరుకునేందుకు దీర్ఘకాలిక వ్యూహంతో ముందుకు వెళ్తున్నామని, ఇందుకోసం ‘శక్తి’ పాలసీ వంటి సంస్కరణలు తోడ్పడుతున్నాయని వివరించారు.
బొగ్గు రవాణా మరియు లాజిస్టిక్స్ రంగంలో విప్లవాత్మక మార్పులు తెస్తున్నట్లు కిషన్ రెడ్డి తెలిపారు. రవాణా ఖర్చులను తగ్గించడంతో పాటు సమయాన్ని ఆదా చేసేందుకు రైలు, రోడ్డు, నీటి మార్గాల ద్వారా మల్టీ-మోడల్ వ్యవస్థను బలోపేతం చేస్తున్నామన్నారు. ఇందులో భాగంగా ఆర్టిఫిషియల్ ఇంటెలిజెన్స్, డ్రోన్లు, సెన్సార్ల వంటి అత్యాధునిక సాంకేతికతను వినియోగిస్తున్నామని చెప్పారు. 139 ఫస్ట్ మైల్ కనెక్టివిటీ (FMC) ప్రాజెక్టుల ద్వారా బొగ్గు రవాణా సామర్థ్యాన్ని పెంచుతున్నామని, తద్వారా 2030 నాటికి లాజిస్టిక్స్ వ్యయాన్ని 14 శాతం వరకు తగ్గించి, ఏడాదికి రూ.21 వేల కోట్లు ఆదా చేయడమే లక్ష్యమని వెల్లడించారు. రోడ్డు రవాణాను తగ్గించడం ద్వారా కార్బన్ ఉద్గారాలను నియంత్రించి పర్యావరణ హితంగా ముందుకు సాగుతామని పేర్కొన్నారు.
మరోవైపు, బొగ్గును గ్యాసిఫికేషన్ చేసే ప్రాజెక్టులకు ప్రభుత్వం పెద్దపీట వేస్తోందని మంత్రి తెలిపారు. ఇందుకోసం రూ.6,133 కోట్లతో ఏడు ప్రాజెక్టులను కేటాయించగా, ప్రస్తుతానికి జిందాల్ స్టీల్ లిమిటెడ్ మాత్రమే మొదటి విడత నిధులు పొందేందుకు అర్హత సాధించిందని వివరించారు. ఈ ప్రాజెక్టులను పర్యవేక్షించేందుకు ప్రత్యేక టాస్క్ ఫోర్స్ మరియు ఉన్నత స్థాయి కమిటీలను ఏర్పాటు చేశామన్నారు. బొగ్గు గ్యాసిఫికేషన్ ద్వారా వచ్చే మిథనాల్, సింథటిక్ నేచురల్ గ్యాస్ వంటి ఉత్పత్తుల మార్కెటింగ్ కోసం పెట్రోలియం శాఖతో సంప్రదింపులు జరుపుతున్నట్లు చెప్పారు. భవిష్యత్తులో ఇంధన అవసరాల కోసం బొగ్గుపైనే కాకుండా, బొగ్గు సంస్థల ద్వారా పునరుద్ధరణీయ ఇంధన ఉత్పత్తిని కూడా పెంచుతున్నామని, 2030 నాటికి కోల్ ఇండియా, సింగరేణి, ఎన్ఎల్సీఐఎల్ సంస్థలు కలిసి సుమారు 22 గిగావాట్ల సౌర మరియు పవన విద్యుత్ ఉత్పత్తిని లక్ష్యంగా పెట్టుకున్నాయని కిషన్ రెడ్డి వివరించారు.
