హైదరాబాద్, మహా.
దేశ సరిహద్దుల్లో పహారా కాసే సైనికులు తమ చట్టపరమైన హక్కుల కోసం స్వదేశంలో మరో యుద్ధం చేయాల్సిన పరిస్థితి రాకూడదని సుప్రీంకోర్టు ప్రధాన న్యాయమూర్తి (సీజేఐ) జస్టిస్ సూర్యకాంత్ స్పష్టం చేశారు. సైనికులు ఎల్లప్పుడూ చట్టం వద్దకు రాలేరని, అందుకే చట్టమే వారి వద్దకు వెళ్లాలని ఆయన ఆకాంక్షించారు. కేంద్రపాలిత ప్రాంతమైన లేహ్లో జరిగిన ఒక కార్యక్రమంలో పాల్గొన్న సందర్భంగా ఆయన దేశ సైనికులకు మెరుగైన న్యాయ సదుపాయాల కల్పనపై కీలక ప్రసంగం చేశారు. న్యాయవ్యవస్థ రాజ్యాంగ విలువలను కాపాడుతుంటే, ఆ ఆదర్శాలు నిలబడటానికి అవసరమైన శాంతియుత పరిస్థితులను సైనికులు సృష్టిస్తున్నారని ఆయన కొనియాడారు.
ఈ సందర్భంగా 1962 నాటి రెజాంగ్ లా యుద్ధంలో మేజర్ శైతాన్ సింగ్ భాటి నాయకత్వంలో 114 మంది సైనికులు చేసిన ప్రాణత్యాగాలను జస్టిస్ సూర్యకాంత్ స్మరించుకున్నారు. ఒక దేశం తన సార్వభౌమత్వాన్ని, శాంతిని కాపాడుకోలేకపోతే అక్కడ స్వేచ్ఛ, న్యాయం గురించి మాట్లాడటం అర్థరహితమని ఆయన అభిప్రాయపడ్డారు. సరిహద్దుల్లో విధులు నిర్వర్తించే సైనికులు భూ వివాదాలు, సర్వీసు సంబంధిత సమస్యలు, పెన్షన్ జాప్యాలు లేదా కుటుంబ కలహాల వంటి ఇబ్బందులను ఎదుర్కోవాల్సి వస్తోందని, ఇటువంటి సమయంలో అధికార యంత్రాంగం ఉదాసీనంగా ఉండకూడదని హితవు పలికారు. సైనికులకు న్యాయం సులభంగా అందేలా చూడటం కేవలం సానుభూతికి సంబంధించిన విషయం మాత్రమే కాదని, అది ఒక రాజ్యాంగపరమైన విధి అని ఆయన పేర్కొన్నారు.
రక్షణ సిబ్బంది మరియు వారి కుటుంబాల సంక్షేమం కోసం తాను నేషనల్ లీగల్ సర్వీసెస్ అథారిటీ (నల్సా) కార్యనిర్వాహక అధ్యక్షుడిగా ఉన్నప్పుడు ప్రారంభించిన ‘వీర్ పరివార్ సహాయ యోజన’ గురించి సీజేఐ ఈ సందర్భంగా వివరించారు. ఈ పథకం ద్వారా ఇప్పటివరకు దేశవ్యాప్తంగా 14,929 మంది లబ్ధిదారులకు సహాయం అందించామని వెల్లడించారు. సాయుధ దళాల కోసం ప్రత్యేకంగా 438 న్యాయ సేవల క్లినిక్లను ఏర్పాటు చేశామని, ఇందులో 34 రాజ్య సైనిక్ బోర్డులు మరియు 404 జిల్లా సైనిక్ బోర్డులు భాగస్వాములుగా ఉన్నాయని చెప్పారు. ఈ సేవల కోసం రక్షణ రంగ నేపథ్యం ఉన్న వారితో సహా మొత్తం 1,123 మంది సిబ్బందిని నియమించినట్లు ఆయన తెలిపారు. ఆస్తి వివాదాల నుంచి పాఠశాల ప్రవేశాల వరకు సైనికుల ప్రయోజనాలను కాపాడటం ప్రతి ప్రభుత్వ సంస్థ నైతిక బాధ్యతని జస్టిస్ సూర్యకాంత్ పునరుద్ఘాటించారు.
