శ్మశానంలో గ్యాస్ ‘నిల్వలు’.
* భారీ రాకెట్ గుట్టురట్టు.
హైదరాబాద్, మహా.
నగరంలో అక్రమంగా గ్యాస్ సిలిండర్లను నిల్వ ఉంచి, బ్లాక్ మార్కెట్లో విక్రయిస్తున్న ఒక భారీ ముఠా గుట్టును పోలీసులు రట్టు చేశారు. గల్ఫ్ యుద్ధం కారణంగా దేశంలో నెలకొన్న ఎల్పీజీ కొరతను సాకుగా చూపుతూ, ప్రజల అవసరాలను ఆసరా చేసుకుని అధిక ధరలకు సిలిండర్లను విక్రయిస్తున్న పది మంది సభ్యుల ముఠాను సోమవారం పోలీసులు అరెస్ట్ చేశారు. బంజారాహిల్స్లోని ఒక శ్మశాన వాటికలో అత్యంత ప్రమాదకర రీతిలో అక్రమంగా నిల్వ ఉంచిన 414 గ్యాస్ సిలిండర్లను అధికారులు స్వాధీనం చేసుకున్నారు.
హైదరాబాద్ కమిషనర్ టాస్క్ఫోర్స్ మరియు బంజారాహిల్స్ పోలీసులు సంయుక్తంగా నిర్వహించిన ఈ జాయింట్ ఆపరేషన్లో కీలక విషయాలు వెలుగులోకి వచ్చాయి. నిందితులు కృత్రిమ కొరతను సృష్టించి, అక్రమంగా లాభం పొందేందుకు ప్రయత్నిస్తున్నారని నగర పోలీస్ కమిషనర్ వి.సి. సజ్జనార్ వెల్లడించారు. ఈ దాడుల్లో 414 సిలిండర్లతో పాటు వాటి తరలింపునకు ఉపయోగిస్తున్న 11 రవాణా వాహనాలను పోలీసులు సీజ్ చేశారు. వీటి మొత్తం విలువ సుమారు రూ. 21.88 లక్షలుగా ఉంటుందని పోలీసులు అంచనా వేస్తున్నారు. అక్రమ నిల్వలు మరియు బ్లాక్ మార్కెటింగ్కు పాల్పడే వారిపై కఠినమైన చట్టపరమైన చర్యలు తీసుకుంటామని సీపీ హెచ్చరించారు.
పోలీసుల కథనం ప్రకారం.. శంషాబాద్ కేంద్రంగా ‘మెట్రో గ్యాస్ ఏజెన్సీ’ని నిర్వహిస్తున్న మహ్మద్ అమీర్ ఈ అక్రమ దందాకు ప్రధాన సూత్రధారిగా వ్యవహరిస్తున్నాడు. బంజారాహిల్స్లోని నాగార్జున ఎక్స్ రోడ్ సమీపంలో ఉన్న ఒక శ్మశానంలో హెచ్పీ గ్యాస్ సిలిండర్లను నిబంధనలకు విరుద్ధంగా నిల్వ చేస్తూ, అవసరమైన వారికి అధిక ధరకు విక్రయిస్తున్నట్లు టాస్క్ఫోర్స్ డీసీపీ గైక్వాడ్ వైభవ్ రఘునాథ్ తెలిపారు. ఈ సమాచారం అందిన వెంటనే పోలీసులు దాడి చేసి ముఠాను అదుపులోకి తీసుకున్నారు. అరెస్ట్ అయిన వారిలో గ్యాస్ ఏజెన్సీ యజమానితో పాటు డెలివరీ బాయ్స్, డ్రైవర్లు మరియు కార్మికులు ఉన్నారు. స్వాధీనం చేసుకున్న వాహనాల్లో డీసీఎం వ్యాన్లు, బొలెరో వాహనాలు మరియు ఆటోలు ఉన్నాయని, నిందితులపై కేసు నమోదు చేసి తదుపరి దర్యాప్తు చేపడుతున్నట్లు పోలీసులు స్పష్టం చేశారు.
