నేతన్నల ఇంట ‘ఉచిత’ వెలుగులు.. నేటి నుంచే విద్యుత్ పథకం అమలు.

• నేటి నుంచే విద్యుత్ పథకం అమలు
•   93 వేల మగ్గాలకు 200 యూనిట్లు.
• 11 వేల మరమగ్గాలకు 500 యూనిట్లు ఉచితం.
• ఏడాదికి రూ. 150 కోట్ల భారం భరించనున్న ప్రజా ప్రభుత్వం.
•   నేతన్న కుటుంబానికి ఏడాదికి రూ. 8 వేల నుంచి రూ. 21 వేల వరకు ఆదా
•   అంతర్జాతీయ స్థాయిలో చేనేత వస్త్రాలకు బ్రాండింగ్.. విక్రయాలకు ప్రోత్సాహం.

విజయవాడ, మహా.

తెలంగాణలోని ప్రజా ప్రభుత్వం నేతన్నల పట్ల తన నిబద్ధతను చాటుకుంది. ఎన్నికల సమయంలో ఇచ్చిన హామీని కేవలం మాటగా కాకుండా ఒక బాధ్యతగా స్వీకరిస్తూ, రాష్ట్రంలోని చేనేత, మరమగ్గాల కార్మికుల జీవితాల్లో వెలుగులు నింపే లక్ష్యంతో ‘ఉచిత విద్యుత్’ పథకానికి శ్రీకారం చుట్టింది. బుధవారం (ఏప్రిల్ 1, 2026) నుంచి ఈ పథకం రాష్ట్రవ్యాప్తంగా అధికారికంగా అమల్లోకి వచ్చింది. మగ్గంపైనే ఆధారపడి జీవనం సాగిస్తున్న వేలాది కుటుంబాలకు ఈ నిర్ణయం పెద్ద ఊరటనివ్వనుంది.

ఈ పథకం ద్వారా రాష్ట్రవ్యాప్తంగా ఉన్న 93 వేల చేనేత మగ్గాలకు నెలకు 200 యూనిట్ల వరకు ఉచిత విద్యుత్తును ప్రభుత్వం సరఫరా చేయనుంది. అలాగే, 11,488 మరమగ్గాలకు (పవర్‌లూమ్స్) నెలకు 500 యూనిట్ల వరకు ఉచిత విద్యుత్ లభించనుంది. ఈ నిర్ణయం వల్ల ప్రభుత్వ ఖజానాపై ఏడాదికి సుమారు రూ. 150 కోట్ల అదనపు భారం పడనుంది. అయినప్పటికీ, నేతన్నల చిరునవ్వు, వారి సంక్షేమమే తమకు ముఖ్యమని ప్రభుత్వం స్పష్టం చేసింది. దీన్ని కేవలం విద్యుత్ రాయితీగానే కాకుండా, నేతన్నలు పడే కష్టానికి ప్రభుత్వం ఇస్తున్న గౌరవంగా, వారి వృత్తికి కల్పిస్తున్న భరోసాగా పేర్కొంది.

ఈ ఉచిత విద్యుత్ పథకం అమలుతో ఒక్కో చేనేత కుటుంబానికి ఏడాదికి రూ. 8 వేల నుంచి రూ. 21 వేల వరకు విద్యుత్ ఖర్చు ఆదా కానుంది. ఇది వారి ఆర్థిక స్థితిగతులను మెరుగుపరచడమే కాకుండా, వారి జీవన ప్రమాణాలను పెంచేందుకు దోహదపడుతుందని ప్రభుత్వం భావిస్తోంది. కేవలం విద్యుత్ రాయితీలతోనే సరిపెట్టకుండా, తెలంగాణ సంస్కృతికి ప్రతిబింబమైన చేనేత వస్త్రాలను గ్లోబల్ స్థాయికి తీసుకెళ్లేలా ప్రత్యేక బ్రాండింగ్ కల్పిస్తున్నట్లు ప్రభుత్వం వెల్లడించింది. చేనేత ఉత్పత్తుల అమ్మకాలను ప్రోత్సహించడం ద్వారా కార్మికులకు చేతినిండా పని, సరైన ఆదాయం వచ్చేలా చర్యలు చేపడుతోంది.

“మగ్గం దగ్గర కూర్చుని జీవితాన్ని వెళ్లదీస్తున్న ప్రతి నేతన్నకు ప్రజా ప్రభుత్వం అండగా ఉంటుంది. మీరు నేస్తున్నది కేవలం వస్త్రం కాదు.. మన సంస్కృతిని. మీ అభ్యున్నతే మా లక్ష్యం” అని ప్రభుత్వం ఈ సందర్భంగా భరోసా ఇచ్చింది. నేతన్నల కష్టాన్ని గుర్తించి, వారికి చేదోడు వాదోడుగా నిలబడటమే తమ ప్రభుత్వ ప్రధాన ఉద్దేశమని పునరుద్ఘాటించింది. ఈ పథకం ప్రారంభం పట్ల రాష్ట్రవ్యాప్తంగా ఉన్న నేతన్నలు హర్షం వ్యక్తం చేస్తున్నారు.