- ఆయుధాల దిగుమతిదారు నుంచి సరఫరాదారుగా నవభారతం.
- ఒకే ఏడాదిలో 62% వృద్ధి..85 దేశాలకు ‘మేడ్ ఇన్ ఇండియా’ ఆయుధాలు.
- 2030 నాటికి రూ.50 వేల కోట్లే లక్ష్యం.
ఢిల్లీ, మహా.
రక్షణ రంగంలో భారత్ సరికొత్త చరిత్రను లిఖించింది. ఒకప్పుడు ప్రపంచంలోనే అతిపెద్ద ఆయుధ దిగుమతిదారుగా ఉన్న దేశం, నేడు ప్రపంచ దేశాలకు యుద్ధ సామాగ్రిని సరఫరా చేసే కీలక శక్తిగా అవతరించింది. కేంద్ర ప్రభుత్వం ప్రతిష్ఠాత్మకంగా చేపట్టిన ‘ఆత్మనిర్భర్ భారత్’, ‘మేక్ ఇన్ ఇండియా’ నినాదాలు క్షేత్రస్థాయిలో అద్భుత ఫలితాలను ఇస్తూ, రక్షణ ఎగుమతుల్లో భారత్ను అగ్రపథాన నిలిపాయి. ముగిసిన 2025-26 ఆర్థిక సంవత్సరంలో భారత రక్షణ ఎగుమతులు గతంలో ఎన్నడూ లేని విధంగా రూ.38,424 కోట్ల మైలురాయిని అధిగమించాయి. ఈ చారిత్రాత్మక విజయాన్ని ధ్రువీకరిస్తూ కేంద్ర రక్షణ మంత్రి రాజ్ నాథ్ సింగ్ గురువారం కీలక ప్రకటన చేశారు. ఈ అసాధారణ వృద్ధి భారత రక్షణ పారిశ్రామిక శక్తికి నిదర్శనమని ఆయన కొనియాడారు.
గత ఆర్థిక సంవత్సరం (2024-25) తో పోలిస్తే ఈ ఏడాది రక్షణ ఎగుమతుల్లో ఏకంగా 62.66 శాతం అద్భుత వృద్ధి నమోదైంది. గత ఏడాది రూ.24,000 కోట్లుగా ఉన్న ఎగుమతుల విలువ, ఈసారి అదనంగా రూ.14,802 కోట్లు పెరగడం గమనార్హం. ప్రధాని నరేంద్ర మోదీ నాయకత్వంలో తీసుకున్న సంస్కరణలు రక్షణ రంగాన్ని సమూలంగా మార్చివేశాయని రక్షణ మంత్రి పేర్కొన్నారు. ఈ రికార్డు స్థాయి ఎగుమతుల్లో ప్రభుత్వ రంగ సంస్థలు (PSUs) 54.84 శాతం వాటాతో అగ్రస్థానంలో నిలవగా, ప్రైవేటు రంగం 45.16 శాతం వాటాతో గట్టి పోటీనిస్తోంది. ముఖ్యంగా స్టార్టప్లు, భారీ పరిశ్రమలు రక్షణ తయారీలోకి రావడం వల్ల నాణ్యతతో కూడిన ఉత్పత్తులు అంతర్జాతీయ ప్రమాణాలకు అనుగుణంగా తయారవుతున్నాయి. భవిష్యత్తులో రక్షణ ఉత్పత్తిలో ప్రైవేటు భాగస్వామ్యాన్ని 50 శాతానికి పెంచడమే లక్ష్యంగా ప్రభుత్వం అడుగులు వేస్తోంది.
భారత నౌకాదళం సాధించిన పురోగతి ఈ విజయ ప్రస్థానంలో ఎంతో కీలకమైనది. ప్రస్తుతం భారత నౌకాదళం వినియోగిస్తున్న ప్రతి యుద్ధనౌక, సబ్మెరైన్ స్వదేశీ షిప్యార్డుల్లోనే రూపుదిద్దుకుంటుండటం గర్వకారణమని రాజ్ నాథ్ సింగ్ అభివర్ణించారు. మన దేశం తయారు చేస్తున్న తేలికపాటి యుద్ధ విమానాలు బ్రహ్మోస్ క్షిపణులు, పినాక మల్టీ-బారెల్ రాకెట్ లాంచర్లు, అధునాతన రాడార్లు మరియు యుద్ధనౌకలకు ప్రపంచవ్యాప్తంగా విపరీతమైన డిమాండ్ పెరుగుతోంది. ప్రస్తుతం సుమారు 85 కంటే ఎక్కువ దేశాలకు భారత్ తన రక్షణ పరికరాలను సరఫరా చేస్తోంది. తక్కువ ఖర్చుతో అత్యున్నత సాంకేతికతను అందించడం వల్ల అనేక దేశాలు భారతీయ ఉత్పత్తుల పట్ల ఆసక్తి చూపుతున్నాయి.
రక్షణ రంగంలో సాధిస్తున్న ఈ పురోగతి కేవలం సైనిక శక్తిని పెంచడమే కాకుండా, దేశ ఆర్థిక వ్యవస్థకు కూడా గట్టి ఊతానిస్తోంది. భారీ ఎత్తున ఎగుమతులు జరగడం వల్ల విదేశీ మారక ద్రవ్యం దేశంలోకి వస్తుండటమే కాకుండా, తయారీ రంగం విస్తరణతో లక్షలాది మంది యువతకు ఉపాధి అవకాశాలు లభిస్తున్నాయి. రక్షణ ప్రాజెక్టుల వల్ల వేలాది సూక్ష్మ, చిన్న, మధ్య తరహా పరిశ్రమలు లబ్ధి పొందుతున్నాయి. 2029-30 ఆర్థిక సంవత్సరం నాటికి రక్షణ ఎగుమతులను రూ.50,000 కోట్లకు చేర్చాలని కేంద్రం ప్రతిష్టాత్మక లక్ష్యాన్ని నిర్దేశించుకుంది. ఆ దిశగా దేశీయ రక్షణ ఉత్పత్తిని ఇప్పటికే రూ.1.50 లక్షల కోట్లు దాటించిన ప్రభుత్వం, రాబోయే రోజుల్లో దిగుమతులపై ఆధారపడటాన్ని పూర్తిగా తగ్గించి, స్వయం సమృద్ధి సాధించడమే లక్ష్యంగా ముందుకు సాగుతోంది.
