- ఆంధ్రుల ఆత్మగౌరవ విజయం… పవన్ కల్యాణ్.
- రాజ్యసభలోనూ బిల్లు పాస్.. కుట్రలు, అపోహల కోటలు బద్ధలు.. డిప్యూటీ సీఎం హర్షం.
- ఇళ్ల ముందు దీపాలు వెలిగించి పండుగ చేసుకోండి.. జనసైనికులకు పిలుపు.
అమరావతి, మహా.
ఆంధ్రప్రదేశ్ రాజధానిగా అమరావతికి చట్టబద్ధత కల్పించే బిల్లు రాజ్యసభలోనూ ఘనవిజయం సాధించడం పట్ల రాష్ట్ర ఉపముఖ్యమంత్రి, జనసేన అధినేత పవన్ కల్యాణ్ అత్యంత హర్షం వ్యక్తం చేశారు. గత కొన్నేళ్లుగా రాజధాని ఉనికిపై సాగిన కుట్రలు, అపోహలు, సృష్టించిన న్యాయపరమైన చిక్కులన్నింటినీ అధిగమించి, నేడు పార్లమెంట్ సాక్షిగా అమరావతి ఒక అజేయమైన శక్తిగా అవతరించిందని ఆయన అభివర్ణించారు. లోక్సభ తరహాలోనే రాజ్యసభలోనూ బిల్లు నెగ్గడంతో రాజధానిగా అమరావతికి ఇక ఎదురులేదని, ఇది ఐదు కోట్ల ఆంధ్రులు సగర్వంగా తలెత్తుకుని గర్వించదగ్గ సువర్ణ అధ్యాయమని ఆయన కొనియాడారు. రాజధానిపై కొనసాగిన అనిశ్చితికి తెరపడి, శాశ్వత ప్రాతిపదికన చట్టబద్ధత లభించడం రాష్ట్ర ప్రజలందరికీ లభించిన గొప్ప విజయమని డిప్యూటీ సీఎం స్పష్టం చేశారు.
అమరావతికి చట్టబద్ధత లభించిన ఈ క్షణాలు చారిత్రాత్మకమని, రాష్ట్ర ప్రజలందరూ గర్వించే సమయమని పవన్ కల్యాణ్ పేర్కొన్నారు. ఈ చట్టబద్ధతతో అమరావతి ఇకపై ఆంధ్రప్రదేశ్ శాశ్వత రాజధానిగా సుస్థిర స్థానాన్ని పొందిందని, దీనిపై ఎవరూ ఎటువంటి అనుమానాలు పెట్టుకోవాల్సిన అవసరం లేదని ఆయన హామీ ఇచ్చారు. పార్లమెంటులో ఈ బిల్లుకు సంపూర్ణ మద్దతు తెలిపి, ఆంధ్రుల ఆకాంక్షను గౌరవించిన వివిధ రాజకీయ పార్టీలకు, పార్లమెంట్ సభ్యులకు ఆయన హృదయపూర్వక ధన్యవాదాలు తెలియజేశారు. అమరావతికి లభించిన ఈ అఖండ విజయం రాష్ట్ర అభివృద్ధి పథంలో ఒక మైలురాయిగా నిలుస్తుందని, భవిష్యత్తులో ఈ నగరం ప్రపంచ స్థాయి రాజధానిగా దూసుకుపోతుందని ఆయన ఆశాభావం వ్యక్తం చేశారు.
అమరావతికి చట్టబద్ధత లభించడాన్ని జీర్ణించుకోలేక ఇప్పటికీ కొందరు విషం చిమ్ముతున్నారని, అటువంటి వారికి రాబోయే రోజుల్లో ప్రజలే స్వయంగా గుణపాఠం నేర్పిస్తారని పవన్ కల్యాణ్ హెచ్చరించారు. అమరావతి అభివృద్ధికి కట్టుబడి ఉంటూ, ఈ బిల్లును పార్లమెంటులో విజయవంతంగా ముందుకు తీసుకెళ్లిన ప్రధానమంత్రి నరేంద్ర మోదీ, కేంద్ర హోంమంత్రి అమిత్ షాకు ఆంధ్రప్రదేశ్ ప్రజల తరఫున ప్రత్యేక కృతజ్ఞతలు తెలియజేశారు. కేంద్ర ప్రభుత్వం అందించిన ఈ బలమైన తోడ్పాటుతో రాష్ట్ర ప్రగతి వేగవంతం అవుతుందని ఆయన ధీమా వ్యక్తం చేశారు. సంక్షోభ సమయాల్లోనూ రాజధాని కోసం నిలబడిన రైతులు, మహిళలు, యువత పోరాటానికి నేడు తగిన ప్రతిఫలం దక్కిందని ఆయన పేర్కొన్నారు.
ఈ చరిత్రాత్మక విజయాన్ని పురస్కరించుకొని రాష్ట్రవ్యాప్తంగా కూటమి పక్షాల ఆధ్వర్యంలో నిర్వహించే విజయ ఉత్సవాల్లో జనసేన నాయకులు, కార్యకర్తలు, వీరమహిళలు పెద్ద ఎత్తున భాగస్వామ్యం కావాలని పవన్ కల్యాణ్ పిలుపునిచ్చారు. ఇది కేవలం ఒక రాజకీయ విజయం మాత్రమే కాదని, రాష్ట్రాన్ని కాపాడుకున్న పండుగ అని ఆయన అభివర్ణించారు. ప్రతి ఒక్కరూ తమ ఇళ్ల ముందు, పార్టీ కార్యాలయాల వద్ద దీపాలు వెలిగించి అమరావతి విజయోత్సవాన్ని ఘనంగా జరుపుకోవాలని కోరారు. చీకటి రోజులు గడిచిపోయాయని, అమరావతి వెలుగులతో రాష్ట్రం మళ్లీ వెలిగిపోవాలని ఆయన ఆకాంక్షించారు. కూటమి ప్రభుత్వ హయాంలో అమరావతిని అన్ని రంగాల్లో అగ్రగామిగా తీర్చిదిద్దడమే తమ తదుపరి లక్ష్యమని ఆయన స్పష్టం చేశారు.
