సత్తుపల్లి సైబర్ స్కామ్‌లో ప్రకంపనలు..! మరో ముగ్గురు బ్యాంక్ ఉద్యోగులు కటకటాల్లోకి..!

• మరో ముగ్గురు బ్యాంక్ ఉద్యోగులు కటకటాల్లోకి!
•   550 కోట్ల దోపిడీ.. అంతర్జాతీయ ముఠాతో లింకులు.
• సైబర్ కేటుగాళ్ల బండారం బయటపెట్టిన పోలీసులు!
•   బ్యాంక్ ఉద్యోగులే సూత్రధారులా?: సత్తుపల్లి సీఐ వేటలో దొరికిన మరికొందరు నిందితులు!
•   క్రిప్టో నుంచి మ్యాట్రిమోనీ వరకు.. సత్తుపల్లిలో అంతుచిక్కని సైబర్ మాయాజాలం!

హైదరాబాద్, మహా.

సత్తుపల్లి సైబర్ నేరాల కేసు రోజుకో మలుపు తిరుగుతూ ప్రజలను విస్మయానికి గురిచేస్తోంది. దాదాపు 549.95 కోట్ల రూపాయల భారీ కుంభకోణానికి సంబంధించి పోలీసులు దర్యాప్తును ముమ్మరం చేశారు. తాజాగా ఈ కేసులో మరో ముగ్గురు బ్యాంక్ ఉద్యోగులను పోలీసులు అరెస్టు చేయడం కలకలం రేపుతోంది. సైబర్ నేరగాళ్లకు సహకరిస్తూ, నిబంధనలకు విరుద్ధంగా వ్యవహరించిన సీఆర్‌వోలు ఓర్సు కృప, మంద శ్రీహరిబాబు, బీఆర్‌వో జుంజునూరి రాధాకృష్ణను సత్తుపల్లి సీఐ శ్రీహరి ఆధ్వర్యంలోని బృందం అదుపులోకి తీసుకుంది. ఈ ముగ్గురిని విచారించగా విస్తుపోయే నిజాలు వెలుగులోకి వచ్చాయి.

ఈ భారీ స్కామ్‌లో ఇప్పటికే ఉడతనేని వికాస్ చౌదరి, బొప్పన నాగప్రియతో పాటు చండ్రుగొండకు చెందిన బ్యాంక్ మేనేజర్ అఖిల్ అబ్దుల్ అరెస్టయి జైలులో ఉన్న సంగతి తెలిసిందే. అయితే విచారణ సాగుతున్న కొద్దీ ఈ నెట్వర్క్ ఎంత లోతుగా ఉందో అర్థమవుతోంది. తాజాగా పట్టుబడిన ముగ్గురు నిందితులు నిబంధనలను తుంగలో తొక్కి ప్రధాన నిందితులకు అన్ని రకాలుగా సహకరించినట్లు పోలీసులు గుర్తించారు. నిందితులందరినీ కోర్టులో హాజరుపరిచి జ్యుడీషియల్ రిమాండ్‌కు తరలించినట్లు ఏసీపీ వసుంధర యాదవ్ అధికారికంగా వెల్లడించారు. ఈ కేసులో మొత్తం 24 మందిపై కేసులు నమోదు కాగా, పోలీసులు ఇప్పటికే మెజారిటీ నిందితులను కటకటాల్లోకి పంపారు.

నిందితులంతా అంతర్జాతీయ సైబర్ నేరగాళ్లతో చేతులు కలిపి ఈ భారీ దందాకు తెరలేపినట్లు విచారణలో తేలింది. కేవలం ఒకే రకమైన మోసం కాకుండా షేర్ మార్కెట్ పెట్టుబడులు, ఆన్‌లైన్ బెట్టింగ్, మ్యాట్రిమోనీ వెబ్‌సైట్లు, రివార్డ్ పాయింట్ల ఆశ చూపడం, ఆన్‌లైన్ గేమింగ్, క్రిప్టో కరెన్సీ వంటి విభిన్న మార్గాల ద్వారా అమాయకుల సొమ్మును దోచుకున్నట్లు ఆధారాలు లభించాయి. విదేశాల్లో కూర్చున్న ప్రధాన సూత్రధారులకు ఇక్కడి బ్యాంక్ సిబ్బంది వెన్నుదన్నుగా నిలిచి ఖాతాలను తెరవడం, లావాదేవీలను సులభతరం చేయడం వంటి పనులకు పాల్పడ్డారు. రూ. 550 కోట్లు చేతులు మారాయంటే ఈ ముఠా ఎంత పక్కాగా స్కెచ్ వేసిందో అర్థం చేసుకోవచ్చు. ఖమ్మం జిల్లాలో సంచలనం రేపుతున్న ఈ కేసులో ఇంకా ఎవరెవరి ప్రమేయం ఉందనే కోణంలో పోలీసులు లోతుగా ఆరా తీస్తున్నారు. రానున్న రోజుల్లో మరిన్ని అరెస్టులు జరిగే అవకాశం ఉందని సమాచారం.