- డ్రంక్ డ్రైవ్ వాహనాల సీజ్ నిషిద్ధం.
- పోలీసులకు హైకోర్టు కీలక దిశానిర్దేశం.
- మద్యం మత్తులో వాహనం ఆపలేరు..హైకోర్టు.
హైదరాబాద్, మహా.
డ్రంక్ అండ్ డ్రైవ్ తనిఖీల పేరుతో వాహనదారులను ఇబ్బందులకు గురిచేస్తున్న పోలీసుల తీరుపై తెలంగాణ హైకోర్టు మరోసారి ఘాటుగా స్పందించింది. మద్యం సేవించి వాహనం నడుపుతూ దొరికిపోయిన సందర్భంలో, సదరు వాహనాన్ని సీజ్ చేసే అధికారం పోలీసులకు లేదని న్యాయస్థానం అత్యంత స్పష్టంగా తీర్పునిచ్చింది. మోటార్ వాహనాల చట్టం ప్రకారం కేవలం మద్యం సేవించిన వ్యక్తిపై చర్యలు తీసుకోవాలే తప్ప, వాహనాన్ని పోలీస్ స్టేషన్కు తరలించడం చట్టవిరుద్ధమని ధర్మాసనం పేర్కొంది. ఈ విషయంలో గతంలో ఇచ్చిన ఉత్తర్వులను పోలీసులు బేఖాతరు చేయడంపై అసహనం వ్యక్తం చేస్తూ, క్షేత్రస్థాయిలో అమలు చేయాల్సిన విధివిధానాలను మరోసారి వివరించింది. వాహనదారుల హక్కులను కాపాడుతూనే, రహదారి భద్రతను ఎలా పర్యవేక్షించాలో పోలీసులకు దిశానిర్దేశం చేసింది.
ఒకవేళ డ్రంక్ అండ్ డ్రైవ్ తనిఖీల్లో వాహనదారుడు మద్యం సేవించినట్లు నిర్ధారణ అయితే, ఆ సమయంలో వాహనంలో ఉన్న ఇతరులలో ఎవరైనా మద్యం సేవించకుండా ఉంటే వారికి వాహనాన్ని అప్పగించాలని కోర్టు సూచించింది. ఒకవేళ వాహనంలో మద్యం సేవించని వారు ఎవరూ లేని పక్షంలో, సదరు వ్యక్తికి తన బంధువులు లేదా స్నేహితులకు ఫోన్ చేసే అవకాశం కల్పించాలని ఆదేశించింది. సమాచారం అందుకున్న వారు అక్కడికి చేరుకుని సరైన ధ్రువపత్రాలు చూపితే, వారికి వాహనాన్ని అప్పగించి పంపించివేయాలి తప్ప, స్టేషన్కు తీసుకెళ్లకూడదని స్పష్టం చేసింది. ఒకవేళ ఎవరూ రాని పక్షంలో మాత్రమే భద్రతా కారణాల దృష్ట్యా వాహనాన్ని పోలీసుల ఆధీనంలో ఉంచుకోవాలని, అయితే మరుసటి రోజు ఉదయం సరైన వ్యక్తి వచ్చి అడిగిన వెంటనే వాహనాన్ని విడుదల చేయాలని నిబంధనలను కఠినతరం చేసింది.
పోలీసులు వాహనాలను సీజ్ చేసి రోజుల తరబడి స్టేషన్లలో ఉంచడం వల్ల వాహనాలు పాడవుతున్నాయని, ఇది యజమానులకు తీవ్ర ఆర్థిక నష్టాన్ని కలిగిస్తుందని హైకోర్టు అభిప్రాయపడింది. నిబంధనల అతిక్రమణ జరిగితే చట్టం ప్రకారం జరిమానా విధించడం లేదా లైసెన్స్ రద్దు చేయడం వంటి చర్యలు చేపట్టాలే తప్ప, ఆస్తిని స్వాధీనం చేసుకోవడం సరైన పద్ధతి కాదని పేర్కొంది. ఈ తీర్పుతో వాహనదారులకు పెద్ద ఎత్తున ఊరట లభించినట్లయింది. ముఖ్యంగా రాత్రి వేళల్లో వాహనాలు సీజ్ చేయడం వల్ల మహిళలు, వృద్ధులు ఎదుర్కొంటున్న ఇబ్బందులను కూడా న్యాయస్థానం పరిగణనలోకి తీసుకుంది. ఇకపై ఈ నిబంధనలను అతిక్రమించే అధికారులపై కఠిన చర్యలు తీసుకోవాల్సి ఉంటుందని హెచ్చరిస్తూ, తక్షణమే ఈ ఆదేశాలను అమలు చేయాలని పోలీస్ శాఖను ఆదేశించింది. ఒక వ్యక్తి చేసిన తప్పుకు వాహనాన్ని శిక్షించడం న్యాయసమ్మతం కాదని హైకోర్టు తేల్చి చెప్పింది.
