నల్ల బంగారపు నిల్వల్లో వెనిజులా హవా..

• 303 బిలియన్ బ్యారెళ్లతో అగ్రస్థానం.
•  చమురు నిల్వలపై 2024 నివేదిక.. 22వ స్థానంలో భారత్!
•  ఆర్థిక వ్యవస్థలకు ఊపిరిపోస్తున్న క్రూడ్ ఆయిల్.

ఢిల్లీ, మహా.

ప్రపంచ పారిశ్రామిక ప్రగతికి, రవాణా వ్యవస్థకు మూలాధారమైన ముడి చమురు నిల్వలకు సంబంధించిన తాజా నివేదిక అంతర్జాతీయ వేదికపై ఆసక్తికర చర్చకు దారితీస్తోంది. ఆధునిక ప్రపంచంలో ఏ దేశం ఎంతటి ఆర్థిక శక్తిగా ఎదగాలన్నా, ఆ దేశం వద్ద ఉన్న ఇంధన వనరులే ప్రామాణికంగా మారుతున్నాయి. ఈ క్రమంలో 2024 సంవత్సరాంతానికి అందుబాటులో ఉన్న గణాంకాల ప్రకారం, దక్షిణ అమెరికా దేశమైన వెనిజులా ఏకంగా 303 బిలియన్ బ్యారెళ్ల నిల్వలతో ప్రపంచంలోనే అగ్రస్థానంలో నిలిచి అందరినీ విస్తుపోయేలా చేస్తోంది. అపారమైన చమురు నిల్వలు ఉన్నప్పటికీ, రాజకీయ అనిశ్చితి మరియు అంతర్జాతీయ ఆంక్షల వల్ల ఆ దేశం ఆశించిన స్థాయిలో ఆర్థిక వృద్ధిని సాధించలేకపోవడం గమనార్హం. వెనిజులా తర్వాత స్థానంలో సౌదీ అరేబియా 267 బిలియన్ బ్యారెళ్లతో తన ఆధిపత్యాన్ని కొనసాగిస్తోంది. గల్ఫ్ దేశాలైన ఇరాన్, ఇరాక్, యూఏఈ మరియు కువైట్ దేశాలు వరుసగా మూడు, ఐదు, ఆరు మరియు ఏడవ స్థానాల్లో నిలవడం ద్వారా ప్రపంచ చమురు సరఫరాలో మధ్యప్రాచ్యం యొక్క తిరుగులేని ప్రాముఖ్యతను మరోసారి చాటిచెప్పాయి. కెనడా 163 బిలియన్ బ్యారెళ్లతో నాలుగవ స్థానంలో నిలవడం విశేషం. ఇందులో అధిక శాతం చమురు ఇసుక రూపంలో ఉండటం వల్ల వెలికితీత ఖర్చుతో కూడుకున్న పని అయినప్పటికీ, ఉత్తర అమెరికా ఖండంలో కెనడా ఒక కీలక ఇంధన శక్తిగా అవతరించింది. మరోవైపు, అగ్రరాజ్యమైన అమెరికా 45 బిలియన్ బ్యారెళ్లతో పదవ స్థానంలో ఉంది. అమెరికా చమురు ఉత్పత్తిలో ప్రపంచంలోనే అగ్రగామిగా ఉన్నప్పటికీ, నిల్వల పరంగా చూస్తే రష్యా (80 బిలియన్ బ్యారెళ్లు) మరియు లిబియా (48 బిలియన్ బ్యారెళ్లు) కంటే వెనుకబడి ఉండటం గమనార్హం. ఇది భవిష్యత్తులో అమెరికా తన అవసరాల కోసం ఇతర దేశాలపై ఆధారపడాల్సిన పరిస్థితిని సూచిస్తోంది. నైజీరియా, కజకిస్తాన్, చైనా వంటి దేశాలు కూడా చెప్పుకోదగ్గ స్థాయిలో నిల్వలను కలిగి ఉండి, తమ ప్రాంతీయ ఆర్థిక వ్యవస్థలను శాసిస్తున్నాయి.

భారతదేశ పరిస్థితిని గమనిస్తే, 5 బిలియన్ బ్యారెళ్ల నిల్వలతో మన దేశం 22వ స్థానంలో ఉంది. సుమారు 140 కోట్లకు పైగా జనాభా కలిగిన భారత్ వంటి భారీ వినియోగదారు దేశానికి ఈ నిల్వలు ఏమాత్రం సరిపోవని విశ్లేషకులు అభిప్రాయపడుతున్నారు. మనం ఏటా వినియోగించే చమురులో దాదాపు 85 శాతం దిగుమతుల ద్వారానే పొందుతున్నాం. అరేబియా సముద్రం , బంగాళాఖాతంలో కొత్త నిల్వలను కనుగొనేందుకు ప్రయత్నాలు జరుగుతున్నప్పటికీ, మన అవసరాలకు అనుగుణంగా ఉత్పత్తి పెరగకపోవడం ఒక సవాలుగా మారింది. సుడాన్, ఓమాన్ వంటి దేశాలతో సమానంగా మన నిల్వలు ఉండటం వల్ల, అంతర్జాతీయ మార్కెట్‌లో చమురు ధరలు పెరిగిన ప్రతిసారీ భారత రూపాయి విలువ పడిపోవడం మరియు ద్రవ్యోల్బణం పెరగడం వంటి సమస్యలు తలెత్తుతున్నాయి. దీనిని అడ్డుకోవడానికి భారత్ ఇప్పుడు గ్రీన్ ఎనర్జీ , ఎలక్ట్రిక్ వాహనాల వైపు మొగ్గు చూపుతోంది.