- 861 ఎకరాలకు పకడ్బందీగా ఫెన్సింగ్.
- యుద్ధ ప్రాతిపదికన హైడ్రా ఆపరేషన్.
- భరోసా ఇస్తున్న కూల్చివేతలు.
హైదరాబాద్, మహా.
అమీన్పూర్ పరిధిలోని ప్రభుత్వ భూములను కబ్జాదారుల చెర నుంచి విడిపించేందుకు హైడ్రా చేపట్టిన బృహత్తర ఆపరేషన్ విజయవంతంగా కొనసాగుతోంది. శనివారం ఉదయం ప్రారంభమైన ఈ ఆక్రమణల తొలగింపు ప్రక్రియ, ఆదివారం కూడా యుద్ధ ప్రాతిపదికన సాగింది. సుమారు 861 ఎకరాల విస్తీర్ణంలోని ఖాళీ ప్రభుత్వ భూములకు రక్షణ కవచంలా ఫెన్సింగ్ నిర్మించే పనులు దాదాపు పూర్తి కావచ్చాయి. కబ్జాదారుల కబందహస్తాల్లో చిక్కుకున్న విలువైన భూమిని కాపాడటమే లక్ష్యంగా హైడ్రా అధికారులు క్షేత్రస్థాయిలో ఉండి ఈ పనులను పర్యవేక్షిస్తున్నారు. ఈ చర్యలతో అమీన్పూర్ ప్రాంతంలో భూమాఫియా గుండెల్లో రైళ్లు పరిగెడుతుండగా, సామాన్య ప్రజలు మాత్రం హర్షం వ్యక్తం చేస్తున్నారు.
ఈ ఆపరేషన్లో భాగంగా ముఖీం సోదరుడు అజీమ్ అక్రమంగా నిర్మించిన ఆరు అంతస్తుల భారీ భవనాన్ని కూల్చివేసే ప్రక్రియ అత్యంత కీలకంగా మారింది. ఇప్పటికే ఈ భవనం 90 శాతం మేర నేలమట్టమైంది. కూల్చివేత సమయంలో పక్కనే ఉన్న అపార్ట్మెంట్లకు ఎలాంటి నష్టం కలగకుండా అధికారులు అత్యంత జాగ్రత్తలు తీసుకుంటున్నారు. భద్రతా ప్రమాణాలను పాటిస్తూ సాగుతున్న ఈ కూల్చివేతకు కొంత సమయం పడుతున్నప్పటికీ, అక్రమ నిర్మాణాన్ని వదిలిపెట్టే ప్రసక్తే లేదని అధికారులు స్పష్టం చేశారు. ప్రభుత్వ ఆస్తులను ఆక్రమించి కోట్లాది రూపాయలు కొల్లగొట్టిన వారి పట్ల హైడ్రా కఠినంగా వ్యవహరిస్తుండటం విశేషం.
గతంలో భూకబ్జాదారుల అరాచకాలతో భయం భయంగా గడిపిన స్థానికులు, హైడ్రా రాకతో ఇప్పుడు నిశ్చింతగా ఉన్నారు. తమ ఇళ్లను కూల్చబోమని ప్రభుత్వం ఇచ్చిన భరోసాపై వారు ధీమా వ్యక్తం చేస్తున్నారు. వందల ఎకరాలను మాయం చేసి, అక్రమంగా సంపాదించిన గూండాల భరతం పడుతున్న హైడ్రా చర్యలను స్థానికులు బాహాటంగానే అభినందిస్తున్నారు. కబ్జాలకు గురవుతున్న ఖాళీ స్థలాలకు ఫెన్సింగ్ వేయడం ద్వారా భవిష్యత్తులో ఆ భూములను ప్రజల అవసరాల కోసం వినియోగించే అవకాశం ఉంటుందని వారు అభిప్రాయపడుతున్నారు. ప్రభుత్వానికి, హైడ్రాకు కృతజ్ఞతలు తెలుపుతూ పలుచోట్ల సంబరాలు కూడా చేసుకున్నారు.
హైడ్రా అంటే కేవలం కూల్చివేతలు మాత్రమే కాదని, అది సామాన్యుడికి ఇచ్చే భరోసా అని ఈ చర్యలతో మరోసారి నిరూపితమైంది. వందల కోట్ల విలువైన ప్రభుత్వ భూమిని కాపాడటమే కాకుండా, భూ కబ్జాదారులకు సింహస్వప్నంలా మారిన హైడ్రా తీరుపై సర్వత్రా ప్రశంసలు వ్యక్తమవుతున్నాయి. ఆక్రమణల తొలగింపు ప్రక్రియ ముగిసిన వెంటనే, రక్షణ గోడలు మరియు ఫెన్సింగ్ నిర్మాణాలు పూర్తి చేసి భూమిని రెవెన్యూ శాఖకు అప్పగించేందుకు అధికారులు కసరత్తు చేస్తున్నారు. నిబంధనలను అతిక్రమిస్తే ఎవరైనా సరే చట్టానికి తలవంచాల్సిందేనన్న గట్టి సందేశాన్ని హైడ్రా ఈ ఆపరేషన్ ద్వారా పంపింది.
