- రాష్ట్రం రూ.2,550 కోట్లు జమ చేయాల్సిందే!
- కొత్త ఉపాధి పథకంపై తెలంగాణ సందిగ్ధం.
- కేబినెట్ నిర్ణయమే కీలకం!
- కూలీల వేతనాలపై ప్రభావం?
- నిధుల విడుదలతో రాజకీయ చర్చ!
- పాత ఉపాధి హామీకి బదులు కొత్త వ్యవస్థ.
హైదరాబాద్, మహా.
గ్రామీణ ఉపాధి వ్యవస్థలో దేశవ్యాప్తంగా కీలక మార్పులకు శ్రీకారం చుడుతూ కేంద్ర ప్రభుత్వం కొత్త ఉపాధి చట్టాన్ని అమల్లోకి తీసుకొచ్చింది. ఈ నేపథ్యంలో తెలంగాణకు తొలి విడతగా రూ.3,825.31 కోట్ల కేంద్ర వాటా విడుదలైంది. అయితే ఈ నిధులను పూర్తిగా వినియోగించుకోవాలంటే రాష్ట్ర ప్రభుత్వం తన వాటాగా రూ.2,550.21 కోట్లు ఉమ్మడి ఖాతాలో జమ చేయాల్సి ఉంది. రాష్ట్రం తన వాటా చెల్లించకపోతే కూలీల వేతనాల చెల్లింపులు, పనుల అమలు ప్రభావితమయ్యే అవకాశం ఉందనే చర్చ జరుగుతోంది. మరోవైపు ఈ కొత్త విధానాన్ని తెలంగాణ ప్రభుత్వం వ్యతిరేకిస్తున్న నేపథ్యంలో కేబినెట్ సమావేశంలో తీసుకునే నిర్ణయంపై తీవ్ర ఉత్కంఠ నెలకొంది.
కేంద్రం భారీ నిధుల విడుదల
గ్రామీణ ఉపాధి, జీవనోపాధి బలోపేతమే లక్ష్యంగా కేంద్ర ప్రభుత్వం అమల్లోకి తెచ్చిన కొత్త పథకం కింద తెలంగాణకు రూ.3,825.31 కోట్ల కేంద్ర వాటాను విడుదల చేసింది. దేశవ్యాప్తంగా కొత్త విధానం అమలుకు మధ్యంతరంగా భారీ మొత్తాన్ని కేటాయించిన కేంద్రం, రాష్ట్రాల్లో పనులు ఎక్కడా ఆగకుండా ముందస్తు చర్యలు చేపట్టింది.
అరవై – నలభై నిధుల విధానం
ఈ పథకంలో వ్యయభారం కేంద్రం, రాష్ట్రం కలిసి భరించాల్సి ఉంటుంది. కేంద్రం 60 శాతం, రాష్ట్రం 40 శాతం వాటా చెల్లించాల్సి ఉంటుంది. కేంద్రం తన వాటా నిధులను ఇప్పటికే ఉమ్మడి ఖాతాలో జమ చేసింది. ఇప్పుడు తెలంగాణ ప్రభుత్వం రూ.2,550.21 కోట్ల రాష్ట్ర వాటాను జమ చేసిన తర్వాతే పూర్తి స్థాయిలో పనులు, కూలీలకు వేతనాల చెల్లింపులు కొనసాగుతాయని అధికారులు చెబుతున్నారు. ఈ కొత్త నిధుల భాగస్వామ్య విధానం రాష్ట్రాలపై అదనపు ఆర్థిక భారం పెంచుతుందనే అభిప్రాయాలు వ్యక్తమవుతున్నాయి.
కొత్త ఉపాధి వ్యవస్థలో కీలక మార్పులు
కొత్త చట్టం ద్వారా గ్రామీణ కుటుంబాలకు లభించే ఉపాధి హామీని 100 రోజుల నుంచి 125 రోజులకు పెంచారు. రోజువారీ కనీస వేతనాన్ని రూ.300 కంటే తక్కువ కాకుండా నిర్ణయించారు. గ్రామీణ మౌలిక సదుపాయాల అభివృద్ధి, నీటి సంరక్షణ, వ్యవసాయ అనుబంధ పనులు, మహిళా స్వయం సహాయక సంఘాల భాగస్వామ్యం, సాంకేతిక ఆధారిత పారదర్శక వ్యవస్థకు ఇందులో ప్రాధాన్యం ఇచ్చారు. ఆధార్ అనుసంధానం, ఈ-కేవైసీ, డిజిటల్ పర్యవేక్షణకు కూడా కొత్త చట్టంలో ఎక్కువ ప్రాధాన్యం కల్పించారు.
తెలంగాణ ప్రభుత్వ అభ్యంతరాలు
కొత్త పథకంలోని నిధుల పంపిణీ విధానం, రాష్ట్ర అధికారాలపై ప్రభావం చూపే నిబంధనలు, కేంద్ర ఆధిపత్యం పెరిగే అవకాశం వంటి అంశాలపై తెలంగాణ ప్రభుత్వం అభ్యంతరాలు వ్యక్తం చేస్తోంది. ఇదే అంశంపై ఇతర రాష్ట్రాలతో కూడా సంప్రదింపులు జరిపి ఉమ్మడి వ్యూహాన్ని రూపొందించే దిశగా రాష్ట్ర ప్రభుత్వం కసరత్తు చేస్తున్నట్లు సమాచారం.
కేబినెట్ నిర్ణయంపై ఉత్కంఠ
ఈ నేపథ్యంలో ఈరోజు జరిగే తెలంగాణ మంత్రివర్గ సమావేశంలో ఈ పథకంపై కీలక నిర్ణయం తీసుకునే అవకాశం ఉన్నట్లు అధికార వర్గాలు సూచిస్తున్నాయి. రాష్ట్ర వాటా నిధులు విడుదల చేయాలా, లేక కేంద్రంతో మరింత చర్చలు జరపాలా అనే అంశంపై మంత్రివర్గంలో విస్తృతంగా చర్చ జరిగే అవకాశం ఉంది. ప్రభుత్వం తీసుకునే నిర్ణయాన్ని బట్టి గ్రామీణ ఉపాధి పనుల అమలు, కూలీల వేతనాల చెల్లింపుల భవిష్యత్తు ఆధారపడనుంది.
రాజకీయంగా కూడా కీలక అంశం
కొత్త ఉపాధి విధానం ఇప్పటికే పలు రాష్ట్రాల్లో రాజకీయ చర్చకు దారితీసింది. కేంద్రం దీన్ని గ్రామీణ అభివృద్ధిలో సంస్కరణగా అభివర్ణిస్తుండగా, కొన్ని రాష్ట్రాలు మాత్రం ఆర్థిక భారం పెరుగుతుందని, సమాఖ్య స్ఫూర్తికి విరుద్ధమని వాదిస్తున్నాయి. తెలంగాణలో కూడా ఇదే అంశం రాజకీయంగా ప్రాధాన్యం సంతరించుకుంది. .
