- 24 గంటల్లో వాయుగుండంగా మారే ఛాన్స్!
- ఏపీకి వర్ష ముప్పు.. ఆరు జిల్లాలకు హెచ్చరికలు.
- మత్స్యకారులు వేటకు వెళ్లొద్దని సూచన.
అమరావతి, మహా .
ఆంధ్రప్రదేశ్కు మరోసారి వర్ష ముప్పు పొంచి ఉంది. వాయవ్య బంగాళాఖాతంలో ఏర్పడిన అల్పపీడనం మరింత బలపడింది. ఇది రాబోయే 24 గంటల్లో వాయుగుండంగా మారే అవకాశం ఉందని వాతావరణ శాఖ అంచనా వేస్తోంది. అల్పపీడనం ప్రభావంతో రాష్ట్రంలోని పలు జిల్లాల్లో ఉరుములు, మెరుపులతో కూడిన తేలికపాటి నుంచి మోస్తరు వర్షాలు కురిసే అవకాశం ఉంది.
అల్పపీడనం ప్రభావం ప్రధానంగా ఉత్తరాంధ్ర, కోస్తా ప్రాంతాలపై కనిపించే అవకాశముంది. శ్రీకాకుళం, విజయనగరం, విశాఖపట్నం, ఏలూరు, పోలవరం జిల్లాలకు వర్ష సూచనతో పాటు అప్రమత్తంగా ఉండాలని అధికారులు సూచించారు. కొన్ని ప్రాంతాల్లో ఒక్కసారిగా భారీ వర్షం కురిసే అవకాశం ఉండటంతో ప్రజలు జాగ్రత్తగా ఉండాలని సూచిస్తున్నారు.
పిడుగులతో వర్షాలు.. అప్రమత్తంగా ఉండాల్సిందే
అల్పపీడనం బలపడుతున్న నేపథ్యంలో పలు ప్రాంతాల్లో ఉరుములు, మెరుపులతో కూడిన వర్షాలు కురిసే అవకాశం ఉంది. ముఖ్యంగా బహిరంగ ప్రదేశాల్లో ఉండే ప్రజలు వాతావరణ పరిస్థితులను గమనించాలని అధికారులు సూచిస్తున్నారు. పిడుగులు పడే సమయంలో చెట్లు, విద్యుత్ స్తంభాలు, బహిరంగ ప్రదేశాల్లో ఉండకుండా సురక్షిత ప్రాంతాలకు చేరుకోవాలని సూచిస్తున్నారు.
నెల్లూరు, తిరుపతికీ వర్ష సూచన
ఉత్తరాంధ్ర జిల్లాలతో పాటు దక్షిణ కోస్తా, రాయలసీమలోని కొన్ని ప్రాంతాలపైనా అల్పపీడనం ప్రభావం చూపే అవకాశం ఉంది. నెల్లూరు, తిరుపతి జిల్లాల్లోనూ వర్షాలు కురిసే అవకాశం ఉందని అధికారులు తెలిపారు. రాబోయే 24 గంటల్లో వాతావరణ పరిస్థితుల్లో మరిన్ని మార్పులు చోటుచేసుకునే అవకాశం ఉండటంతో ప్రజలు అప్రమత్తంగా ఉండాల్సిన అవసరం ఉంది.
సముద్రం అలజడి.. మత్స్యకారులకు కీలక హెచ్చరిక
అల్పపీడనం ప్రభావంతో సముద్రం అల్లకల్లోలంగా మారే అవకాశం ఉంది. సముద్రంలో అలలు ఉధృతంగా ఉండటంతో మత్స్యకారులు అత్యంత జాగ్రత్తగా వ్యవహరించాలని ఆంధ్రప్రదేశ్ స్టేట్ డిజాస్టర్ మేనేజ్మెంట్ అథారిటీ సూచించింది. మత్స్యకారులు సముద్రంలోకి వేటకు వెళ్లవద్దని హెచ్చరించింది.
ఇప్పటికే సముద్రంలో ఉన్న మత్స్యకారులు సురక్షితంగా తీరానికి చేరుకోవాలని అధికారులు సూచిస్తున్నారు. అల్పపీడనం వాయుగుండంగా మారితే సముద్ర పరిస్థితులు మరింత ప్రతికూలంగా మారే అవకాశం ఉండటంతో ఈ హెచ్చరికలను నిర్లక్ష్యం చేయవద్దని అధికారులు స్పష్టం చేస్తున్నారు.
