అల్లూరి జిల్లాలో ఘోర ప్రమాదం.
* పినకోట మైనింగ్ ప్రాంతంలో భారీ పేలుడు, నలుగురు దుర్మరణం!
* వాహనంలో డీజిల్ నింపుతుండగా ఊహించని విపత్తు..l
అనంతగిరి/పాడేరు,మహా.
అల్లూరి సీతారామరాజు జిల్లాలో శనివారం ఉదయం చోటుచేసుకున్న ఒక ఘోర రోడ్డు, మైనింగ్ ప్రమాదం స్థానికంగా తీవ్ర విషాదాన్ని నింపింది. అనంతగిరి మండలం పినకోట సమీపంలోని మైనింగ్ ప్రాంతంలో సంభవించిన భారీ పేలుడు ధాటికి నలుగురు ప్రాణాలు కోల్పోగా, పలువురు తీవ్రంగా గాయపడ్డారు. రోడ్డు నిర్మాణ పనులకు సంబంధించి పేలుడు పనులు జరుగుతున్న సమయంలో ఈ దుర్ఘటన చోటుచేసుకున్నట్లు తెలుస్తోంది. వాహనంలో డీజిల్ నింపుతున్న సమయంలో అనుకోకుండా మంటలు అంటుకోవడంతో ఒక్కసారిగా భారీ పేలుడు సంభవించిందని, ఈ ప్రమాద ధాటికి టిప్పర్ వాహనం పూర్తిగా ధ్వంసమైందని ప్రాథమిక సమాచారం వెల్లడించింది.
ఈ భీకర ప్రమాదంలో వాహన డ్రైవర్‌తో పాటు ఇద్దరు కార్మికులు అక్కడికక్కడే దుర్మరణం చెందారు. అదే సమయంలో అటుగా ప్రయాణిస్తున్న ఒక ఉపాధ్యాయుడు కూడా ఈ పేలుడులో ప్రాణాలు కోల్పోవడం మరింత కలచివేసే అంశం. దీంతో ఈ ఘటనలో మృతుల సంఖ్య నలుగురికి చేరింది. ప్రమాద వార్త తెలియగానే స్థానికులు భయాందోళనకు గురయ్యారు. మృతుల పూర్తి వివరాలు, వారి స్వస్థలాలకు సంబంధించిన అధికారిక సమాచారం ఇంకా వెలువడాల్సి ఉంది.
ఈ దారుణ ఘటనపై రాష్ట్ర హోంమంత్రి వంగలపూడి అనిత తీవ్ర దిగ్భ్రాంతి వ్యక్తం చేశారు. ప్రమాదం జరిగిన వెంటనే జిల్లా కలెక్టర్, ఎస్పీలతో టెలిఫోన్ ద్వారా మాట్లాడి వివరాలను అడిగి తెలుసుకున్నారు. క్షతగాత్రులకు సమీపంలోని ఆసుపత్రులలో మెరుగైన వైద్యం అందించాలని అధికారులను ఆమె తక్షణమే ఆదేశించారు. మృతుల కుటుంబాలకు ప్రగాఢ సానుభూతిని ప్రకటించిన హోంమంత్రి, బాధితులకు ప్రభుత్వపరంగా అన్ని విధాలా సహాయ సహకారాలు అందేలా చూడాలని సూచించారు.
