* తెలంగాణ ‘బుల్లి’ పంచాయతీలో ఆసక్తికర పోరు….

98 ఓట్లు.. 100 డిగ్రీల పొలిటికల్ హీట్.
* తెలంగాణ ‘బుల్లి’ పంచాయతీలో ఆసక్తికర పోరు.
* బృందావనపురంలో దాయాదుల సమరం.
* ఒకే పార్టీ నుంచి ఇద్దరు.. గెలుపు ఎవరిది?

హైదరాబాద్, మహా.

ప్రజాస్వామ్యంలో ఓటు విలువ ఎంతటిదో తెలియాలంటే నాగార్జునసాగర్ నియోజకవర్గం, త్రిపురారం మండలంలోని బృందావనపురం గ్రామాన్ని చూడాల్సిందే. తెలంగాణ రాష్ట్రంలోనే అతిచిన్న గ్రామ పంచాయతీగా రికార్డుల్లో ఉన్న ఈ గ్రామం, ప్రస్తుతం జరుగుతున్న పంచాయతీ ఎన్నికల్లో రాష్ట్రవ్యాప్తంగా చర్చనీయాంశంగా మారింది. కేవలం 98 మంది ఓటర్లు, నాలుగు వార్డులు మాత్రమే ఉన్న ఈ బుల్లి పంచాయతీలో నెలకొన్న రాజకీయ వాతావరణం ఏదో మెట్రోపాలిటన్ ఎన్నికలను తలపిస్తోంది. 1978-80 ప్రాంతంలో పంచాయతీగా ఆవిర్భవించిన నాటి నుంచి ఇక్కడ ఎన్నికలు జరుగుతున్నా, ఈసారి మాత్రం పరిస్థితి విభిన్నంగా ఉంది. ఇక్కడ ప్రతి ఓటూ ఒక వజ్రంతో సమానం. ఒక్క ఓటు తేడాతో తలరాతలు మారిపోయే అవకాశం ఉండటంతో అభ్యర్థులు కంటి మీద కునుకు లేకుండా ప్రచారం చేస్తున్నారు.
ఈ ఎన్నికల్లో అత్యంత ఆసక్తికరమైన అంశం సర్పంచ్ పోటీ. సాధారణంగా చిన్న గ్రామాల్లో ఏకగ్రీవాలకు ప్రయత్నిస్తుంటారు, కానీ బృందావనపురంలో మాత్రం కాంగ్రెస్ పార్టీకి చెందిన ఇద్దరు నాయకులు సర్పంచ్ పీఠం కోసం తలపడుతుండటం విశేషం. సర్పంచ్ స్థానం జనరల్ కు రిజర్వ్ కావడంతో, కాంగ్రెస్ పార్టీ నుంచే మందడి రమణారెడ్డి మరియు శ్రీనువాస్ రెడ్డి ఇద్దరూ బరిలో దిగారు. ఒకే పార్టీకి చెందిన వారు కావడంతో ఓటర్లు ఇరకాటంలో పడ్డారు. ఇది కేవలం రాజకీయ పోటీగా కాకుండా, వ్యక్తిగత ప్రతిష్టకు సంబంధించిన పోరుగా మారిందని స్థానికులు చర్చించుకుంటున్నారు. 98 ఓట్లను చీల్చుకుని ఎవరికి వారు మెజారిటీ సాధించడం ఇక్కడ కత్తి మీద సాము లాంటిదే.
ఇక వార్డుల వారీగా చూస్తే, ఒక్కో వార్డులో సగటున 24 నుంచి 25 ఓట్లు మాత్రమే ఉన్నాయి. అంటే అభ్యర్థులు తమ వార్డులోని ప్రతి ఓటరునూ వ్యక్తిగతంగా రోజుకు పదిసార్లు కలిసేంత చిన్న పరిధి ఇది. అయినప్పటికీ పోటీ మాత్రం తీవ్రంగా ఉంది. ఒకటో వార్డులో జొన్నలగడ్డ కిరణ్ కుమార్ రెడ్డి, వంగాల విజయలక్ష్మిల మధ్య, రెండో వార్డులో మందడి పారిజాత, శ్రీనివాస్ రెడ్డిల మధ్య గట్టి పోటీ నెలకొంది. అలాగే మూడో వార్డులో కుందూరు రిషిత, వంగాలి రాణి తలపడుతుండగా, నాలుగో వార్డులో కుందూరు శ్రీనివాస్ రెడ్డి, మందడి అంజమ్మ తమ అదృష్టాన్ని పరీక్షించుకుంటున్నారు. ప్రతి వార్డులోనూ ఇద్దరేసి అభ్యర్థులు ఉండటం, ఓటర్లు తక్కువగా ఉండటంతో ఒక్క ఓటు అటు ఇటు అయినా ఫలితం తారుమారయ్యే అవకాశం ఉంది.
డిసెంబర్ 14న జరగనున్న రెండో దశ పోలింగ్ కోసం గ్రామం ముస్తాబైంది. బంధుత్వాలు, రాజకీయాలు, వ్యక్తిగత పంతాల మధ్య ఈ ఎన్నికలు జరుగుతున్నాయి. రాష్ట్రం మొత్తం చూపు ఈ చిన్న గ్రామంపై పడింది. మరి ఈ అంతర్గత పోరులో బృందావనపురం ప్రజలు ఎవరికి పట్టం కడతారో, ఆ 98 మంది ఓటర్ల మనసులో ఏముందో తెలియాలంటే ఫలితాల వరకు వేచి చూడాల్సిందే.