- విజయవంతంగా ముగిసిన ఆర్టెమిస్-2 ప్రస్థానం!
- పసిఫిక్ ఒడిలో క్షేమంగా ఓరియన్ క్యాప్సూల్.
- పది రోజుల ఉత్కంఠకు తెర.. భూమికి చేరిన నలుగురు వ్యోమగాములు.
హైదరాబాద్, మహా.
మానవజాతి అంతరిక్ష చరిత్రలో మరో సువర్ణ అధ్యాయం లిఖించబడింది. చంద్రుడి దరిదాపుల్లోకి వెళ్లి, అన్వేషణ సాగించిన ఆర్టెమిస్-2 మిషన్ అత్యంత విజయవంతంగా ముగిసింది. పది రోజుల పాటు నింగిలో సాగిన ఈ అద్భుత ప్రయాణం అనంతరం, నలుగురు వ్యోమగాములతో కూడిన ఓరియన్ క్యాప్సూల్ పసిఫిక్ మహాసముద్రంలోని శాన్ డియాగో తీరంలో క్షేమంగా ల్యాండ్ అయింది. భారత కాలమానం ప్రకారం తెల్లవారుజామున 5.38 గంటలకు ఈ చారిత్రాత్మక ఘట్టం ఆవిష్కృతమైంది. భూ వాతావరణంలోకి ప్రవేశించిన సమయంలో ఎదురయ్యే విపరీతమైన వేడిని తట్టుకుని, పారాచూట్ల సాయంతో ఓరియన్ క్యాప్సూల్ సముద్రపు అలలపై సుతారంగా దిగింది. ఈ అద్భుత దృశ్యాన్ని చూసి నాసా శాస్త్రవేత్తలు హర్షాతిరేకాలు వ్యక్తం చేశారు.
చంద్రుడి చుట్టూ ప్రదక్షిణలు చేసి, భవిష్యత్తులో మానవుడు జాబిల్లిపై అడుగు పెట్టేందుకు అవసరమైన కీలక సమాచారాన్ని సేకరించడమే లక్ష్యంగా ఈ మిషన్ సాగింది. సుమారు అరవై ఏళ్ల తర్వాత మళ్ళీ మనిషిని చంద్రుడి సమీపానికి పంపడంలో నాసా సాధించిన ఈ విజయం ప్రపంచవ్యాప్తంగా చర్చనీయాంశమైంది. ఈ యాత్రలో పాల్గొన్న నలుగురు వ్యోమగాములు పది రోజుల పాటు అంతరిక్షంలో ఎదురైన సవాళ్లను అధిగమించి, సురక్షితంగా తిరిగి రావడం గమనార్హం. క్యాప్సూల్ సముద్రంలో పడిన వెంటనే అక్కడే సిద్ధంగా ఉన్న నౌకాదళం మరియు రెస్క్యూ బృందాలు వ్యోమగాములను క్షేమంగా బయటకు తీశాయి.
ఈ ప్రయోగం విజయవంతం కావడంతో తదుపరి దశలో చంద్రుడి ఉపరితలంపై మానవులను దించే ‘ఆర్టెమిస్-3’ మిషన్కు మార్గం సుగమమైంది. అంతరిక్ష రంగంలో అమెరికా ఆధిపత్యాన్ని చాటిచెప్పడమే కాకుండా, రాబోయే తరాలకు ఈ ప్రయోగం ఒక దిశానిర్దేశంలా నిలిచింది. పది రోజుల పాటు కోట్లాది మంది ఆశలు, ఆకాంక్షలను మోసుకెళ్లిన ఆర్టెమిస్-2, చివరకు సురక్షితంగా భూమిని చేరుకోవడంతో శాస్త్రవేత్తల కృషి ఫలించినట్లయింది. ఈ విజయం అంతరిక్ష పరిశోధనల్లో సరికొత్త ఉత్సాహాన్ని నింపుతూ, మానవుడు అంగారక గ్రహం వైపు అడుగులు వేయడానికి పునాదిగా మారుతుందని విశ్లేషకులు భావిస్తున్నారు.
