నేటి అర్ధరాత్రి నుంచి ‘ఆరోగ్యశ్రీ’ బంద్‌.. బకాయిలు చెల్లించలేదని ‘ఆషా’ సంచలన నిర్ణయం.. రేపటి నుంచి నిలిచిపోనున్న సేవలు..

•  బకాయిలు చెల్లించలేదని ‘ఆషా’ సంచలన నిర్ణయం..
• రేపటి నుంచి నిలిచిపోనున్న సేవలు.
•  రూ.3,000 కోట్ల బకాయిలు చెల్లించడంలో సర్కారు విఫలం.
•  రెండోసారి నిలిచిన పేదవాడి వైద్యం.

అమరావతి, మహా.

ఆంధ్రప్రదేశ్‌లో నిరుపేదలకు వరప్రసాదినిగా ఉన్న ‘ఆరోగ్యశ్రీ’ పథకానికి మళ్లీ బ్రేక్‌ పడింది. రాష్ట్ర ప్రభుత్వం నుంచి రావాల్సిన భారీ బకాయిలు చెల్లించకపోవడంతో బుధవారం నుంచి పథకం కింద సేవలను పూర్తిగా నిలిపివేస్తున్నట్లు ఏపీ స్పెషాలిటీ హాస్పిటల్స్ అసోసియేషన్ (ఆషా) ప్రకటించింది. ప్రభుత్వ తీరుపై తీవ్ర నిరసన వ్యక్తం చేస్తూ ఈ నిర్ణయం తీసుకున్నట్లు సంఘం వెల్లడించింది. మార్చి 31వ తేదీ గడువు ముగిసినా ప్రభుత్వం నుంచి సానుకూల స్పందన రాకపోవడంతో, ఆస్పత్రుల నిర్వహణ భారమై ఈ కఠిన నిర్ణయం తీసుకోవాల్సి వచ్చిందని యాజమాన్యాలు స్పష్టం చేశాయి.

ప్రభుత్వం సుమారు రూ.3,000 కోట్ల మేర ఆరోగ్యశ్రీ బిల్లులను బకాయి పెట్టిందని, దీనివల్ల ఆస్పత్రుల ఆర్థిక పరిస్థితి అస్తవ్యస్తంగా మారిందని ‘ఆషా’ ప్రతినిధులు ఆవేదన వ్యక్తం చేస్తున్నారు. ముఖ్యమంత్రి చంద్రబాబు నాయుడు నేతృత్వంలోని కూటమి ప్రభుత్వం అధికారంలోకి వచ్చిన తర్వాత ఆరోగ్యశ్రీ సేవలు నిలిచిపోవడం ఇది రెండోసారి కావడం గమనార్హం. గతంలో ఆస్పత్రుల యాజమాన్యాలు సమ్మెకు దిగిన సమయంలో బకాయిలను తక్షణమే విడుదల చేస్తామని ప్రభుత్వం హామీ ఇచ్చింది. ముఖ్యంగా గత ఏడాది డిసెంబర్ నెలాఖరుకల్లా బకాయిలన్నీ క్లియర్ చేస్తామని ప్రభుత్వం మాటిచ్చినా, అది నేటికీ అమలుకు నోచుకోలేదు.

ప్రభుత్వ నిర్లక్ష్యంపై ‘ఆషా’ తీవ్రస్థాయిలో మండిపడుతోంది. వన్ టైమ్ సెటిల్‌మెంట్ (OTS) ద్వారా పాత బకాయిలన్నీ ఒకేసారి చెల్లిస్తామని చెప్పి ప్రభుత్వం కాలయాపన చేసిందని, చివరకు మార్చి 31 వచ్చినా నిధులు విడుదల చేయకుండా ఆస్పత్రుల యాజమాన్యాలను దగా చేసిందని వారు ధ్వజమెత్తారు. పాత బకాయిల ఊసే ఎత్తకుండా, నిధులు విడుదల చేయకుండానే నేరుగా కొత్త పాలసీలోకి వెళ్లాలని ప్రభుత్వం ప్రయత్నించడాన్ని ఆస్పత్రుల సంఘం తీవ్రంగా వ్యతిరేకిస్తోంది. పాత అప్పులు తీర్చకుండా కొత్త నిబంధనలు అమలు చేయడం తమను ఇబ్బందుల్లోకి నెట్టడమేనని వారు అభిప్రాయపడుతున్నారు.

ప్రభుత్వ వైఖరి కారణంగా రాష్ట్రవ్యాప్తంగా వేలాది మంది పేద రోగులకు ఉచిత వైద్యం అందకుండా పోయే ప్రమాదం ఏర్పడింది. అత్యవసర శస్త్రచికిత్సలు, దీర్ఘకాలిక వ్యాధులతో బాధపడుతున్న వారు ఈ నిర్ణయంతో బెంబేలెత్తుతున్నారు. ప్రభుత్వం తక్షణమే స్పందించి రూ.3,000 కోట్ల బకాయిలను విడుదల చేయకపోతే, బుధవారం నుంచి రాష్ట్రంలోని ఏ ప్రైవేట్ నెట్‌వర్క్ ఆస్పత్రిలోనూ ఆరోగ్యశ్రీ కార్డులపై చికిత్స అందించబోమని ‘ఆషా’ తేల్చిచెప్పింది. పేదవాడి ప్రాణాలతో ముడిపడి ఉన్న ఈ పథకం విషయంలో ప్రభుత్వం ఇప్పటికైనా మొండివైఖరి వీడాలని బాధితులు కోరుతున్నారు.