- నేటి నుంచి ఏప్రిల్ 15 వరకు సలహాల స్వీకరణ.
- ఈమెయిల్ ద్వారా పంపాలని విజ్ఞప్తి.
హైదరాబాద్, మహా.
మూసీ నది పునరుజ్జీవన ప్రాజెక్టును అత్యంత పారదర్శకంగా, ప్రజా భాగస్వామ్యంతో ముందుకు తీసుకెళ్లాలని రాష్ట్ర ప్రభుత్వం నిర్ణయించింది. ఈ ప్రాజెక్టుపై నియమించిన కేబినెట్ సబ్ కమిటీ మంగళవారం హైదరాబాద్లో ప్రత్యేకంగా సమావేశమై పనుల పురోగతిని సమీక్షించింది. ఉప ముఖ్యమంత్రి మల్లు భట్టి విక్రమార్క, రవాణా శాఖ మంత్రి పొన్నం ప్రభాకర్ పాల్గొన్న ఈ సమీక్షా సమావేశంలో మూసీ ప్రక్షాళన, అభివృద్ధిపై ప్రజల నుంచి సలహాలు, సూచనలు స్వీకరించాలని కీలక నిర్ణయం తీసుకున్నారు.
ఈ సందర్భంగా మంత్రులు మాట్లాడుతూ.. మూసీ పునరుజ్జీవనం అనేది కేవలం ఒక నది ప్రక్షాళన మాత్రమే కాదని, ఇది నగరాభివృద్ధితో ముడిపడి ఉన్న భారీ ప్రాజెక్టు అని పేర్కొన్నారు. అందుకే ఈ విషయంలో ప్రజల ఆలోచనలను, వారి అభిప్రాయాలను పరిగణనలోకి తీసుకోవాలని భావిస్తున్నట్లు తెలిపారు. నేటి నుంచి వచ్చే నెల ఏప్రిల్ 15వ తేదీ వరకు ప్రజలు తమ అమూల్యమైన సలహాలను ప్రభుత్వానికి పంపవచ్చని సూచించారు. ఆసక్తి కలిగిన పౌరులు, నిపుణులు తమ సూచనలను musirrdc@gmail.com అనే ఈమెయిల్ ఐడీకి పంపాలని కేబినెట్ సబ్ కమిటీ విజ్ఞప్తి చేసింది.
ప్రజల నుంచి వచ్చే నిర్మాణాత్మకమైన సలహాలను పరిశీలించి, ప్రాజెక్టు తుది రూపకల్పనలో వాటిని పరిగణనలోకి తీసుకుంటామని మంత్రులు స్పష్టం చేశారు. మూసీ తీర ప్రాంతాల అభివృద్ధి, కాలుష్య నివారణ, పర్యాటక రంగం వంటి అంశాలపై ప్రజలు తమ గళాన్ని వినిపించేందుకు ఇది ఒక మంచి అవకాశమని ప్రభుత్వం పేర్కొంది. ఈ కార్యక్రమంలో ప్రాజెక్టుకు సంబంధించిన ఉన్నతాధికారులు కూడా పాల్గొని, ఇప్పటివరకు జరిగిన పురోగతిని మంత్రులకు వివరించారు.
