- భారత్-అమెరికా బంధం సరికొత్త ఎత్తులకు.
- 21వ శతాబ్దపు వ్యూహాత్మక భాగస్వామ్యమే లక్ష్యం.
- అమెరికా రాయబారి సెర్జియో గోర్
ఢిల్లీ, మహా.
భారత ప్రధానమంత్రి నరేంద్ర మోదీని అమెరికా అధ్యక్షుడు డొనాల్డ్ ట్రంప్ తన ‘నిజమైన స్నేహితుడిగా’ భావిస్తారని భారత్లోని అమెరికా రాయబారి సెర్జియో గోర్ వెల్లడించారు. ఇద్దరు అగ్రనేతల మధ్య ఉన్న స్వచ్ఛమైన స్నేహబంధం ఇరుదేశాల ద్వైపాక్షిక సంబంధాలను బలోపేతం చేయడంలో కీలక పాత్ర పోషిస్తోందని ఆయన పేర్కొన్నారు. న్యూఢిల్లీలోని అమెరికా రాయబార కార్యాలయం ప్రచురించే ‘స్పాన్’ మేగజైన్కు బుధవారం ఇచ్చిన ప్రత్యేక ఇంటర్వ్యూలో గోర్ పలు ఆసక్తికర అంశాలను పంచుకున్నారు. భారత్-అమెరికా బంధాన్ని 21వ శతాబ్దపు అత్యంత శక్తిమంతమైన వ్యూహాత్మక భాగస్వామ్యంగా మార్చడమే తన ప్రధాన లక్ష్యమని, ఇరుదేశాలకు ఉమ్మడి ప్రయోజనం చేకూర్చే గొప్ప అవకాశం తనకు లభించిందని ఆయన సంతోషం వ్యక్తం చేశారు.
ఈ సందర్భంగా సెర్జియో గోర్ తన వ్యక్తిగత అనుభవాలను గుర్తు చేసుకుంటూ, 15 ఏళ్ల క్రితం తొలిసారిగా తన కుటుంబంతో కలిసి భారత్లో పర్యటించినప్పుడు ఇక్కడి సంస్కృతి, చరిత్ర మరియు ప్రజల ఆప్యాయత తన మనసులో చెరగని ముద్ర వేశాయని తెలిపారు. భారత ప్రజల దయాభావం తనను ఎంతో ప్రభావితం చేసిందని, ఇప్పుడు రాయబారి హోదాలో మళ్లీ ఇక్కడికి వచ్చినప్పటికీ ఆ స్నేహభావం ఏమాత్రం తగ్గలేదని ఆయన కొనియాడారు. ఈ సానుకూల వాతావరణమే ఇరుదేశాల మధ్య దృఢమైన సంబంధాలకు పునాది అని ఆయన అభిప్రాయపడ్డారు.
ఇటీవలే (మార్చి 31న) అమెరికా పర్యటనలో భాగంగా వైట్ హౌస్లో ప్రెసిడెంట్ ట్రంప్తో భేటీ అయిన విశేషాలను కూడా గోర్ వివరించారు. భారత్తో బంధాన్ని బలోపేతం చేయడం అత్యంత ముఖ్యమైన విషయమని ట్రంప్ తనకు స్పష్టంగా చెప్పినట్లు ఆయన వెల్లడించారు. ఫలితాలను ఆశించే నాయకుడిగా ట్రంప్ నిత్యం వేగంగా నిర్ణయాలు తీసుకుంటారని, అమెరికా ప్రజలకు ప్రయోజనం చేకూర్చే ప్రతి అడుగులోనూ భారత్ సహకారం ఉండాలని ఆయన ఆశిస్తున్నట్లు తెలిపారు. తాను మాట్లాడే ప్రతి ఫోన్ కాల్, కుదుర్చుకునే ప్రతి ఒప్పందం అమెరికా మరియు భారత్ మధ్య సానుకూల ఫలితాలను సాధించేలా ఉండాలని ట్రంప్ నిర్దేశించినట్లు రాయబారి పేర్కొన్నారు.
ముఖ్యంగా రక్షణ, ఇంధన, విమానయాన, అధునాతన తయారీ మరియు డిజిటల్ మౌలిక సదుపాయాల వంటి కీలక రంగాల్లో భారత్-అమెరికా బంధం శరవేగంగా విస్తరిస్తోందని సెర్జియో గోర్ విశ్లేషించారు. దీనివల్ల రెండు దేశాల్లోనూ కొత్త ఉపాధి అవకాశాలు ఏర్పడటంతో పాటు గ్లోబల్ సప్లై చైన్ వ్యవస్థలు మరింత బలోపేతం అవుతున్నాయని చెప్పారు. ఇరుదేశాల అగ్రనేతల మధ్య ఉన్న వ్యక్తిగత సాన్నిహిత్యం ఈ వ్యూహాత్మక భాగస్వామ్యాన్ని భవిష్యత్తులో మరిన్ని కొత్త ఎత్తులకు తీసుకెళ్తుందని ఆయన ధీమా వ్యక్తం చేశారు.
