- ఖానాపూర్ మున్సిపల్ పీఠం కమలం వశం.
- వైస్ చైర్మన్గా గులాబీ నేత!
- అధికార కాంగ్రెస్కు విపక్షాల ఐక్యతతో దిమ్మతిరిగే షాక్.
- రెండ్రోజుల హైడ్రామాకు తెర.. చైర్మన్గా అంకం మౌనిక ఎన్నిక.
- బీజేపీ-బీఆర్ఎస్ చారిత్రాత్మక పొత్తుతో మారిన రాజకీయ చిత్రం.
ఖానాపూర్, మహా.
ఖానాపూర్ పురపాలక సంఘంలో గత రెండు రోజులుగా నెలకొన్న తీవ్ర ఉత్కంఠకు ఎట్టకేలకు తెరపడింది. రాజకీయ ఎత్తుగడలు, వ్యూహ ప్రతివ్యూహాల మధ్య జరిగిన చైర్మన్, వైస్ చైర్మన్ ఎన్నికలో అధికార కాంగ్రెస్ పార్టీకి ఊహించని పరాభవం ఎదురైంది. బద్ధశత్రువులైన భారతీయ జనతా పార్టీ మరియు భారత రాష్ట్ర సమితి చేతులు కలపడంతో ఖానాపూర్ మున్సిపల్ పీఠం బీజేపీ వశమైంది. ఆదివారం పకడ్బందీ భద్రతా ఏర్పాట్ల మధ్య జరిగిన పరోక్ష ఎన్నికలో బీజేపీకి చెందిన అంకం మౌనిక చైర్మన్గా, బీఆర్ఎస్కు చెందిన మహమ్మద్ షోయబ్ వైస్ చైర్మన్గా ఎన్నికయ్యారు. రాష్ట్ర రాజకీయాల్లో అధికార పక్షాన్ని నిలువరించేందుకు విపక్షాలు ఏకం కావడం ఇప్పుడు పెను చర్చకు దారితీసింది.
నిజానికి ఈ ఎన్నికల ప్రక్రియ శనివారమే ప్రారంభమైనప్పటికీ, రణరంగాన్ని తలపించింది. మున్సిపాలిటీలోని 12 వార్డుల్లో ఏ పార్టీకీ స్పష్టమైన మెజార్టీ లేకపోవడంతో బేరసారాలు పతాక స్థాయికి చేరాయి. బీజేపీకి నలుగురు, బీఆర్ఎస్కు నలుగురు, కాంగ్రెస్కు ముగ్గురు కౌన్సిలర్లు ఉండగా, ఒక స్వతంత్ర అభ్యర్థి గెలుపొందారు. ఎమ్మెల్యే వెడ్మ బొజ్జు ఎక్స్ అఫిషియో ఓటుతో కలిపి కాంగ్రెస్ బలం నాలుగుకు చేరడంతో, స్వతంత్ర అభ్యర్థిని మచ్చిక చేసుకుని పీఠం దక్కించుకోవాలని హస్తం పార్టీ నేతలు వ్యూహరచన చేశారు. అయితే విపక్షాలు అంతకు మించిన ఎత్తుగడతో బీజేపీ-బీఆర్ఎస్ కౌన్సిలర్లు ఒక్కతాటిపైకి వచ్చి కాంగ్రెస్ ఆశలపై నీళ్లు చల్లారు. శనివారం జరిగిన సమావేశంలో ఎమ్మెల్యే వెడ్మ బొజ్జు అధికారులతో వాగ్వాదానికి దిగడం, కౌన్సిలర్ల మధ్య తోపులాట జరగడంతో పోలీసులు లాఠీచార్జ్ చేయాల్సి వచ్చింది. ఉద్రిక్త పరిస్థితుల దృష్ట్యా ఎన్నికను ఆదివారానికి వాయిదా వేస్తున్నట్లు ఎన్నికల అధికారి ప్రకటించారు.
ఆదివారం ఉదయం నుంచే మున్సిపల్ కార్యాలయం వద్ద భారీ పోలీస్ బందోబస్తు ఏర్పాటు చేశారు. విపక్ష కౌన్సిలర్లు అంతా కలిసికట్టుగా ఒకే వాహనంలో నేరుగా కార్యాలయానికి చేరుకున్నారు. ఎన్నికల ప్రక్రియ ప్రారంభం కాగానే చైర్మన్ పదవికి బీజేపీ తరపున 9వ వార్డు కౌన్సిలర్ అంకం మౌనిక పేరును ప్రతిపాదించగా, బీఆర్ఎస్ సభ్యులు పూర్తి మద్దతు ప్రకటించారు. దీంతో మెజార్టీ సభ్యుల మద్దతుతో ఆమె చైర్మన్గా విజయం సాధించారు. అదేవిధంగా వైస్ చైర్మన్ పదవిని బీఆర్ఎస్కు కేటాయిస్తూ జరిగిన ఒప్పందంలో భాగంగా 6వ వార్డు కౌన్సిలర్ మహమ్మద్ షోయబ్ ఎన్నికయ్యారు. అధికార పార్టీ అభ్యర్థులు బరిలో ఉన్నప్పటికీ, సంఖ్యాబలం లేకపోవడంతో వారికి ఓటమి తప్పలేదు.
ఫలితం వెలువడిన వెంటనే ఖానాపూర్ పురవీధుల్లో సంబరాలు అంబరాన్నంటాయి. బీజేపీ, బీఆర్ఎస్ కార్యకర్తలు జెండాలు పట్టుకుని భారీ ర్యాలీ నిర్వహించారు. బాణసంచా కాల్చి, మిఠాయిలు పంపిణీ చేస్తూ విజయోత్సవాన్ని జరుపుకున్నారు. ప్రజాస్వామ్యబద్ధంగా తాము గెలిచామని, అధికార పార్టీ అరాచకాలను అడ్డుకునేందుకే తాము ఏకమయ్యామని విపక్ష నేతలు ఈ సందర్భంగా వ్యాఖ్యానించారు. మరోవైపు, తమను రాజకీయంగా దెబ్బతీయడానికి బీజేపీ, బీఆర్ఎస్ అపవిత్ర పొత్తు పెట్టుకున్నాయని కాంగ్రెస్ నేతలు విమర్శించారు. ఏది ఏమైనప్పటికీ, ఖానాపూర్ మున్సిపల్ పీఠం దక్కించుకోవడంలో విపక్షాల ఐక్యత సఫలం కావడం రాష్ట్ర రాజకీయాల్లో కొత్త సమీకరణాలకు నాంది పలికినట్లయింది.
