హైదరాబాద్, మహా.
మాజీ ఉప ప్రధాని, స్వాతంత్య్ర సమరయోధుడు డాక్టర్ బాబూ జగ్జీవన్ రామ్ 119వ జయంతి వేడుకలు ఆదివారం రాష్ట్రవ్యాప్తంగా ఘనంగా జరిగాయి. ఈ సందర్భంగా జూబ్లీహిల్స్లోని తన నివాసంలో ముఖ్యమంత్రి ఎ. రేవంత్ రెడ్డి జగ్జీవన్ రామ్ చిత్రపటానికి పూలమాల వేసి ఘన నివాళులర్పించారు. ఈ సందర్భంగా సీఎం మాట్లాడుతూ.. కుల వివక్ష లేని సమాజం కోసం, అణగారిన వర్గాల సామాజిక న్యాయం కోసం ఆయన సాగించిన పోరాటం తరతరాలకు స్ఫూర్తిదాయకమని కొనియాడారు. కేవలం ఒక వర్గానికే కాకుండా దేశంలోని పీడిత వర్గాల గొంతుకగా ఆయన నిలిచారని ప్రశంసించారు.
దేశం క్లిష్ట పరిస్థితుల్లో ఉన్నప్పుడు రక్షణ, వ్యవసాయం వంటి కీలక శాఖల మంత్రిగా జగ్జీవన్ రామ్ అద్భుతమైన సేవలు అందించారని ముఖ్యమంత్రి గుర్తుచేశారు. ముఖ్యంగా దేశంలో ఆహార భద్రత కల్పించడంలో, హరిత విప్లవాన్ని విజయవంతం చేయడంలో ఆయన పాత్ర చిరస్మరణీయమని అన్నారు. పరిపాలనా దక్షుడిగా ఆయన తీసుకున్న నిర్ణయాలు దేశ పురోభివృద్ధికి బలమైన పునాదులు వేశాయని విశ్లేషించారు. అట్టడుగు వర్గాల సంక్షేమం కోసం ఆయన తన జీవితాంతం తపించారని, అటువంటి మహనీయుల ఆశయాలను గౌరవించడం మనందరి బాధ్యతని పేర్కొన్నారు.
తెలంగాణ రాష్ట్ర ప్రభుత్వం బాబూ జగ్జీవన్ రామ్ సిద్ధాంతాలకు కట్టుబడి ఉందని, ప్రతి ఒక్కరికీ సమాన అవకాశాలు కల్పించడమే తమ లక్ష్యమని రేవంత్ రెడ్డి స్పష్టం చేశారు. కేవలం నివాళులకే పరిమితం కాకుండా, ఆయన కలలుగన్న సమసమాజ స్థాపన కోసం రాష్ట్ర ప్రభుత్వం నిరంతరం కృషి చేస్తుందని, అణగారిన వర్గాల సాధికారత కోసం మరిన్ని సంస్కరణలు తీసుకువస్తామని ఈ సందర్భంగా హామీ ఇచ్చారు. ఈ కార్యక్రమంలో పలువురు ప్రజాప్రతినిధులు పాల్గొని నివాళులర్పించారు.
