పార్టీలు మారడం బట్టలు మార్చినంత సులువు కాదు..! కేసీఆర్, రేవంత్ రెడ్డిలపై ఎంపీ ఈటల రాజేందర్ ధ్వజం..

•  అబద్ధాల పునాదులపై రేవంత్ పాలన.
•   కాంగ్రెస్, ఎంఐఎం కుమ్మక్కును ఛేదించి ఖానాపూర్‌లో బీజేపీ జయభేరి
•   పదవుల కోసం ప్రాకులాడను.. ప్రజల ధర్మాన్నే నమ్ముకున్నా.
•   కేసీఆర్, రేవంత్ రెడ్డిలపై ఎంపీ ఈటల రాజేందర్ ధ్వజం.

హైదరాబాద్, మహా.

రాజకీయాల్లో విలువలకు తిలోదకాలిచ్చి, స్వార్థ ప్రయోజనాల కోసం పార్టీలు మారే సంస్కృతి తనది కాదని మల్కాజ్‌గిరి ఎంపీ ఈటల రాజేందర్ అత్యంత స్పష్టంగా ప్రకటించారు. పార్టీలు మారడం అంటే బట్టలు మార్చుకున్నంత సులభమైన విషయం కాదని, తన వ్యక్తిత్వం , రాజకీయ నిబద్ధత గురించి తెలంగాణ సమాజానికి పూర్తి అవగాహన ఉందని ఆయన పేర్కొన్నారు. ఆదివారం మీడియాతో మాట్లాడిన ఆయన, తనపై వస్తున్న వదంతులను తీవ్రంగా ఖండిస్తూనే, అటు మాజీ ముఖ్యమంత్రి కేసీఆర్, ఇటు ప్రస్తుత ముఖ్యమంత్రి రేవంత్ రెడ్డిపై నిప్పులు చెరిగారు. తనను బీఆర్ఎస్ నుంచి బయటకు పంపడమే కాకుండా, వ్యక్తిగతంగా ఎన్నో ఇబ్బందులకు గురిచేసి, తన ఆస్తులను అక్రమంగా గుంజుకున్న కేసీఆర్ తీరును ఆయన ఈ సందర్భంగా గుర్తు చేసుకున్నారు. అదే సమయంలో, ఖానాపూర్ మున్సిపల్ పీఠాన్ని బీజేపీ కైవసం చేసుకోవడంపై పార్టీ రాష్ట్ర ముఖ్య అధికార ప్రతినిధి ఎన్.వి. సుభాష్ హర్షం వ్యక్తం చేస్తూ, ఇది కాంగ్రెస్ అహంకారానికి ప్రజలు పెట్టిన చెక్ అని అభివర్ణించారు.

తాను పార్టీ మారుతున్నట్లు కొందరు పనిగట్టుకుని చేస్తున్న ప్రచారాన్ని ఈటల రాజేందర్ కొట్టిపారేశారు. 25 ఏళ్ల సుదీర్ఘ రాజకీయ ప్రస్థానంలో తనకు అనేక పార్టీల్లో మిత్రులు, అభిమానులు ఉన్నారని, అంతమాత్రాన పార్టీ మారుతున్నట్లు కాదని స్పష్టం చేశారు. ఐదేళ్ల క్రితం కేసీఆర్ తనను అకారణంగా బర్తరఫ్ చేసి, ఆర్థికంగా దెబ్బతీయడానికి తన కోళ్ల ఫారాలను కూల్చివేసి, చట్టబద్ధంగా కొనుగోలు చేసిన భూములను చెరబట్టారని ఆవేదన వ్యక్తం చేశారు. ఆనాడు కష్టకాలంలో తనకు కాంగ్రెస్ నుంచి ఆహ్వానం వచ్చిన మాట నిజమేనని, ఒకవేళ తాను పదవుల కోసం ఆశపడి ఉంటే ఆనాడే వెళ్లి డిప్యూటీ సీఎం లేదా మంత్రి పదవిని పొందేవాడినని వెల్లడించారు. గతంలో దివంగత ముఖ్యమంత్రి వైఎస్ రాజశేఖర్ రెడ్డి కూడా తనకు మంత్రి పదవి ఆఫర్ చేశారని, కానీ తెలంగాణ ఉద్యమ ఆకాంక్ష కోసం తాను పదవులను తృణప్రాయంగా వదులుకున్నానని గుర్తు చేశారు. తాను సోషల్ మీడియాను నమ్ముకోలేదని, కేవలం ప్రజలను మరియు ధర్మాన్ని మాత్రమే నమ్ముకున్నానని ఈటల తేల్చిచెప్పారు.

రాష్ట్రంలోని కాంగ్రెస్ ప్రభుత్వంపై కూడా ఈటల తీవ్ర స్థాయిలో విరుచుకుపడ్డారు. ముఖ్యమంత్రి రేవంత్ రెడ్డి కేవలం అబద్ధాల పునాదుల మీద పాలన సాగిస్తున్నారని, ప్రజలను బుకాయిస్తూ, మీడియాను మేనేజ్ చేస్తూ కాలం గడుపుతున్నారని ఆరోపించారు. గత ప్రభుత్వంలో జరిగిన అవినీతిని కక్కిస్తానని హామీ ఇచ్చిన రేవంత్ రెడ్డి, ఇప్పుడు ఆ దిశగా ఎందుకు చర్యలు తీసుకోవడం లేదని నిలదీశారు. రేవంత్ రెడ్డి మాట్లాడుతున్నవన్నీ ‘బక్వాస్’ మాటలేనని, నియోజకవర్గాల పునర్విభజన విషయంలో కూడా ప్రజలను తప్పుదోవ పట్టిస్తున్నారని మండిపడ్డారు. చివరికి కోర్టులను కూడా మేనేజ్ చేసే స్థాయికి ప్రభుత్వం దిగజారిందని ఆరోపించారు. పార్టీలో అంతర్గతంగా ఎన్ని సమస్యలు ఉన్నా, తామంతా ఐకమత్యంతో పోరాడతామని, త్వరలోనే ‘చలో బాలాజీ నగర్’ వంటి కార్యక్రమాలతో ప్రజల్లోకి వెళ్తామని ఈటల స్పష్టం చేశారు.

మరోవైపు, ఖానాపూర్ మున్సిపల్ ఎన్నికల ఫలితాలు రాష్ట్ర రాజకీయాల్లో సరికొత్త ఉత్సాహాన్ని నింపాయని ఎన్.వి. సుభాష్ పేర్కొన్నారు. అధికార కాంగ్రెస్ పార్టీ సాగించిన బెదిరింపులు, ఒత్తిళ్లను తట్టుకుని బీజేపీ కౌన్సిలర్లు మరియు కార్యకర్తలు సాధించిన ఈ విజయం అసాధారణమైనదని కొనియాడారు. నిజామాబాద్ తరహాలోనే ఖానాపూర్‌లో కూడా కాంగ్రెస్-ఎంఐఎం పార్టీలు తెరవెనుక అపవిత్ర పొత్తు పెట్టుకున్నాయని, కానీ వారి కుతంత్రాలను ప్రజలు తిప్పికొట్టారని విమర్శించారు. రాష్ట్ర అధ్యక్షుడు ఎన్. రాంచందర్ రావు నాయకత్వంలో, ఏలేటి మహేశ్వర్ రెడ్డి సమన్వయంతో, ఆదిలాబాద్ ఎంపీ గోడం నగేష్ మార్గదర్శకత్వంలో బీజేపీ సాధించిన ఈ గెలుపు తెలంగాణ అంతటా మార్పునకు సంకేతమని ఆయన ఆశాభావం వ్యక్తం చేశారు. ప్రజల నమ్మకమే తమకు కొండంత అండని, రాబోయే జీహెచ్‌ఎంసీ ఎన్నికల్లో కూడా ఇదే విజయాన్ని పునరావృతం చేస్తామని బీజేపీ నేతలు ధీమా వ్యక్తం చేశారు.