తిరుమల, మహా.
కలియుగ వైకుంఠమైన తిరుమల శ్రీ వేంకటేశ్వరస్వామి వారి సన్నిధిలో భక్తులు సమర్పించిన కానుకలు ఇప్పుడు అధికారులకు పెను సవాలుగా మారాయి. 2016లో కేంద్ర ప్రభుత్వం రద్దు చేసిన ₹500, ₹1000 నోట్ల ప్రవాహం ఇప్పటికీ శ్రీవారి హుండీలో కొనసాగుతూనే ఉంది. ఫలితంగా ప్రస్తుతం తిరుమల తిరుపతి దేవస్థానం (టీటీడీ) వద్ద దాదాపు ₹400 కోట్ల విలువైన పాత కరెన్సీ నోట్లు పేరుకుపోయాయి. అయితే, ఈ భారీ మొత్తాన్ని మార్పిడి చేసేందుకు రిజర్వ్ బ్యాంక్ ఆఫ్ ఇండియా లేదా కేంద్ర ప్రభుత్వం ఇప్పటివరకు అనుమతించకపోవడంతో ఈ నిధులు నిరుపయోగంగా మారాయి.
సెంటిమెంట్తోనే భద్రపరుస్తున్న టీటీడీ
సాధారణంగా గడువు ముగిసిన పాత నోట్లను ప్రైవేటు వ్యక్తులు లేదా సంస్థలు ధ్వంసం చేయడం జరుగుతుంది. కానీ, టీటీడీ అధికారులు మాత్రం ఈ నోట్లను అత్యంత భద్రంగా దాచి ఉంచారు. ఇవి భక్తులు తమ భక్తిశ్రద్ధలతో మొక్కుబడిగా సమర్పించిన కానుకలు కావడం, వాటితో భక్తుల సెంటిమెంట్ ముడిపడి ఉండటమే ఇందుకు ప్రధాన కారణం. కోట్లాది రూపాయల భక్తుల సొమ్ము వృధా కాకూడదని టీటీడీ పాలకమండలి గత కొన్ని సంవత్సరాలుగా కేంద్ర ఆర్థిక మంత్రిత్వ శాఖకు, ఆర్బీఐకి పదేపదే విన్నపాలు చేస్తోంది. ఈ నోట్లను మార్పిడి చేసి, ఆ సొమ్మును టీటీడీ సామాజిక మరియు ధార్మిక కార్యక్రమాలకు వినియోగించుకునేలా ప్రత్యేక వెసులుబాటు కల్పించాలని కోరుతున్నారు.
₹2,000 నోట్ల పరిస్థితి ఏంటి?
మరోవైపు, కేంద్రం ఇటీవల ఉపసంహరించుకున్న ₹2,000 నోట్ల పరిస్థితి కొంత మెరుగ్గానే ఉంది. ఈ గులాబీ రంగు నోట్లను బ్యాంకులు ఇంకా స్వీకరిస్తున్నాయి. హుండీలో ప్రతి నెలా సగటున ₹35 లక్షల విలువైన ₹2,000 నోట్లు వస్తున్నాయని, వాటిని ఎప్పటికప్పుడు బ్యాంకుల్లో జమ చేస్తున్నట్లు సమాచారం. అయితే, డీమోనిటైజేషన్ నాటి ₹500, ₹1000 నోట్ల విషయంలోనే ప్రతిష్టంభన కొనసాగుతోంది. ఒకవేళ కేంద్రం సానుకూలంగా స్పందించకపోతే, ఈ ₹400 కోట్ల రూపాయల భక్తుల కానుకలు కేవలం కాగితపు ముక్కలుగానే మిగిలిపోయే ప్రమాదం ఉందని భక్తులు ఆవేదన వ్యక్తం చేస్తున్నారు. భవిష్యత్తులోనైనా కేంద్రం ఈ సమస్యపై ప్రత్యేక చొరవ తీసుకుని శ్రీవారికి చేరిన కానుకలను సద్వినియోగం చేస్తుందో లేదో వేచి చూడాలి.
