రాజకీయ జోక్యానికి తావుండొద్దు….

రాజకీయ జోక్యానికి తావుండొద్దు.
* తప్పు చేస్తే ఎంతటి వారైనా వదలొద్దు.
* తమిళనాడు ముఖ్యమంత్రి విజయ్.
*తమిళనాడు ముఖ్యమంత్రిగా బాధ్యతలు చేపట్టిన తర్వాత తొలిసారి ఉన్నతస్థాయి సమీక్ష.
* కలెక్టర్లు, ఎస్పీలు, ఉన్నతాధికారులతో రెండు రోజుల సదస్సు ప్రారంభం.
* డ్రగ్స్ రహిత తమిళనాడు, మహిళల భద్రతే లక్ష్యంగా కఠిన ఆదేశాలు.
చెన్నై, మహా.
తమిళనాడు రాష్ట్ర ముఖ్యమంత్రిగా బాధ్యతలు చేపట్టిన నెల రోజుల్లోనే వరుసగా కీలక నిర్ణయాలు తీసుకుంటున్న సి. విజయ్.. తాజాగా ఐఏఎస్, ఐపీఎస్ అధికారులకు జారీ చేసిన స్పష్టమైన ఆదేశాలు దేశవ్యాప్తంగా తీవ్ర చర్చనీయాంశంగా మారాయి. పాలనలో ఎలాంటి రాజకీయ జోక్యానికి తావులేకుండా చట్టాన్ని కచ్చితంగా అమలు చేయాలని, నేరస్తులు ఎంతటి పలుకుబడి ఉన్నవారైనా సరే ఎట్టి పరిస్థితుల్లోనూ ఉపేక్షించవద్దని ఆయన అధికార యంత్రాంగానికి అత్యంత స్పష్టమైన సందేశం ఇచ్చారు. తమిళనాడు ముఖ్యమంత్రిగా పగ్గాలు చేపట్టిన తర్వాత తొలిసారిగా రాష్ట్రంలోని అన్ని జిల్లాల కలెక్టర్లు, పోలీసు సూపరింటెండెంట్లు (ఎస్పీలు), కమిషనర్లు, ఐజీలు, డీఐజీలతో పాటు రాష్ట్ర ఉన్నతాధికారులతో సీఎం విజయ్ రెండు రోజుల ఉన్నతస్థాయి సమీక్షా సమావేశాన్ని సోమవారం ఘనంగా ప్రారంభించారు.
చెన్నై నామక్కల్ కవింజర్ మాళిగైలో జరిగిన ఈ ప్రతిష్టాత్మక సమావేశంలో రాష్ట్ర ప్రభుత్వ ప్రధాన కార్యదర్శితో పాటు పలువురు ఉన్నతాధికారులు, మంత్రులు పాల్గొన్నారు. ఈ సందర్భంగా ముఖ్యమంత్రి మాట్లాడుతూ.. మహిళల భద్రత, డ్రగ్స్ పూర్తి స్థాయి నిర్మూలన, వ్యవస్థీకృత నేరాల అణచివేతలే తమ ప్రభుత్వ ప్రధాన లక్ష్యాలని తేల్చిచెప్పారు. రాష్ట్రంలో ఎక్కడా శాంతిభద్రతలకు విఘాతం కలగకుండా చూడాలని, చట్టం ముందు అందరూ సమానమేనని స్పష్టం చేశారు. తప్పు చేసిన వారు ఎంతటి శక్తిమంతులైనా, ఎంతటి రాజకీయ బ్యాక్‌గ్రౌండ్ ఉన్నవారైనా నిష్పాక్షికంగా చట్టప్రకారం శిక్షించాల్సిందేనన్నారు. అదే సమయంలో అమాయకులు మాత్రం ఎట్టి పరిస్థితుల్లోనూ ఇబ్బంది పడకూడదని అధికారులను గట్టిగా ఆదేశించారు. ఎలాంటి రాజకీయ ఒత్తిళ్లకు తలొగ్గకుండా పూర్తి స్వేచ్ఛగా విధులను నిర్వహించాలని అధికారులకు సూచించారు.
**మహిళల భద్రత, డ్రగ్స్ ముఠాలపై ఉక్కుపాదం**
రాష్ట్రంలో మహిళల భద్రతకు, చిన్నారుల రక్షణకు అత్యధిక ప్రాధాన్యత ఇవ్వాలని సీఎం విజయ్ స్పష్టం చేశారు. మహిళలపై జరిగే నేరాలు, పోక్సో (POCSO) కేసుల విచారణలో ఎలాంటి జాప్యం జరగకూడదని, విద్యార్థులు, చిన్నారుల భద్రతపై ప్రత్యేక నిఘా పెట్టాలని ఆదేశించారు. ముఖ్యంగా పాఠశాలలు, కళాశాలల పరిసర ప్రాంతాల్లో పోలీస్ నిఘాను ముమ్మరంగా పెంచి, డ్రగ్స్ ముఠాల ఆటకట్టించాలని పోలీసు అధికారులకు సూచించారు. రాష్ట్రాన్ని ‘డ్రగ్స్-ఫ్రీ తమిళనాడు’ (మాదకద్రవ్యాలు లేని తమిళనాడు) గా తీర్చిదిద్దడమే తమ ప్రభుత్వ ధ్యేయమని విజయ్ ప్రకటించారు. మాదకద్రవ్యాల అక్రమ రవాణా, నిషేధిత పొగాకు ఉత్పత్తుల విక్రయాలు, అక్రమ మద్యం తయారీ, ఇసుక అక్రమ తవ్వకాలు, ఖనిజాల స్మగ్లింగ్, వ్యవస్థీకృత నేరాలపై రాజీపడకుండా కఠిన చర్యలు తీసుకోవాలని స్పష్టం చేశారు. నేరం జరిగిన తర్వాత స్పందించడం కంటే, వాటి మూలాలను ముందే గుర్తించి నివారించడంపై అధికారులు దృష్టి సారించాలన్నారు.
రౌడీషీటర్లు, బెయిల్‌పై బయట తిరుగుతున్న పాత నేరస్థుల కదలికలపై నిరంతరం నిఘా ఉంచాలని, ఇంటెలిజెన్స్ (గూఢచార) వ్యవస్థను మరింత బలోపేతం చేయాలని సీఎం విజయ్ ఆదేశించారు. సైబర్ నేరాలు, కుల ఘర్షణలు, సామాజిక ఉద్రిక్తతలను ప్రారంభ దశలోనే గుర్తించి అణచివేసేలా యంత్రాంగం అప్రమత్తంగా పనిచేయాలన్నారు. గ్రామీణ, పట్టణ ప్రాంతాల్లో వచ్చే భూ వివాదాలు పెద్ద హింసాత్మక ఘటనలకు దారితీయకుండా నివారించేందుకు వీలుగా జిల్లా స్థాయిలో ప్రత్యేక పరిష్కార కమిటీలను త్వరలోనే ఏర్పాటు చేయనున్నట్లు ఈ వేదికగా వెల్లడించారు.
**పారదర్శక పాలన.. ప్రతిభావంతులకు పురస్కారాలు**
అవినీతికి ఎంతమాత్రం తావులేని, అత్యంత పారదర్శకమైన పాలనను తమిళనాడు ప్రజలకు అందించడమే తమ ప్రభుత్వ ఏకైక లక్ష్యమని విజయ్ స్పష్టం చేశారు. సామాన్యులకు అవసరమైన తాగునీరు, వైద్యం, విద్య, విద్యుత్, ప్రజా రవాణా వంటి ప్రాథమిక మౌలిక సేవలను ప్రజలకు సమర్థవంతంగా, వేగంగా అందించేందుకు అధికారులు క్షేత్రస్థాయిలో కష్టపడాలని సూచించారు. మొత్తం మూడు విడతల్లో జరుగుతున్న ఈ ఉన్నతస్థాయి సదస్సులో తొలి రోజు కలెక్టర్లు, పోలీసు అధికారులు సంయుక్తంగా పాల్గొన్నారు.
రెండో రోజు జిల్లాల వారీగా జరుగుతున్న వివిధ అభివృద్ధి పనులపై కలెక్టర్లతో విడిగాను, ఆ తర్వాత శాంతిభద్రతలపై పోలీసు అధికారులతోను సీఎం విజయ్ విడివిడిగా సమీక్షలు నిర్వహించనున్నారు. ఈ సమావేశాల ముగింపు సందర్భంగా రాష్ట్రంలో ఉత్తమ ప్రతిభ కనబరిచిన కలెక్టర్లు, పోలీసు అధికారులు, అటవీ శాఖ అధికారులను ముఖ్యమంత్రి విజయ్ స్వయంగా సత్కరించి, ప్రభుత్వ అధికారిక పురస్కారాలను అందజేయనున్నారు. అధికారంలోకి వచ్చిన కొద్ది రోజుల్లోనే పాలన, శాంతిభద్రతలు, మహిళల భద్రత, డ్రగ్స్ నిర్మూలనపై సీఎం విజయ్ అవలంబిస్తున్న కఠిన వైఖరి తమిళనాడులోనే కాకుండా దేశవ్యాప్తంగా రాజకీయ, పరిపాలనా వర్గాలలో ఆసక్తికరమైన చర్చకు దారితీస్తోంది.