హైదరాబాద్, మహా.
ఆయిల్ పామ్ సాగు లక్ష్యాలను వేగంగా పూర్తి చేయడం, పంట మార్పిడి విధానాలను విస్తృతంగా అమలు చేయడం, ఎరువుల సరఫరాలో ఎలాంటి కొరత రాకుండా చూడడం, వర్షాకాల వ్యాధుల నియంత్రణకు ముందస్తు చర్యలు చేపట్టాలని రాష్ట్ర ప్రభుత్వ ప్రధాన కార్యదర్శి సంజయ్ జాజు జిల్లా కలెక్టర్లను ఆదేశించారు.
ఆయిల్ పామ్ సాగు లక్ష్య సాధనపై దృష్టి
హైదరాబాద్లోని రాష్ట్ర సచివాలయం నుంచి శనివారం అన్ని జిల్లాల కలెక్టర్లతో వీడియో కాన్ఫరెన్స్ నిర్వహించిన ప్రధాన కార్యదర్శి సంజయ్ జాజు, 2026–27 సంవత్సరానికి రాష్ట్రవ్యాప్తంగా 85 వేల ఎకరాల్లో ఆయిల్ పామ్ సాగు చేపట్టే లక్ష్యాన్ని నిర్దేశించినట్లు తెలిపారు. ఈ లక్ష్య సాధనలో జిల్లా యంత్రాంగం కీలక పాత్ర పోషించాలని, రైతులను చైతన్యపరిచి ఆయిల్ పామ్ సాగు వైపు ప్రోత్సహించాలని సూచించారు. జిల్లా సమీకృత కలెక్టరేట్లో నిర్వహించిన ఈ సమావేశంలో జిల్లా కలెక్టర్ స్నేహ శబరిష్ సంబంధిత అధికారులతో కలిసి పాల్గొన్నారు.
పంట మార్పిడి, కూరగాయల సాగుకు ప్రాధాన్యం
సాంప్రదాయ పంటలకే పరిమితం కాకుండా పంట మార్పిడి విధానాలను రైతులు విస్తృతంగా అనుసరించేలా వ్యవసాయ శాఖ అధికారులు కృషి చేయాలని సీఎస్ ఆదేశించారు. మార్కెట్ అవసరాలకు అనుగుణంగా కూరగాయల సాగును పెంచాలని, సూక్ష్మ సేద్య పద్ధతులను రైతులు అనుసరించేలా అవగాహన కల్పించాలని సూచించారు. నీటి వినియోగ సామర్థ్యాన్ని పెంచుతూ తక్కువ వ్యయంతో అధిక దిగుబడులు సాధించే సాంకేతికతలను ప్రోత్సహించాలని చెప్పారు.
ఎరువుల అక్రమ రవాణాపై కఠిన చర్యలు
యూరియా, డీఏపీ, ఇతర కాంప్లెక్స్ ఎరువులు రైతులకు ఎలాంటి కొరత లేకుండా అందుబాటులో ఉండేలా అధికారులు చర్యలు తీసుకోవాలని సంజయ్ జాజు స్పష్టం చేశారు. ఎరువులను పక్కదారి పట్టించే వారిపై కఠిన చర్యలు తీసుకోవాలని హెచ్చరించారు. జిల్లాల కలెక్టర్లు స్వయంగా ఎరువుల నిల్వలు, పంపిణీ, అక్రమ రవాణాపై నిరంతర పర్యవేక్షణ చేపట్టాలని ఆదేశించారు.
ఫార్మర్ రిజిస్ట్రీలో తెలంగాణ అగ్రస్థానం
జిల్లాల వారీగా ఫార్మర్ రిజిస్ట్రీ పురోగతిని సమీక్షించిన సీఎస్, దేశంలోనే 71.45 శాతం నమోదు పూర్తి చేసి తెలంగాణ తొలి స్థానంలో నిలిచిందని తెలిపారు. మిగిలిన నమోదు ప్రక్రియను కూడా వేగంగా పూర్తి చేసి ప్రతి రైతు వివరాలను సమగ్రంగా నమోదు చేయాలని అధికారులను ఆదేశించారు.
వర్షాకాల వ్యాధులపై అప్రమత్తంగా ఉండాలి
వర్షాకాలంలో డెంగ్యూ, మలేరియా, టైఫాయిడ్ వంటి అంటువ్యాధులు వ్యాపించే ప్రమాదం ఎక్కువగా ఉంటుందని, ప్రజారోగ్య పరిరక్షణకు అన్ని శాఖలు సమన్వయంతో పనిచేయాలని ప్రధాన కార్యదర్శి సూచించారు. గ్రామాలు, పట్టణాల్లో పారిశుద్ధ్య కార్యక్రమాలను ముమ్మరం చేసి దోమల నివారణ చర్యలు చేపట్టాలని, వైద్యశాఖ, స్థానిక సంస్థలు, జిల్లా యంత్రాంగం అప్రమత్తంగా వ్యవహరించాలని ఆదేశించారు.
