- బీఆర్ఎస్ లాభాల కోసమే’ .
- రాష్ట్ర నీటిపారుదల శాఖ మంత్రి ఉత్తమ్ కుమార్ రెడ్డి.
హైదరాబాద్, మహా.
తెలంగాణలో పదేళ్ల బీఆర్ఎస్ పాలనలో ప్రజల ప్రయోజనాలు పూర్తిగా విస్మరించబడ్డాయని, ముఖ్యంగా నీటి పారుదల శాఖను తీవ్రంగా దెబ్బతీశారని రాష్ట్ర నీటిపారుదల శాఖ మంత్రి ఉత్తమ్ కుమార్ రెడ్డి ఆరోపించారు. కాళేశ్వరం ప్రాజెక్టు పేరుతో భారీగా అప్పులు చేసి ప్రజలపై భారం మోపడంతో పాటు, ప్రాజెక్టు నిర్మాణంలో లోపాల కారణంగా రాష్ట్రానికి తీవ్ర నష్టం జరిగిందని విమర్శించారు. ఆదివారం సచివాలయంలో కాళేశ్వరం ప్రాజెక్టుపై నిర్వహించిన మీడియా సమావేశంలో ఆయన ఈ వ్యాఖ్యలు చేశారు.
‘భారీ వ్యయం.. పరిమిత ప్రయోజనం’
కాళేశ్వరం ప్రాజెక్టుపై సుమారు రూ.1.81 లక్షల కోట్లు వ్యయం చేసినప్పటికీ, అందుకు తగిన స్థాయిలో సాగునీటి ప్రయోజనం కల్పించలేకపోయారని మంత్రి అన్నారు. అనేక ప్రాజెక్టులు ఇప్పటికీ అసంపూర్తిగానే ఉన్నాయని, బీఆర్ఎస్ ప్రభుత్వం ప్రచారం ఎక్కువ చేసి పనులు తక్కువ చేసిందని విమర్శించారు. కాంగ్రెస్ ప్రభుత్వం అధికారంలోకి వచ్చిన తర్వాత నీటిపారుదల శాఖలో లోపాలను సరిదిద్దే చర్యలు ప్రారంభించినట్లు తెలిపారు.
‘కూలింది కూడా వారి హయాంలోనే’
కాళేశ్వరం ప్రాజెక్టు నిర్మాణం బీఆర్ఎస్ ప్రభుత్వ హయాంలోనే జరిగిందని, మేడిగడ్డ బ్యారేజీలో లోపాలు బయటపడింది కూడా అదే ప్రభుత్వ కాలంలోనేనని మంత్రి గుర్తు చేశారు. దీనిపై ఇంజినీర్లు సమర్పించిన నివేదికలు కూడా నిర్మాణ లోపాలనే సూచిస్తున్నాయని పేర్కొన్నారు. ప్రస్తుతం ప్రాజెక్టు సమస్యలకు బాధ్యత వహించాల్సిన వారే ప్రభుత్వంపై విమర్శలు చేయడం విడ్డూరంగా ఉందని వ్యాఖ్యానించారు.
కేటీఆర్పై విమర్శలు
కన్నెపల్లి పంప్హౌస్ వద్దకు వెళ్లి పంపులను ప్రారంభించాలని మాజీ మంత్రి కేటీఆర్ చేస్తున్న వ్యాఖ్యలు ప్రజలను తప్పుదోవ పట్టించే ప్రయత్నమని ఉత్తమ్ కుమార్ రెడ్డి ఆరోపించారు. కాళేశ్వరం ప్రాజెక్టు సక్రమంగా నిర్మించి ఉంటే ఇలాంటి పరిస్థితి తలెత్తేదే కాదని అన్నారు. ప్రస్తుతం ప్రాజెక్టు నీటిని పూర్తిస్థాయిలో వినియోగించలేకపోవడానికి బీఆర్ఎస్ ప్రభుత్వ నిర్ణయాలే కారణమని విమర్శించారు.
‘ఫౌండేషన్లోనే లోపాలు’
మేడిగడ్డ, అన్నారం, సుందిళ్ల బ్యారేజీలను పూర్తిస్థాయిలో వినియోగించలేకపోవడానికి నాసిరకం నిర్మాణమే కారణమని మంత్రి తెలిపారు. కాళేశ్వరం ప్రాజెక్టు పునాది నిర్మాణంలో లోపాలు ఉన్నాయని అధికారుల నివేదికలు స్పష్టం చేశాయని చెప్పారు. అంతర్జాతీయ, జాతీయ స్థాయి నీటి నిపుణులు కూడా ప్రస్తుత పరిస్థితుల్లో ప్రాజెక్టు నిర్వహణపై జాగ్రత్తలు అవసరమని సూచించినట్లు వెల్లడించారు.
‘భద్రతే ప్రధాన ప్రాధాన్యం’
ప్రాజెక్టులో భారీగా నీటిని నిల్వ చేసిన సమయంలో నిర్మాణపరమైన సమస్యలు తలెత్తితే దిగువ ప్రాంతాల్లోని అనేక గ్రామాలకు ప్రమాదం ఏర్పడే అవకాశం ఉందని మంత్రి హెచ్చరించారు. ప్రజల ప్రాణాలు, ఆస్తుల భద్రత దృష్ట్యా నిపుణుల సూచనల మేరకు మాత్రమే నిర్ణయాలు తీసుకుంటామని స్పష్టం చేశారు.
తుమ్మిడిహెట్టిపై ఆరోపణలు
తుమ్మిడిహెట్టి ప్రాజెక్టును ముందుకు తీసుకెళ్లకుండా, డిజైన్లలో మార్పులు చేసి మేడిగడ్డ వైపు మళ్లించడం వల్ల ఉత్తర తెలంగాణకు దీర్ఘకాలిక నష్టం జరిగిందని ఉత్తమ్ కుమార్ రెడ్డి ఆరోపించారు. కమిషన్ల కోసమే అప్పటి ప్రభుత్వం నిర్ణయాలు తీసుకుందని, ప్రజా ప్రయోజనాల కంటే రాజకీయ ప్రయోజనాలకే ప్రాధాన్యం ఇచ్చిందని విమర్శించారు. తెలంగాణ ప్రజలకు జరిగిన అన్యాయానికి బీఆర్ఎస్ ప్రభుత్వమే బాధ్యత వహించాలని ఆయన అన్నారు.
